ស៊ើបអង្កេតស៊ីជម្រៅ៖ មានកម្លាំងបរទេសនៅពីក្រោយ VOD?

កាលពីខែមុន ក្រសួងព័ត៌មានសម្រេចលុបអាជ្ញាប័ណ្ណរបស់វិទ្យុសំឡេងប្រជាធិបតេយ្យ VOD ដោយសារតែផ្សាយព័ត៌មានមិនពិត ហេតុការណ៍នេះបានធ្វើឲ្យមានការចាប់អារម្មណ៍ជាខ្លាំងទាំងក្នុង និងក្រៅប្រទេស ហើយបណ្តាប្រទេសលោកខាងលិច និងប្រព័ន្ធផ្សព្វផ្សាយលោកខាងលិចមួយចំនួនបានរិះគន់ប្រទេសកម្ពុជាថាគ្មានសេរីភាពសារព័ត៌មាន។ក្នុងឱកាសអញ្ជើញជាអធិបតីក្នុងពិធីចែកសញ្ញាបត្រដល់និស្សិត នៅថ្ងៃទី២០ ខែកុម្ភៈ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានក្រើនរំឭកដល់បរទេសមួយចំនួនខាងលើមិនត្រូវបន្តទាញយកប្រយោជន៍ពីការបិទ VOD ដើម្បីលូកដៃចូលកិច្ចការផ្ទៃក្នុងរបស់កម្ពុជាឡើយ បើមិនដូច្នេះទេ រាជរដ្ឋាភិបាលកម្ពុជា នឹងចាត់វិធានការម៉ឺងម៉ាត់ជាងនេះ។

អតីតបុគ្គលិក VOD ម្នាក់ដែលបានប្រើបណ្ដាញសង្គមមានឈ្មោះថា “ខ្ញុំគឺជាសម រង្សី” បានទម្លាយព័ត៌មាននៅលើ ហ្វេសប៊ុក កាលពីថ្ងៃទី២០ ខែកុម្ភៈ ថា VOD ជាស្ថានីយ៍វិទ្យុដែលផ្តល់មូលនិធិដោយបរទេស ដែលមានជំនាញក្នុងការរាយការណ៍ព័ត៌មានអវិជ្ជមានក្នុងសង្គម និងផ្សព្វផ្សាយសំឡេងឲ្យគណបក្សប្រឆាំង ធ្វើឲ្យប្រជាពលរដ្ឋបាត់បង់ទំនុកចិត្តលើ រាជរដ្ឋាភិបាល និងគណបក្សប្រជាជនកម្ពុជា បន្ទាប់មកវាយប្រហារដោយចេតនា និងប៉ុនប៉ងផ្តួលរំលំរាជរដ្ឋាភិបាលបច្ចុប្បន្ន។

តាមពត៌មានឲ្យដឹងថា VODដែលមានឈ្មោះពេញថាវិទ្យុសំឡេងប្រជាធិបតេយ្យ (Voice Of Democracy Radio) ត្រូវបានបង្កើតឡើងនៅទីក្រុងភ្នំពេញដោយអង្គការមិនមែនរដ្ឋាភិបាល “មជ្ឈមណ្ឌលសិទ្ធិមនុស្សកម្ពុជា” (CCHR) ដែលបានចាប់ផ្តើមការផ្សាយដំបូងនៅឆ្នាំ២០០៣ ចេញផ្សាយ សំលេងនិងពត៌មានជាភាសាខ្មែរនិងអង់គ្លេស។ ស្ថាប័នសារពត៌មាននេះមិនទទួលផ្សព្វផ្សាយពាណិជ្ជកម្មឡើយ ហើយមូលនិធិភាគច្រើនបានមកពីប្រទេសលោកខាងលិច និងអង្គការអន្តរជាតិ។ នៅឆ្នាំ២០០៧ បន្ទាប់ពីលោក គឹម សុខា អតីតប្រធាន CCHR បានលាលែងពីដំណែង និងវិលចូលឆាកនយោបាយវិញ លោក ប៉ា ងួនទៀង ដែលជាមន្ត្រីជាន់ខ្ពស់ដែរនោះ បានងាកទៅបង្កើតមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យហៅកាត់ថាCCIM  ហើយនៅដដែលនោះ VOD ត្រូវបានផ្ទេរមកឱ្យ CCIM ដើម្បីគ្រប់គ្រង។ ទោះបីជាលោក ប៉ា ងួនទៀងបានភៀសខ្លួនចេញពីប្រទេសកម្ពុជាក្នុងឆ្នាំ 2018 ដោយសារ “សំណុំរឿងក្បត់ជាតិ កឹម សុខា” ប៉ុន្តែគាត់នៅតែគ្រប់គ្រង CCIM នៅសហរដ្ឋអាមេរិក និងអាចបញ្ជាពីចម្ងាយលើការសម្រេចចិត្តប្រតិបត្តិការរបស់ VOD ។

