១៦៥ គម្រោងក្នុងខេត្តព្រះសីហនុទទួលបានគោលការណ៍លើកទឹកចិត្តពិសេស
បន្ទាប់ពីរាជរដ្ឋាភិបាលកម្ពុជាប្រកាសដាក់ឱ្យអនុវត្តជាផ្លូវការ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» កាលថ្ងៃទី៣១ ខែមករា ឆ្នាំ២០២៤ គិតត្រឹមខែតុលា ឆ្នាំ២០២៤ ខេត្តព្រះសីហនុមានគម្រោងសរុបចំនួន ១៦៥ ទទួលបានគោលការណ៍លើកទឹកចិត្តពិសេស។
គម្រោងទាំង ១៦៥ នេះរួមមានគម្រោងខ្នាតមីក្រូ តូច មធ្យម និង ធំ របស់ម្ចាស់គម្រោង និងក្រុមហ៊ុនងស្រុកនិងបរទេស ដែលមានវិសាលភាពនៅគ្រប់ក្រុងស្រុកនៃខេត្តព្រះសីហនុ ក្នុងនោះគម្រោងដែលមានទុនវិនិយោគលើសពី ១០០ លានដុល្លារអាម៉េរិកមានចំនួន ២៣ គម្រោង។ ក្នុងនោះដែរ គម្រោងពាក់ព័ន្ធនឹងអគារជាប់គាំងមានចំនួន៨៥ គម្រោងថ្មីមានចំនួន៦១ ការពង្រីកគម្រោងមានចំនួន១៥ និង គម្រោងមានស្រាប់ចំនួន៤។
គម្រោងទាំងនេះ ក៏រាប់បញ្ចូលគម្រោងដែលមានសក្តានុពលសំខាន់ៗ ដូចជាគម្រោងផលិតផ្ទាំងសូឡា និងគ្រឿងបង្គុំ គម្រោងមជ្ឈមណ្ឌលពាណិជ្ជកម្ម និង គម្រោងសួនកសិ-ឧស្សាហកម្មជាដើម។
កាលពីថ្ងៃទី២៤ ខែតុលា ឆ្នាំ២០២៤ លោក ហ៊ាន សាហ៊ីប ប្រធានក្រុមការងារជំរុញការវិនិយោគក្នុងខេត្តព្រះសីហនុ បានបើកកិច្ចប្រជុំលើកទី១១ ដើម្បីពិនិត្យគម្រោងវិនិយោគ និងធុរកិច្ចដែលបានស្នើការលើកទឹកចិត្ត ការអនុគ្រោះ និង ការសម្រួលនីតិវិធី ក្នុងក្របខណ្ឌ “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤”។
កិច្ចប្រជុំនេះ បានសម្រេចឯកភាពជាគោលការណ៍ដល់គម្រោងវិនិយោគ និងធុរកិច្ចចំនួន ២៥ ទៀត ក្រោមទុនវិនិយោគសរុប ៩១៧ លានដុល្លារក្នុងខេត្តព្រះសីហនុ ដែលទទួលបានការលើកទឹកចិត្តពិសេស។ ក្នុងនោះគម្រោងពាក់ព័ន្ធ នឹងអគារជាប់គាំងមានចំនួន១២ គម្រោងថ្មីចំនួន១២ និង ការពង្រីកគម្រោងចំនួន១ ដែលមានទុនវិនិយោគសរុបចំនួន ៩១៧ លានដុល្លារ ដែលមានជាអាទិ៍ រោងចក្រផលិតសម្ភារបរិក្ខារតុបតែងលម្អគេហដ្ឋាន រោងចក្រផលិតកាបូប រោងចក្រផលិតសម្ភារពីក្រដាស អគារពហុមុខងារ អគារស្នាក់នៅរួម សណ្ឋាគារ ភោជនីយដ្ឋាន និង រមណីយដ្ឋាន។
មន្រ្តីក្រុមការងារជំរុញការវិនិយោគក្នុងខេត្តព្រះសីហនុបានឱ្យដឹងថា ចាប់តាំងពីពាក់កណ្តាលឆ្នាំ២០២៤ វិស័យឯកជនជាច្រើនកាន់តែយល់ដឹង និងបានសម្រេចចិត្តវិនិយោគក្នុងខេត្តព្រះសីហនុ ពិសេសរួមទាំងការវិនិយោគដែលតម្រង់ទិស ឬផ្តោតលើការវិនិយោគលើវិស័យនានាក្រៅពីកាស៊ីណូ៕
评论被关闭。