ស្ថានទូតចិនប្រចាំសហរដ្ឋអាម៉េរិក ៖ របាយការណ៍របស់អាម៉េរិកអំពីវីរុសកូរ៉ូណា មិនអាចជឿទុកចិត្តបាន
ស្ថានទូតចិនប្រចាំសហរដ្ឋអាមេរិកបានថ្លែងនៅថ្ងៃសុក្រទី២៧សីហាថា របាយការណ៍របស់សហគមន៍ចារកម្មអាម៉េរិកអំពីប្រភពដើមនៃជំងឺកូវីដ១៩ គឺ”មិនគួរឱ្យជឿទុកចិត្តបែបវិទ្យាសាស្ត្របាននោះឡើយ” ហើយការអះអាងរបស់រដ្ឋាភិបាលក្រុងវ៉ាស៊ីនតោនថាប្រទេសចិនខ្វះតម្លាភាពគឺគ្រាន់តែជាលេសនយោបាយនិងការម៉ាក់ងាយប៉ុណ្ណោះ។នេះបើយោងតាមវ៉េបសាយរបស់ចិនឈ្មោះ Weixin។
របាយការណ៍សង្ខេបចំនួនពីរទំព័ររបស់ការិយាល័យនាយកនៃទីភ្នាក់ងារចារកម្មជាតិដែលបានចេញផ្សាយកាលពីថ្ងៃសុក្រ មិនបានច្រានចោលនូវប្រភពនៃកូវីដ១៩ដែលកើតឡើងទាំងបែបធម្មជាតិនិងកើតឡើងដោយឧបទ្ទេវហេតុពីមន្ទីរពិសោធន៍ ប៉ុន្តែរបាយការណ៍អះអាងថា ចិន “បន្តរារាំងការស៊ើបអង្កេតរបស់សាកលលោក ដោយជំទាស់មិនព្រមចែករំលែកព័ត៌មាននិងបន្ទោសប្រទេសដទៃ”។
ទន្ទឹមនឹងនេះ សេចក្ដីថ្លែងការណ៍មួយចេញផ្សាយដោយសេតវិមានអាម៉េរិកក៏បានអះអាងដែរថា ចិនព្យាយាមរារាំងការស៊ើបអង្កេតរបស់អន្តរជាតិនិងបានច្រានចោលការអំពាវនាវឱ្យមានតម្លាភាព។ សេចក្ដីថ្លែងការណ៍នោះជំរុញដៃគូរបស់អាម៉េរិកឱ្យដាក់សម្ពាធលើប្រទេសចិន។
គេហទំព័រ Weixinបានឱ្យដឹងទៀតថាស្ថានទូតចិនបានថ្លែងក្នុងសេចក្ដីថ្លែងការណ៍មួយថា “ភាគីចិនបង្ហាញការប្រឆាំងយ៉ាងមុតមាំនិងថ្កោលទោសយ៉ាងដាច់អហង្ការចំពោះករណីនេះ”។ ស្ថានទូតចិនបានកត់សម្គាល់ថា ការតាមរកប្រភពជំងឺកូវីដគឺជារឿងពាក់ព័ន្ធនឹងវិទ្យាសាស្ត្រ, វាគួរតែទុកឱ្យក្រុមអ្នកវិទ្យាសាស្ត្រធ្វើការ មិនមានទុកឱ្យអ្នកជំនាញចារកម្មនោះទេ។
ស្ថានទូតចិនបានបន្តក្នុងសេចក្ដីថ្លែងការណ៍នោះទៀតថា គេមិនដែលឃើញខ្វះនូវស្នាដៃណាមួយពីសំណាក់សហគមន៍ចារកម្មអាម៉េរិកនោះឡើយ ដូចជាការប្រប្រាស់បំពង់ម្សៅបោកគក់ដើម្បីចោទប្រកាន់ប្រទេសអ៊ីរ៉ាក់អំពីការកាន់កាប់អាវុធប្រល័យលោក ឬក៏ប្រឌិតវីដេអូក្រុម “មួកស” ដើម្បីធ្វើជាភស្តុតាងដើម្បីវាយប្រហារដោយអាវុធគីមីលើប្រទេសស៊ីរី។
សេចក្ដីថ្លែងការណ៍បន្តថា៖ “ឥឡូវនេះ ភាគីសហរដ្ឋអាម៉េរិកកំពុងប្រើប្រាស់ល្បិចចាស់របស់ខ្លួនម្ដងទៀត។ ដោយមិនអើពើចំពោះរបាយការណ៍ចេញដោយបេសកកម្មរួមរបស់ WHO និងចិន អាម៉េរិកបែរជាជ្រើសរើសឱ្យសហគមន៍ចារកម្មរបស់ខ្លួនចេញនូវរបាយការណ៍ទៅវិញ។ ទូតចិនបន្តទៀតថា តើការធ្វើបែបនេះអាចចាត់ទុកជាមូលដ្ឋានបែបវិទ្យាសាស្ត្រនិងការស្រាវជ្រាវប្រភពមេរោគកូរ៉ូណាដែលគួរឱ្យទុកចិត្តបានដែរឬទេ?”។
ប្រភពដដែលបានឱ្យដឹងថា៖ស្ថានទូតចិនបានថ្លែងថា ការអះអាងដែលថាចិនខ្វះតម្លាភាពគឺគ្រាន់តែជាលេសនយោបាយរបស់អាម៉េរិកនិងជាយុទ្ធនាការមាក់ងាយចិន ព្រោះថាចាប់តាំងពីការផ្ទុះជំងឺកូវីដ១៩មក ចិនបានបង្ហាញឥរិយាបថបើកទូលាយ តម្លាភាពនិងទទួលខុសត្រូវ៕Ph
ប្រភព៖ https://mp.weixin.qq.com/s/TxxqoZBlgSF9HoFoJ4Ex6Q
