ការចូលជាធរមាននៃកិច្ចព្រមព្រៀង​ ​​ពាណិជ្ជកម្ម​សេរីចិន-កម្ពុជានិងការលើកកម្ពស់ទំនាក់ទំនងរវាងចិននិងអាស៊ានទៅជាដៃគូយុទ្ធសាស្ត្រគ្រប់ជ្រុងជ្រោយនឹងនាំមកនូវផលប្រយោជន៍រួមជូនដល់ប្រជាជននៃប្រទេសទាំងពីរនិងក្នុងតំបន់

ដំណឹងដ៏គួរឱ្យរីករាយមួយត្រូវបានប្រកាសដោយក្រសួងពាណិជ្ជកម្មចិននៅថ្ងៃទី ២២ ខែវិច្ឆិកានេះស្របនឹងការប្រារព្ធធ្វើកិច្ចប្រជុំកំពូលចិន-អាស៊ានដើម្បីរំលឹកខួបអនុស្សាវរីយ៍ទី ៣០ នៃការបង្កើតទំនាក់ទំនងសន្ទនារវាងចិននិងអាស៊ាន ពោលគឺកិច្ចព្រមព្រៀងពាណិជ្ជកម្មសេរីចិន-កម្ពុជានឹងមានសុពលភាពចាប់ពីថ្ងៃទី ១ ខែមករា ឆ្នាំ ២០២២ តទៅ ។

បន្ទាប់ពីការចុះហត្ថលេខាបានជាងមួយឆ្នាំ កិច្ចព្រមព្រៀងនេះបានកំណត់ពីពេលវេលាជាក់លាក់នៃការចូលជាធរមានជាផ្លូវការ ដែលនេះមានន័យថា ទំនាក់ទំនងពាណិជ្ជកម្មរវាងប្រទេសទាំងពីរចិននិងកម្ពុជានឹងឈានចូលក្នុងយុគសម័យថ្មីដែលកាន់តែស្អិតល្មួត ងាយស្រួល សេរី រស់រវើក និងមានកម្រិតខ្ពស់ ។

អនុលោមតាមខ្លឹមសារពាក់ព័ន្ធនៃកិច្ចព្រមព្រៀងនេះ ទំនិញលើសពី ៩០ ភាគរយនឹងត្រូវលើកលែងពន្ធគយទៅវិញទៅមក ប្រការនេះមានអំណោយផលដល់ការបញ្ចុះដើមទុនផលិតកម្មរបស់សហគ្រាសទ្វេភាគី ដែលមានន័យថានឹងនាំមកជូនអ្នកប្រើប្រាស់នៃប្រទេសទាំងពីរនូវផលិតផលដែលមានគុណភាពខ្ពស់និងមានតម្លៃសមរម្យជាងមុន ពោលគឺនឹងនាំមកនូវផលប្រយោជន៍ជូនទាំងសហគ្រាសនិងប្រជាជននៃប្រទេសទាំងពីរ ហើយក៏ជាការរួមចំណែកដ៏សំខាន់សម្រាប់ការអភិវឌ្ឍសេដ្ឋកិច្ចជាតិរៀងខ្លួនផងដែរ ។

ក្រៅពីជំរុញពាណិជ្ជកម្មទំនិញ កិច្ចព្រមព្រៀងនេះក៏នឹងរួមចំណែកដល់ការជំរុញកិច្ចសហប្រតិបត្តិការលើវិស័យវិនិយោគ ធុរកិច្ចអេឡិចត្រូនិក និងបច្ចេកវិទ្យាជាដើម ពិសេសគឺការសិក្សាបន្ថែមលើកិច្ចសហប្រតិបត្តិការ«ខ្សែក្រវាត់និងផ្លូវ» ដែលអាចនិយាយបានថាជានិមិត្តសញ្ញាថ្មីនៃការអភិវឌ្ឍទំនាក់ទំនងសេដ្ឋកិច្ចនិងពាណិជ្ជកម្មរវាងប្រទេសទាំងពីរចិននិងកម្ពុជា ។

ជាការពិតណាស់ ទីផ្សារដែលមាន​ចំនួនប្រជាជន ១,៤០០ លាននាក់របស់ប្រទេសចិននឹងផ្តល់នូវវេទិកាដ៏ធំទូលាយសម្រាប់វត្តមានរបស់ផលិតផលខ្មែរ ជាពិសេសគឺកសិផល ។ ប្រជាកសិករកម្ពុជាដែលកន្លងមកតែងជួបប្រទះនឹងបញ្ហាខ្វះខាតទីផ្សារ នឹងទទួលបានទីផ្សារដ៏ធំតាមរយៈការលើកកម្ពស់ស្តង់ដាគុណភាពនៃកសិផលរបស់ខ្លួន ។ ល្គឹកណាដែលកសិផលរបស់បងប្អូនប្រជាកសិករខ្មែរត្រូវបាននាំចេញទៅប្រទេសចិនតាមរយៈកិច្ចព្រមព្រៀងនេះ ល្គឹកនោះប្រាក់ចំណូលរបស់ពួកគាត់ក៏នឹងកើនឡើងដែរ ហើយជីវភាពដែលបានធូរធារឡើងនឹងជួយឱ្យពួកគាត់ចាកចេញពីភាពក្រីក្រ ដែលស្របតាមទិសដៅកាត់បន្ថយភាពក្រីក្ររបស់រាជរដ្ឋាភិបាលកម្ពុជា ។

