សម្តេចធិបតី ហ៊ុន ម៉ាណែត ចូលរួមបិទការប្រកួតកីឡាយុទ្ធគុនចម្រុះខ្មែរបុរាណលើកទី១
ព្រឹត្តិការណ៍ប្រកួត «យុទ្ធគុនចម្រុះបរាណខ្មែរពានរង្វាន់សម្តេចធិបតី» រយៈពេល ៣ ថ្ងៃ (១៨-២០តុលា) បានបិទបញ្ចប់ដោយជោគជ័យនាល្ងាចថ្ងៃទី២០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិករាជធានីភ្នំពេញ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
សម្តេចធិបតី ហ៊ុន ម៉ាណែត បានចាត់ទុកការរៀបចំព្រឹត្តិការណ៍ប្រកួតយុទ្ធគុនចម្រុះខ្មែរបុរាណ លើកទី១ ឆ្នាំ២០២៤នេះ គឺបានធ្វើឱ្យសុបិនក្លាយជាការពិត បន្ទាប់ពីសម្តេចធិបតីមានបំណង ចង់ឲ្យមានព្រឹត្តិការណ៍ប្រកួតកីឡាអត្តសញ្ញាណខ្មែរ ជាច្រើនឆ្នាំកន្លងទៅហើយ។ តាមរយៈព្រឹត្តិការណ៍នេះ ធ្វើឱ្យយើងបានឃើញឡើងវិញនូវមរតកយុទ្ធគុនបុរាណខ្មែរ ក្បួនយុទ្ធគុន យុទ្ធសិល្ប៍ ក៏ដូចជាយុទ្ធោបករណ៍បុរាណមួយចំនួន។
សម្តេចធិបតីបានលើកទឹកចិត្តដល់កីឡាករ កីឡាការិនី និង អ្នកពាក់ព័ន្ធទាំងអស់ ឱ្យបន្តគាំទ្រ និងផ្សព្វផ្សាយពីយុទ្ធគុនបុរាណខ្មែរ ឱ្យបានល្បីល្បាញទាំងក្នុងស្រុក និងលើឆាកអន្តរជាតិ ដើម្បីបន្តរក្សាមរតកដូនតាខ្មែរជានិច្ចនិរន្តរ៍។
សម្តេចធិបតីក៏បានផ្តល់កិត្តិយសផ្តល់ពាន និងប្រាក់រង្វាន់ដល់កីឡាករ កីឡាការិនី ដែលជាម្ចាស់ជ័យលាភីក្នុងឱកាសនៃពិធីបិទនេះផងដែរ។
សូមរម្លឹកថា ការប្រកួតកីឡាយុទ្ធគុនចម្រុះខ្មែរបុរាណលើកទី១ នេះ មានកីឡាករ និងកីឡាការិនីចូលរួមសរុបជិត ៥០០ នាក់ ដោយប្រកួតក្នុងប្រភេទកីឡាយុទ្ធគុនខ្មែរបុរាណ ដូចជាប្រដាល់គុនខ្មែរ គុនល្បុក្កតោ យុទ្ធក្រមខម គុនចម្រុះ គុនចំបាប់ ខ្លាក្រាប ក្រពើហា ស្រង៉ែពែន និង ក្រុមយុទ្ធគុនកងយោធពលខេមរភូមិន្ទជាដើម។
សម្រាប់ប្រាក់រង្វាន់ការប្រកួតអាជីព៖ ជ័យលាភីមេដាយមាស ទទួលបានប្រាក់រង្វាន់ ១២ លានរៀល មេដាយប្រាក់ទទួលបាន ៨ លានរៀល និង មេដាយសំរិទ្ធទទួលបាន ៤ លានរៀល។
ប្រាក់រង្វាន់ស្ម័គ្រចិត្ត៖ ជ័យលាភីមេដាយមាស ទទួលបានប្រាក់រង្វាន់ ៨ លានរៀល មេដាយប្រាក់ទទួលបាន ៦ លានរៀល និង មេដាយសំរិទ្ធទទួលបាន ៤ លានរៀល។
ដោយឡែក សម្រាប់អត្តពលិកឆ្នើមនិងអាជ្ញាកណ្តាលឆ្នើមទទួលបានពាន ១ និងម៉ូតូ១គ្រឿង៕
评论被关闭。