លោកស្រី ជា សិរី៖ សហគ្រាសធុនតូច និងមធ្យមជាតួអង្គសំខាន់ ក្នុងការជំរុញសកម្មភាពសេដ្ឋកិច្ចកម្ពុជាក្រោយវិបត្តិសុខភាពសកល
ទេសាភិបាលធនាគារជាតិ នៃកម្ពុជា លោកស្រីបណ្ឌិត ជា សិរី បានអះអាងថា សហគ្រាសធុនតូចនិងមធ្យម (SMEs) គឺជាតួអង្គយ៉ាងសំខាន់ក្នុងការជំរុញកំណើនសេដ្ឋកិច្ចរបស់កម្ពុជា ក្រោយពីការរីករាលដាលនៃជំងឺកូវីដ-១៩។
លោកស្រី ជា សិរី លើកឡើងបែបនេះនៅក្នុងកិច្ចពិភាក្សាស្តីពី «កិច្ចគាំពារឆ្អឹងខ្នងនៃសេដ្ឋកិច្ច៖ ការជំរុញកំណើនសហគ្រាសធុនតូច និងមធ្យមជាសកលតាមរយៈនវានុវត្តន៍ឌីជីថល» ក្នុងពិព័រណ៌បច្ចេកវិទ្យាហិរញ្ញវត្ថុសិង្ហបុរី (Singapore Fintech Festival) នៅប្រទេសសិង្ហបុរី នាថ្ងៃទី៧ ខែវិច្ឆិកា ឆ្នាំ២០២៤។
នៅក្នុងពិធីនោះ លោកស្រី ជា សិរី បានថ្លែងអំពីវឌ្ឍនភាព និងសសរស្តម្ភនៃសេដ្ឋកិច្ចកម្ពុជា ព្រមទាំងបានរំលេចពីតួនាទីកាន់តែសំខាន់របស់ SMEs ក្នុងការជំរុញកំណើនក្រោយវិបត្តិកូវីដ-១៩។ ទន្ទឹមនឹងនេះ លោកស្រីក៏បានលើកឡើងពីកត្តាប្រឈមដែល SMEs បាននិងកំពុងជួបប្រទះ ដូចជាលទ្ធភាពមានកម្រិតក្នុងការទទួលបានហិរញ្ញប្បទាន និងសម្ពាធប្រកួតប្រជែងកាន់តែខ្លាំងក្នុងការពង្រីកប្រតិបត្តិការ ស្របពេលកំណើន នៃវិស័យទេសចរណ៍នៅមានកម្រិតនៅឡើយ។
លោកស្រី ជា សិរី ក៏បានបង្ហាញពីគំនិតផ្តួចផ្តើមនានារបស់រាជរដ្ឋាភិបាល និងធនាគារជាតិនៃកម្ពុជា ក្នុងការលើកកម្ពស់ការអភិវឌ្ឍវិស័យ SMEs ដូចជាការលើកកម្ពស់បរិយាកាសធុរកិច្ច ការបង្កើនលទ្ធភាពទទួលបានហិរញ្ញប្បទាន និងកិច្ចសហប្រតិបត្តិការល្អប្រសើរក្នុងការអភិវឌ្ឍ និងតភ្ជាប់ប្រព័ន្ធទូទាត់កម្ពុជាជាមួយបណ្តាប្រទេសក្នុងតំបន់ និងពិភពលោក។
កន្លងមកនេះ រាជរដ្ឋាភិបាលកម្ពុជាបានយកចិត្តទុកដាក់ខ្ពស់ក្នុងការជំរុញបរិយាកាសគាំទ្រដល់សហគ្រាសធុនមីក្រូ តូច និង មធ្យម (MSMEs) ដែលដើរតួនាទីសំខាន់ក្នុងការលើកម្ពស់កំណើនសេដ្ឋកិច្ច និងបង្កើតការងារ ជាពិសេសនៅពេលដែលការរីករាលដាល នៃជំងឺកូវីដ-១៩ បណ្តាសហគ្រាសទាំងនេះបានដើរតួនាទីយ៉ាងសំខាន់ក្នុងការចូលរួមជំរុញសកម្មភាពសេដ្ឋកិច្ច។ រាជរដ្ឋាភិបាលកម្ពុជាចាត់ទុកវិស័យឯកជនគឺជាឆ្អឹងខ្នងសេដដ្ឋកិច្ចជាតិ ហើយវាជាកត្តាចាំបាច់ដែលយើងត្រូវធ្វើការរួមគ្នា ដើម្បីកំណត់និងដោះស្រាយបញ្ហាប្រឈមនានាដែលរារាំង
រាជរដ្ឋាភិបាលកម្ពុជាលើកទឹកចិត្ត SMEs ត្រូវតែស្វែងរកលក្ខណៈពិសេសរបស់ខ្លួន ព្រោះនៅថ្ងៃខាងមុខ ការប្រកួតប្រជែងនឹងមិនធូរជាងបច្ចុប្បន្នទេ ដូច្នេះ SMEs ត្រូវបង្កើតលក្ខណៈពិសេសសម្រាប់ផលិតផលរបស់ខ្លួន ទាំងលើគុណភាព រសជាតិ ការប្រើប្រាស់វត្ថុធាតុដើមក្នុងស្រុក លទ្ធភាពស្វែងរកប្រភពដើម និង ការអនុវត្តគោលការណ៍ការពារបរិស្ថានជាដើម៕
评论被关闭。