អ្វីដែលគួររំលឹកគឺនៅថ្ងៃ ២២ ខែវិច្ឆិកានេះ ក្នុងកិច្ចប្រជុំកំពូលចិន-អាស៊ានដើម្បីរំលឹកខួបអនុស្សាវរីយ៍ទី ៣០ នៃការបង្កើតទំនាក់ទំនងសន្ទនារវាងអាស៊ាននិងចិន ថ្នាក់ដឹកនាំកំពូលរបស់ប្រទេសចិននិងអាស៊ានបានរួមគ្នាប្រកាសពីការលើកកម្ពស់ទំនាក់ទំនងទ្វេភាគីទៅជាដៃគូយុទ្ធសាស្ត្រគ្រប់ជ្រុងជ្រោយ ។ ក្នុងនាមជាមិត្តដែកថែបរបស់ចិននិងជាសមាជិកមួយរបស់អាស៊ាន កម្ពុជានឹងទទួលបានផលប្រយោជន៍ទ្វេដងពីកិច្ចសហប្រតិបត្តិការរវាងកម្ពុជា-ចិននិងចិន-អាស៊ាន ។

ទំនាក់ទំនងសន្ទនារវាងអាស៊ាននិងចិនបានដើរឆ្លងកាត់រយៈពេល ៣០ ឆ្នាំដែលប្រកបដោយលទ្ធផលជាផ្លែផ្កាគួរឱ្យកត់សម្គាល់ បើទោះបីជាក្នុងដំណើរនេះកើតមានភាពរកាំរកូសបន្តិចបន្តួចក្តី ក៏ប៉ុន្តែភាគីទាំងពីរបានប្រកាន់ខ្ជាប់ស្មារតីដោះស្រាយបញ្ហាតាមការពិគ្រោះពិភាក្សាដោយសន្តិវិធីរហូតបានឈានដល់គំនិតឯកភាពរួមជាបន្តបន្ទាប់ ។

សម្តេចតេជោ ហ៊ុន សែន បានថ្លែងក្នុងកិច្ចប្រជុំកំពូលនេះថា អាស៊ាន-ចិន បានបង្កើតទំនាក់ទំនងដ៏ស្អិតល្មួតប្រកបដោយសាមគ្គីភាពនិងផ្លែផ្កា ដែលផ្តល់ប្រយោជន៍ឱ្យគ្នាទៅវិញទៅមក និងចូលរួមចំណែកយ៉ាងសំខាន់ ក្នុងការនាំមកនូវសន្តិភាព ស្ថិរភាព សន្តិសុខ វិបុលភាព និងការអភិវឌ្ឍសង្គម-សេដ្ឋកិច្ច ប្រកបដោយចីរភាព និងបរិយាប័ន្ននៅក្នុងតំបន់ទាំងពីរ ។

ចំណែកឯលោក ស៊ី ជីនភីង ប្រធានរដ្ឋចិនបានលើកពីសំណើ ៤ ចំណុចដើម្បីអភិវឌ្ឍទំនាក់ទំនងរវាងចិននិងអាស៊ាននាពេលអនាគត ពោលគឺទី​១ គោរ​ពគ្នាទៅវិញទៅមក ​ប្រកាន់​ខ្ជាប់​ក្រម​មូលដ្ឋាន​នៃ​ទំនាក់ទំនង​អន្តរជាតិ ​។​ ទី​២ ​ធ្វើ​កិច្ចសហប្រតិបត្តិការ​​ឈ្នះ-ឈ្នះ​ ​ដើរ​តាម​មាគ៌ា​អភិវឌ្ឍន៍​ដោយ​សន្តិភាព ​។​ ទី​៣ ​ជួយ​គ្នា​ទៅវិញទៅមក​​ ។ ទី៤ ​បរិយប័ន្ន​និង​រៀនសូត្រពីគ្នា ដើម្បី​រួមគ្នា​កសាង​តំបន់និយម​ដែល​បើក​ទូលាយ​ ។

ជាក់ស្តែងគឺដូចអ្វីដែលយើងទាំងអស់គ្នាបានមើលឃើញយ៉ាងប្រចក្សហើយថា មិនថាការឈានដល់ការសម្រេចបាននូវការរួមគ្នាកសាងសហគមន៍រួមវាសនាចិន-កម្ពុជាឬក៏សហគមន៍រួមវាសនាចិន-អាស៊ានក្តី ប្រទេសចិនគឺជាតួអង្គ​និងជាកម្លាំងចលករសំខាន់ដែលមិនអាចខ្វះបាន ។  គោលនយោបាយរួមរស់នៅដោយសន្តិសហវិជ្ជមាន ពហុភាគីនិយម និងកិច្ចសហប្រតិបត្តិការឈ្នះ-ឈ្នះរបស់ចិននឹងរួមចំណែកយ៉ាងសំខាន់ក្នុងការជំរុញការអភិវឌ្ឍរួមនិងវិបុលភាពរួមក្នុងតំបន់និងពិភពលោក ហើយការរួមគ្នាកសាងសហគមន៍រួមវាសនាតែមួយរបស់មនុស្សជាតិគង់នឹងអាចសម្រេចបានជាមិនខាន ៕

( អត្ថបទដោយ ៖ តាំង ស៊ីឡេង , បុគ្គលនៃវិទ្យុមិត្តភាពកម្ពុជា-ចិន )