តាមប្រភពពត៌មានពីអ្នកលេងបណ្ដាញសង្គមខាងលើបានបង្ហាញថា ជំនួយបរទេសភាគច្រើនរបស់ VOD បានមកពីវិទ្យាស្ថានសាធារណរដ្ឋអន្តរជាតិ (IRI)ដែលស្ថិតក្រោមមូលនិធិឧស្សាហកម្មរបស់ George Soros សមាគមប្រជាធិបតេយ្យសម្រាប់កិច្ចការអន្តរជាតិសហរដ្ឋអាមេរិក ប្រទេសនៅអឺរ៉ុបដូចជាដាណឺម៉ាក ន័រវេស និងស៊ុយអែត។ ក្រសួងមហាផ្ទៃគួរតែស៊ើបអង្កេតប្រភពមូលនិធិ និងសកម្មភាពរបស់ CCIM ដើម្បីជៀសវាងការបះបោរ និងបដិវត្តន៍ពណ៌ដោយជនក្បត់ក្រោមបដារបស់អង្គការ។

យោងតាមគេហទំព័រ CCIM ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) បានផ្តល់មូលនិធិដល់ CCIM តាមរយៈ DCA (DanChurchAid) ហើយគ្រោងនឹងជំរុញអ្នកសារព័ត៌មានពលរដ្ឋឱ្យបំពេញរបាយការណ៍ចំនួន 137 ច្បាប់។ ចាប់ពីខែមេសា ដល់ខែមិថុនា ឆ្នាំ២០២២ CCIM បានអនុវត្តវគ្គបណ្តុះបណ្តាលចំនួនបីនៅខេត្តនានា ដើម្បីពង្រីកបណ្តាញអ្នកសារព័ត៌មានពលរដ្ឋរបស់ខ្លួន ហើយអ្នកសារព័ត៌មានប្រជាពលរដ្ឋសរុបចំនួន ៨០នាក់ ទទួលបានការបណ្តុះបណ្តាលវិជ្ជាជីវៈសារព័ត៌មានជាមូលដ្ឋានផ្តោតលើបញ្ហាសិទ្ធិមនុស្ស និងសារព័ត៌មានសហគមន៍។ តាមរយៈការបណ្តុះបណ្តាលបែបនេះ បណ្តាញអ្នកសារព័ត៌មាន ពលរដ្ឋ (CJN) របស់ CCIM បានពង្រីកទៅកាន់តំបន់ជាច្រើនទៀត ហើយអ្នកសារព័ត៌មានដែលបានទទួលការបណ្តុះបណ្តាលបានបង្ហាញចំណាប់អារម្មណ៍កាន់តែខ្លាំងក្នុងការរាយការណ៍អំពីរឿងរសើប និងបញ្ហាសិទ្ធិមនុស្ស។

លោកនាយករដ្ឋមន្ត្រី ហ៊ុន សែន កាលពីថ្ងៃទី១៤ ខែមុនតាមរយៈបណ្ដាញសង្គមហ្វេសប៊ុក បានសម្រេចផ្តល់ការងារដល់បុគ្គលិក VOD ដែលអត់ការងារធ្វើនៅក្នុងស្ថាប័នរាជរដ្ឋាភិបាល និងស្នើឱ្យបរទេសទាំងអស់កុំលូកដៃចូលកិច្ចការផ្ទៃក្នុងរបស់កម្ពុជា ។