រដ្ឋមន្ត្រីក្រសួងព័ត៌មានវាយតម្លៃខ្ពស់ ចំពោះសមាគមស្បែកជើង ក្នុងការជួយជំរុញកំណើនសេដ្ឋកិច្ចកម្ពុជា
លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានកោតសរសើរនិងវាយតម្លៃខ្ពស់ចំពោះ សមាគមស្បែកជើងកម្ពុជាដែលបានដើរតួនាទីយ៉ាងសំខាន់ ជាមួយរាជរដ្ឋាភិបាលកម្ពុជាក្នុងការជំរុញកំណើនសេដ្ឋកិច្ចកម្ពុជា តាមរយៈការបង្កើតឱកាសការងារដ៏សម្បូរបែបជូនប្រជាពលរដ្ឋ។
លោក នេត្រ ភក្ត្រា រដ្ឋមន្ត្រីក្រសួងព័ត៌មាន
លោក នេត្រ ភក្ត្រា ថ្លែងបែបនេះក្នុងឱកាសអញ្ជើញជាអធិបតីក្នុងពិធីពិសាអាហារសាមគ្គីមហាគ្រួសាររបស់សមាជិកសមាគមស្បែកជើងកម្ពុជាកាលពីល្ងាចថ្ងៃទី១៩ ខែតុលា ឆ្នាំ២០២៤ នៅ NagaWorld I រាជធានីភ្នំពេញ។
អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជាបានឱ្យដឹងថា រហូតមកដល់ឆ្នាំ២០២៤នេះ សមាគមស្បែកជើងកម្ពុជាបានបង្កើតឡើងរយៈពេល ៥ ឆ្នាំមកហើយ ដោយសមាគមសម្រេចបានសមិទ្ធផលជាច្រើនក្នុងការរួមចំណែកជំរុញការអភិវឌ្ឍវិស័យផលិតស្បែកជើងនៅកម្ពុជា និងបានចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចកម្ពុជា តាមរយៈការបង្កើតឱកាសការងារជាង ១៤ ម៉ឺនកន្លែងជូនប្រជាពលរដ្ឋកម្ពុជា។ ទន្ទឹមនឹងនេះ សមាគមស្បែកជើងកម្ពុជាបានអភិវឌ្ឍខ្លួនឥតឈប់ឈរនិងសម្រេចបាននូវភាពរីកចម្រើននានា ជាពិសេសការរួមចំណែកក្នុងវិស័យឧស្សាហកម្មស្បែកជើងនៅកម្ពុជាក្នុងការលើកកម្ពស់ការអភិវឌ្ឍវិស័យឧស្សាហកម្ម និងការលើកកម្ពស់ការប្រកួតប្រជែងទីផ្សារ។
អ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា
លោក លី ឃុនថៃ បានឱ្យដឹងទៀតថា កាលពីឆ្នាំ២០២៣ ទំហំនាំចេញស្បែកជើងសរុបមានចំនួន លើសពី ១,៣ ប៊ីលានដុល្លារអាម៉េរិក ហើយចាប់ពីខែមករាដល់ខែកញ្ញា ឆ្នាំ២០២៤នេះ ទំហំនាំចេញសម្រេចបាន ១,២ ប៊ីលានដុល្លារអាម៉េរិក មានការកើនឡើងជាង២០%បើធៀបទៅនឹងរយៈពេលដូចគ្នានៃឆ្នាំ២០២៣។ លទ្ធផលទាំងនេះអាចសម្រេចទៅបានដោយផ្តើមចេញពីការខិតខំប្រឹងប្រែងរួមគ្នារបស់សមាជិកនៃសមាគម ការរក្សាទំនាក់ទំនងជិតស្និទ្ធរវាងអ្នកវិនិយោគជាដៃគូក្នុងទីផ្សារជាតិនិងអន្តរជាតិ ជាពិសេសគឺការគាំទ្រយ៉ាងពេញទំហឹងពីរាជរដ្ឋាភិបាលកម្ពុជា។ បើទោះបីស្ថិតក្នុងភាពមិនប្រាកដប្រជានៃវិបត្តិសកលយ៉ាងណាក្តី ប៉ុន្តែយើងនៅតែមានឱកាសក្នុងការអភិវឌ្ឍខ្លួន ហើយយើងនៅតែមានជំនឿចិត្តយ៉ាងមុតមាំថា ឧស្សាហកម្មស្បែកជើងនៅកម្ពុជាមិនត្រឹមតែអាចឈានមុខនៅក្នុងទីផ្សារក្នុងតំបន់ប៉ុណ្ណោះទេ ថែមទាំងមានភាពលេចធ្លោនៅលើពិភពលោកផងដែរ។
