គម្រោងសួនឧស្សាហកម្មវាយនភណ្ឌបៃតងកម្ពុជាខេត្តកំពង់ស្ពឺ បើកការដ្ឋានសាងសង់ជាផ្លូវការ
គម្រោងសួនឧស្សាហកម្មវាយនភណ្ឌបៃតងកម្ពុជា ស្ថិតនៅក្នុងភូមិឈើនាង ឃុំតាំងស្យា ស្រុកភ្នំស្រួច ខេត្តកំពង់ស្ពឺ បានធ្វើពិធីបញ្ចុះបឋមសិលាបើកការដ្ឋានសាងសង់ជាផ្លូវការនៅព្រឹកថ្ងៃទី៨ ខែវិច្ឆិកា ឆ្នាំ ២០២៤ ក្រោមវត្តមានលោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ លោក ជាម ច័ន្ទសោភ័ណ អភិបាលខេត្តកំពង់ស្ពឺ និងលោក John Yu ប្រធានក្រុមហ៊ុន Golden Intergrity International Investment Group ដែលជាក្រុមហ៊ុនម្ចាស់គម្រោង។
លោក ហេង សួរ បានឱ្យដឹងថា គម្រោងសួនឧស្សាហកម្មវាយនភណ្ឌបៃតងកម្ពុជាស្ថិតនៅលើផ្ទៃដីជាង ៥០០ ហិកតា ជាគម្រោងវិនិយោគសេដ្ឋកិច្ចយុទ្ធសាស្រ្ត ដែលនឹងផ្តល់ឱកាសឱ្យកម្ពុជាក្លាយជាមូលដ្ឋានផលិតកម្មនិងជាទីតាំងផ្គត់ផ្គង់ដ៏សំខាន់លើវិស័យឧស្សាហកម្ម បោះពុម្ព ជ្រលក់ពណ៌ និង អេឡិចកូប្លាតីងស្បែកក្នុងតំបន់អាស៊ាន។ គម្រោងនេះនឹងផ្តល់ការងារប្រមាណ ៥-៦ ម៉ឺនកន្លែងបន្ថែមទៀត។
លោកបន្ថែមថា ការទទួលបានការវិនិយោគគម្រោងដ៏ធំនេះ គឺបង្ហាញពីសក្តានុពលវិនិយោគរបស់ខេត្តកំពង់ស្ពឺ និងមានការគាំពារបានយ៉ាងល្អពីអាជ្ញាធរខេត្ត ជាពិសេសគឺស្របទៅនឹងគោលនយោបាយរបស់រាជរដ្ឋាភិបាលក្នុងការនាំយកការវិនិយោគនិងបង្កើតការងារឱ្យនៅជិតមូលដ្ឋានរស់នៅរបស់ប្រជាពលរដ្ឋ។ លោកសង្ឃឹមថា អាជ្ញាធរនិងមន្ទីរពាក់ព័ន្ធនឹងមានកិច្ចសហការល្អជាមួយគ្នាដើម្បីធ្វើយ៉ាងណាឱ្យគម្រោងវិនិយោគនេះចេញជារូបរាង និងក្លាយជាទីតាំងដ៏សំខាន់ក្នុងវិស័យឧស្សាហកម្មនិងការវិនិយោគក្នុងខេត្តកំពង់ស្ពឺ និងជាគំរូមួយក្នុងការទាក់ទាញអ្នកវិនិយោគថ្មីៗទៀត។
ដោយឡែក នៅក្នុងពិធីបញ្ចុះបឋមសិលាបើកការដ្ឋានសាងសង់សួនឧស្សាហកម្មវាយនភណ្ឌបៃតងកម្ពុជានេះ ក៏មានពិធីចុះហត្ថលេខាលើអនុស្សារណៈនៃការយោគយល់គ្នារវាងវិទ្យាស្ថានពហុបច្ចេកទេសកម្ពុជាខេត្តកំពង់ស្ពឺ ជាមួយអង្គការ Yu Jianging Charity Organization for Education ដែលអនុស្សារណៈនេះមានគោលបំណងបង្កើតនូវកិច្ចសហប្រតិបត្តិការដើម្បីពង្រឹងគុណភាពនៃការអប់រំ និងបង្កើនសមត្ថភាពរបស់បុគ្គលិកនៃវិទ្យាស្ថាន និងជួយគាំទ្រដល់សិស្សនិស្សិតក្នុងខេត្តកំពង់ស្ពឺ តាមរយៈការផ្តល់ការបណ្តុះបណ្តាលនិងផ្តល់ធនធានពាក់ព័ន្ធនានាជូនដល់គ្រូបង្គោលនិងសិក្ខាកាមរបស់វិទ្យាស្ថាន៕
评论被关闭。