ធនាគារជាតិកម្ពុជាចេញផ្សាយធនបត្រអនុស្សាវរីយ៍ប្រភេទ ២០០០០០ រៀល

រាជរដ្ឋាភិបាលកម្ពុជាបានអនុញ្ញាតឱ្យធនាគារជាតិ នៃកម្ពុជាចេញផ្សាយធនបត្រអនុស្សាវរីយ៍ប្រភេទ ២០០ ០០០ (២ សែន) រៀល និងដាក់ឱ្យចរាចរនៅទូទាំងព្រះរាជាណាចក្រកម្ពុជា ដើម្បីអបអរសាទរខួបលើកទី ២០ នៃការគ្រងព្រះបរមរាជសម្បត្តិរបស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

អនុលោមទៅតាមអនុក្រឹត្យលេខ២៣១ អនក្រ.បក របស់រាជរដ្ឋាភិបាល ចុះថ្ងៃទី១៦ ខែតុលា ឆ្នាំ២០២៤ ស្តីពីការចេញផ្សាយធនបត្រអនុស្សាវរីយ៍ប្រភេទ ២០០០០០ រៀលក្នុងព្រះរាជាណាចក្រកម្ពុជា ធនាគារជាតិនៃកម្ពុជាបានប្រកាសចេញផ្សាយធនបត្រអនុស្សាវរីយ៍ប្រភេទ ២០០០០០ រៀល និងដាក់ឱ្យចរាចរនៅទូទាំងប្រទេសកម្ពុជាចាប់ពីថ្ងៃទី១៦ ខែតុលា ឆ្នាំ២០២៤នេះតទៅ។

យោងតាមការចេញផ្សាយជាសាធារណៈរបស់ធនាគារជាតិកម្ពុជា ធនបត្រអនុស្សាវរីយ៍មានលក្ខណៈសម្គាល់ដូចខាងក្រោម៖

ក- លក្ខណៈទូទៅ៖

– ទំហំធនបត្រ : បណ្តោយ ១៧០ មម ទទឹង ៧៦ មម

– ពណ៌ចម្បងគឺពណ៌ត្នោត ពណ៌ទឹកក្រូច និង ពណ៌ផ្កាឈូក

ខ- ថ្ងៃខាងមុខ ៖

– ផ្នែកណ្តាល ត្រូវបានរំលេចឡើងនូវព្រះឆាយាល័ក្ខណ៍ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា រួមជាមួយព្រះវររាជមាតា ដែលផ្ទៃខាងក្រោយត្រូវបានតែងលម្អដោយក្បាច់ចម្លាក់ជាប្រពៃណី ព្រមជាមួយអក្សរ “ពីរសែនរៀល” នៅខាងក្រោម។ ខាងឆ្វេងមានលេខ “២០០០០០” នៅពីលើ ព្រមទាំងហត្ថលេខារបស់អគ្គទេសាភិបាលកិត្តិយស អគ្គទេសាភិបាល និង អគ្គបេឡា ខិតមកក្រោមមានរូបចម្លាក់នាគមួយគូនៅប្រាសាទបន្ទាយសំរ៉ែក្នុងខេត្តសៀមរាប។

– ផ្នែកខាងស្តាំ ខាងលើមានអក្សរ “ធនាគារជាតិនៃកម្ពុជា” ខិតមកក្រោមមានលេខមាលាបោះពុម្ពដោយទឹកខ្មៅពណ៌ក្រហម និងនៅពីក្រោមនោះមានលេខ  “២០០០០០” និង “200000” និងមានអក្សរ “អ្នកក្លែងក្រដាសប្រាក់នឹងត្រូវផ្តន្ទាទោសតាមច្បាប់” នៅគែមខាងក្រោម។ នៅគែមខាងស្តាំនៃក្រដាសប្រាក់ មានរូបភាពអង្គដៅចំណាំបោះពុម្ពតាមបន្ទាត់បញ្ឈរដែលឆ្លុះឃើញមានលេខ “200000”។

-ផ្នែកខាងឆ្វេង ខាងលើមានរូបព្រះសង្ហារនៃព្រះរាជាណាចក្រកម្ពុជា និងមានលេខ “200000” ព្រាលៗបោះពុម្ពតាមបន្ទាត់បញ្ឈរ ព្រមជាមួយបន្ទះហូឡូក្រាមទំហំ ១០ មម កាត់ទទឹងផ្ទៃក្រដាសប្រាក់ពីលើដល់ក្រោម។ នៅជ្រុងខាងក្រោមមានគំនូសបន្ទាត់សម្រាប់ផ្ទៀងផ្ទាត់ និងនិមិត្តសញ្ញាពិសេ សេសសម្គាល់ប្រភេទប្រាក់សម្រាប់ជនពិការភ្នែក។

គ-ថ្ងៃខាងខ្នង៖

– ផ្នែកកណ្តាល ត្រូវបានរំលេចឡើងនូវ ព្រះឆាយាល័ក្ខណ៍ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់គ្រឿងព្រះមហាក្សត្រ និងមានអក្សរ “ពីរសែនរៀល” នៅពីក្រោម និងអក្សរ “Congratulations on the 20^th Anniversary of the Coronation of His Majesty Preah Bat Samdech Preah Boromneath NORODOM SIHAMONI (29 October 2004-29 October 2024)” នៅគែមក្រដាសប្រាក់។

– ផ្នែកខាងស្តាំ ត្រូវបានរំលេចឡើងនូវរូបភាពប្រាសាទបាយ័នក្នុងខេត្តសៀមរាប និងមានលេខ “២០០០០០” នៅផ្នែកខាងក្រោម ព្រមជាមួយខ្សែសុវត្ថិភាពទំហំ ៣ មម នៅផ្នែកខាងឆ្វេង។ នៅជ្រុងលើខាងស្តាំមានលេខ “200000” ដែលត្រូវបានបោះពុម្ពតាមបន្ទាត់បញ្ឈរ។

– ផ្នែកខាងឆ្វេង ខាងលើមានអក្សរ “ធនាគារជាតិនៃកម្ពុជា” និងអក្សរ “NATIONAL BANK OF CAMBODIA” ខិតមកក្រោមមានចារឹកអក្សរ “អបអរសាទរខួប ២០ ឆ្នាំនៃការគ្រងរាជសម្បត្តិ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី (២៩ តុលា ២០០៤ – ២៩ តុលា ២០២៤) ព្រមទាំងលេខ “2024” នៅពីក្រោមនោះ។ នៅគែមខាងឆ្វេងនៃក្រដាសប្រាក់មានរូបភាពអង្គដៅចំណាំ បោះពុម្ពតាមបន្ទាត់បញ្ឈរ ដែលឆ្លុះឃើញលេខ “200000”។

ធនាគារជាតិកម្ពុជាបានបញ្ជាក់បន្ថែមថា ចាប់ពីថ្ងៃចេញប្រកាសនេះតទៅ ធនបត្រអនុស្សាវរីយ៍ប្រភេទ ២០០០០០ រៀល ត្រូវបានដាក់ឱ្យចរាចរទន្ទឹមគ្នាជាមួយនឹងធនបត្រជាតិប្រភេទផ្សេងៗទៀត ដែលត្រូវបានចេញផ្សាយកន្លងមក។

ធនាគារជាតិក៏បានដាស់តឿនដល់សាធារណជនគ្រប់រូប ត្រូវពិនិត្យនិងសម្គាល់ធនបត្រថ្មីនេះឱ្យបានច្បាស់លាស់ ដើម្បីជៀសវាងការភាន់ច្រឡំ៕