អ្នកឧកញ៉ា លី ឃុនថៃ បានគូសបញ្ជាក់បន្ថែមថា ថ្ងៃនេះយើងមិនត្រឹមតែប្រារព្ធការអបអរសាទរចំពោះសមិទ្ធផលក្នុងរយៈពេល ៥ ឆ្នាំកន្លងមកប៉ុណ្ណោះទេ ប៉ុន្តែថែមទាំងជាការបង្ហាញអំពីភាពរឹងមាំនិងភាពធន់នៃការអភិវឌ្ឍវិស័យឧស្សាហកម្មស្បែកជើងកម្ពុជានិងការអភិវឌ្ឍនាពេលអនាគត ហើយយើងរំពឹងថា ក្រោមការចូលរួមជំរុញនិងបន្តគាំទ្រពីរាជរដ្ឋាភិបាលកម្ពុជា ព្រមទាំងការខិតខំប្រឹងប្រែងរួមគ្នារបស់សមាជិកសមាគមទាំងអស់គ្នា ឧស្សាហកម្មស្បែកជើងកម្ពុជានឹងបន្តសម្រេចបាននូវភាពជោគជ័យថ្មីៗជាច្រើនបន្ថែមទៀត និងចូលរួមជំរុញដល់កំណើនសេដ្ឋកិច្ចកម្ពុជាឱ្យកាន់តែខ្ពស់ឡើងថែមទៀត។ សមាគមស្បែកជើងកម្ពុជាប្តេជ្ញាបន្តការលើកស្ទួយឧស្សាហកម្ម ស្បែកជើងនៅកម្ពុជាឱ្យកាន់តែមានភាពល្បីល្បាញទាំងក្នុងតំបន់និងនៅលើទីផ្សារអន្តរជាតិ។
រដ្ឋមន្ត្រីក្រសួងព័ត៌មាន លោក នេត្រ ភក្ត្រា ក៏បានលើកឡើងថា វិស័យកម្មន្តសាលដែលមានរួមទាំងការផលិតផលិតផលស្បែកជើងផងដែរនោះ បានបង្ហាញពីភាពខ្លាំងរបស់ខ្លួនដោយទទួលបាននូវកំណើនប្រមាណ២០% ស្មើនឹងទំហំទឹកប្រាក់ប្រមាណ ១៥,៦ ប៊ីលានដុល្លារអាម៉េរិក ដែលនេះបានបង្ហាញពីការរីកចម្រើនក្នុងវិស័យផលិតស្បែកជើងនៅកម្ពុជា។
លោកបានលើកទឹកចិត្តឱ្យអ្នកវិនិយោគពីប្រទេសនានាមកបន្តបោះទុនវិនិយោគបន្ថែមទៀតនៅកម្ពុជា ដើម្បីចាប់យកឱកាសនិងអត្ថប្រយោជន៍នានាដែលរាជរដ្ឋាភិបាលកម្ពុជាបានផ្តល់ជូន តាមរយៈច្បាប់វិនិយោគថ្មីដែលទើបនឹងអនុម័តដាក់ឱ្យអនុវត្តនាឆ្នាំកន្លងទៅ។
លោកបានគូសបញ្ជាក់ថា ទំនិញនិងផលិតផលទាំងអស់ដែលផលិតនៅកម្ពុជា អាចនាំចេញទៅទីផ្សារដែលមានប្រជាជនប្រមាណ ២៥០ លាននាក់នៅក្នុងមហាអនុតំបន់មេគង្គនិងប្រមាណ ៦៣០ លាននាក់នៅក្នុងតំបន់អាស៊ាន។ រីឯកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ បានផ្តល់លទ្ធភាពឱ្យកម្ពុជាអាចនាំចេញទៅក្នុងទីផ្សារដែលមានប្រជាជនរហូតដល់ទៅ ២,២ ប៊ីលាននាក់ ស្មើនឹង៣០%នៃចំនួនប្រជាជនសរុបនៅទូទាំងពិភពលោក ហើយមានចំនួនទឹកប្រាក់សរុបប្រមាណ ២៦,៦ ទ្រីលានដុល្លារនៃផលិតផលក្នុងស្រុកសរុបរបស់ពិភពលោក និងប្រមាណ ១២,៧ ទ្រីលានដុល្លារនៃទំហំពាណិជ្ជកម្មសរុបក្នុងពិភពលោក។
លោក នេត្រ ភក្ត្រា ជឿជាក់ថា កម្មវិធីជួបជុំគ្នានាឱកាសនេះ នឹងចូលរួមផ្សព្វផ្សាយនិងចែករំលែកអំពីឱកាសវិនិយោគនៅកម្ពុជាទៅដល់បណ្តាក្រុមហ៊ុននិងវិនិយោគិនបរទេសផ្សេងទៀតដែលមានបំណងចង់ចូលមកបោះទុនវិនិយោគនៅកម្ពុជា ជាពិសេសការវិនិយោគលើការបើករោងចក្រផលិតស្បែកជើង និងរោងចក្រផលិតផលិតផលផ្សេងៗទៀត៕
评论被关闭。