សម្តេចតេជោ ហ៊ុន សែន ជួបសំណេះសំណាល និងពិសាភោជនាហារសាមគ្គីជាមួយក្រុមកីឡាបាល់ទាត់តារាកម្ពុជា និងក្រុមកីឡាប្រដាល់គុនខ្មែរ
នៅល្ងាចថ្ងៃទី១ ខែវិច្ឆិកា ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានជួបសំណេះសំណាល និងពិសាភោជនាហារសាមគ្គីជាមួយក្រុមកីឡាបាល់ទាត់តារាកម្ពុជា និងក្រុមកីឡាប្រដាល់គុនខ្មែរ នៅមជ្ឈមណ្ឌលសន្និបាតនិងពិព័ណ៌ជ្រោយចង្វា។
សម្តេចតេជោ ហ៊ុន សែន បានសម្តែងនូវការអបអរសាទរចំពោះការប្រកួតរបស់កីឡាករបាល់ទាត់គុនខ្មែរ ដែលទទួលបានថវិការហូតដល់ប្រមាណ ១ ប៊ីលានរៀល (ប្រមាណ ២៥ ម៉ឺនដុល្លារអាម៉េរិក) កាលពីពេលកន្លងទៅនេះ។
សម្ដេចតេជោមានប្រសាសន៍ទៀតថា កីឡាគុនខ្មែរយើងបច្ចុប្បន្ននេះកំពុងមានការរីកចម្រើន ប៉ុន្តែការរីកចម្រើននេះបានប្រមូលផ្តុំនៅតែរាជធានីភ្នំពេញតែប៉ុណ្ណោះ កីឡាគុនខ្មែរនឹងរីកចម្រើនលូតលាស់ជាងនេះនាពេលខាងមុខ បើសិនជាមានការគាំទ្រឱ្យបានដិតដល់ជាងនេះទៀត។
សម្តេចតេជោក៏បានលើកឡើងអំពីការផ្គូរផ្គងកីឡាករឱ្យប្រកួតរាល់សប្តាហ៍ពេក នឹងធ្វើឱ្យខូចកីឡាករនិងឆាប់ចុះខ្សោយកម្លាំង ដូច្នេះអ្នកគ្រប់គ្រងកីឡាករប្រដាល់ទាំងអស់ត្រូវបន្តយកចិត្តទុកដាក់លើការផ្គូរផ្គងកីឡាករ មិនអាចផ្គូរផ្គងឱ្យប្រកួតរាល់សប្តាហ៍នោះទេ មិនអាចចេះតែធ្វើតាមចំណង់ចំណូលចិត្តនោះឡើយ។
សម្តេចតេជោ ហ៊ុន សែន បានស្នើឱ្យមានការពិចារណាជួយគាំទ្រការបណ្តុះបណ្តាលតាមបណ្តាក្លិបគុនខ្មែរនៅតាមខេត្តនានាទូទាំងប្រទេស តាមរយៈការជួយឧបត្ថម្ភគាំទ្រដល់ក្លិបគុនខ្មែរនានា ដើម្បីផ្ដល់ជាកម្លាំងចិត្តដល់កីឡាករ និងដើម្បីភាពរីកចម្រើននៃកីឡាគុនខ្មែរនាពេលខាងមុខ។
សម្តេចតេជោបានសង្កត់ធ្ងន់ថា កីឡាករមិនត្រូវបោះបង់ចោលការសិក្សាព្រោះតែហ្វឹកហាត់កីឡានោះទេ គឺត្រូវតែបន្តការសិក្សាឱ្យបានជាប់លាប់ ដើម្បីជាប្រយោជន៍នាពេលអនាគត៕
评论被关闭。