ការប្រកួតកីឡាជាតិលើកទី៤ និងកីឡាជនពិការជាតិលើកទី២ នឹងធ្វើពិធីបើកផ្លូវការនៅល្ងាចស្អែក នាពហុកីឡដ្ឋានជាតិអូឡាំពិក
ការប្រកួតកីឡាជាតិលើកទី៤ និងកីឡាជនពិការជាតិលើកទី២ ឆ្នាំ២០២៤ នឹងធ្វើពិធីបើកជាផ្លូវការនាល្ងាចថ្ងៃទី៣០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
នៅក្នុងពិធីបើកការប្រកួតកីឡាជាតិលើកទី៤ និងកីឡាជនពិការជាតិលើកទី២ ឆ្នាំ២០២៤នេះ នឹងមានការអុជកាំជ្រួច ការប្រគំតន្ត្រីដែលមានតារាចម្រៀងល្បីៗចូលរួម រួមទាំងទស្សនីយភាពកូរសមុទ្រទឹកដោះដែលរៀបចំដោយក្រសួងវប្បធម៌និងវិចិត្រសិល្បៈ និង ទស្សនីយភាពព្រលឹងយ័ន្ត ៨ ទិសមហាយុទ្ធគុនខ្មែរបុរាណ។
ដោយឡែក ព្រឹត្តិការណ៍កីឡាជាតិលើកទី៤ និងកីឡាជនពិការជាតិលើកទី២ ឆ្នាំ២០២៤ នឹងរៀបចំឡើងចាប់ពីថ្ងៃទី២៩ ខែតុលា ដល់ថ្ងៃទី៨ ខែវិច្ឆិកា ឆ្នាំ២០២៤ នៅតាមទីលានប្រកួតតាមវិញ្ញាសាក្នុងភូមិសាស្ត្ររាជធានីភ្នំពេញ ខេត្តកែប ស្វាយរៀង ព្រះសីហនុ និង ខេត្តកំពង់ឆ្នាំង។
ការប្រកួតកីឡាជាតិលើកទី៤មានកីឡាចំនួន ៣៦ ប្រភេទ ស្មើនឹង ៣២៨ វិញ្ញាសា រួមមានបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ (ប៉េងប៉ុង) ហែលទឹក តេក្វាន់ដូ ITF តេក្វាន់ដូ WTF ប៉េតង់ គុនដាវ គុនល្បុក្កតោ ប្រដាល់សកល យូដូ ចំបាប់ គុនខ្មែរ វាយកូនបាល់ កាយសម្ព័ន្ធ ទោចក្រយាន សូហ្វតិន្នីស សីដក់ វូស៊ូ ហុកគី ឃីកបុកស៊ីង កីឡារាំ ជឺជីតស៊ូ ទូកប្រពៃណី ទូកក្តោង លើកទម្ងន់ ប៊ីយ៉ានិងស្នូកឃ័រ ទ្រីយ៉ាថ្លុង វាយគុនគោល ម៉ូតូទឹក អុកចត្រង្គ និង កីឡាវ៉ូវីណាម។
រីឯការប្រកួតកីឡាជនពិការជាតិលើកទី២ មានកីឡាចំនួន ៧ ប្រភេទ ស្មើនឹង ៤៥ វិញ្ញាសា រួមមានអត្តពលកម្ម ហែលទឹក បាល់បោះ បាល់ទះអង្គុយ ប៊ូស្សា វាយកូនឃ្លីលើតុ និង អុក។
សម្រាប់ព្រឹត្តិការណ៍ប្រកួតកីឡាជាតិឆ្នាំ២០២៤នេះ មានប្រតិភូ កីឡាករ និង កីឡាការិនីសរុបចំនួន ៤៨៥០ នាក់ មកពី ២៥ រាជធានី-ខេត្ត និងក្រសួងចំនួន៣ គឺក្រសួងមហាផ្ទៃ ក្រសួងការពារជាតិ និង ក្រសួងសេដ្ឋកិច្ចនិងហិរញ្ញវត្ថុ។
ការប្រកួតកីឡាជាតិលើកទី៤ និងកីឡាជនពិការជាតិលើកទី២ ឆ្នាំ២០២៤នេះ ធ្វើឡើងក្នុងគោលដៅពង្រឹងបច្ចេកទេស សមត្ថភាព និង បទពិសោធន៍ ដើម្បីឆ្ពោះទៅធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩។ ការប្រកួតកីឡាជាតិនិងកីឡាជនពិការជាតិឆ្នាំ២០២៤នេះ ធ្វើឡើងក្រោមប្រធានបទ «កីឡាជាតិដើម្បីព្រែកជីកហ្វូណនតេជោ»។
កំណាត់ផ្លូវជាតិលេខ១នឹងបិទចរាចរណ៍រថយន្តដឹកទំនិញធុនធ្ងន់រយៈពេល ៣ ម៉ោងនៅថ្ងៃស្អែក
ដោយឡែក សម្រាប់ថ្ងៃទី៣០ ខែតុលា ឆ្នាំ២០២៤នេះ រដ្ឋបាលខេត្តកណ្ដាលនឹងបិទចរាចរណ៍រថយន្តដឹកទំនិញធុនធ្ងន់នៅលើកំណាត់ផ្លូវជាតិលេខ១ ចាប់ពីស្តុបបំបែកកន្លែងផ្លូវជាតិលេខ១កែងផ្លូវជាតិលេខ២១Bរហូតដល់គល់ស្ពានអ្នកលឿងត្រើយខាងលិច ចាប់ពីម៉ោង ១២:០០ នាទីថ្ងៃត្រង់ រហូតដល់ម៉ោង ៣ រសៀល ដើម្បីប្រារព្ធពិធីរត់ភ្លើងគប់ អបអរសាទរពិធីបើកកីឡាជាតិលើកទី៤ និងកីឡាជនពិការជាតិលើកទី២ ឆ្នាំ២០២៤ ដែលនឹងចាប់ផ្តើមរត់ពីទីតាំងបើកការដ្ឋានព្រែកជីកហ្វូណនតេជោ (ភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ផ្លូវជាតិលេខ១) ឆ្ពោះទៅកាន់ពហុកីឡដ្ឋានជាតិអូឡាំពិក។
សេចក្តីជូនដំណឹងរបស់រដ្ឋបាលខេត្តកណ្ដាលបានបញ្ជាក់បន្ថែមថា នៅពេលពិធីចាប់ផ្តើមនៅម៉ោង ២:០០ នាទីរសៀល ការធ្វើចរាចរណ៍នឹងត្រូវបិទទាំងស្រុងក្នុងរយៈពេល ១ ម៉ោង ចាប់ពីទីតាំងបើកការដ្ឋានព្រែកជីកហ្វូណនតេជោឆ្ពោះមកភ្នំពេញចម្ងាយ ១ គីឡូម៉ែត្រ បន្ទាប់មកនឹងបើកឱ្យចរាចរតែមួយចំហៀងផ្លូវរហូតដល់ពិធីត្រូវបានបញ្ចប់។
គួររម្លឹកថា ការប្រកួតកីឡាជាតិលើកទី៣ និងកីឡាជនពិការជាតិលើកទី១ បានធ្វើឡើងនៅថ្ងៃទី១៩-៣០ ខែវិច្ឆិកា ឆ្នាំ២០២២ ដែលពិធីបើកផ្លូវការធ្វើឡើងនៅថ្ងៃទី២១ ខែវិច្ឆិកា ឆ្នាំ២០២២ នៅពហុកីឡដ្ឋានជាតិមរតកតេជោ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីកម្ពុជា៕
评论被关闭。