កម្ពុជាចាត់តាំងមន្រ្តីការទូត ៤ រូបទៅកាន់ជាឯកអគ្គរាជទូតនៅប្រទេសចំនួន ១០ ផ្សេងគ្នា
ព្រះរាជាណាចក្រកម្ពុជាបានចាត់តាំងមន្ត្រីការទូតចំនួន ៤ រូបដើម្បីទៅកាន់តួនាទីជាឯកអគ្គរាជទូតតំណាងកម្ពុជាប្រចាំប្រទេសចំនួន ១០ ផ្សេងគ្នា ហើយពួកគេនឹងចេញទៅបំពេញបេសកកម្មក្នុងពេលឆាប់ៗខាងមុខនេះ។
ឯកអគ្គរាជទូតទាំង ៤ រូប រួមមាន៖ (១) លោក កុយ គួង ពីឯកអគ្គរាជទូតកម្ពុជាប្រចាំប្រទេសឥណ្ឌា នឹងទៅកាន់តួនាទីជាឯកអគ្គរាជទូតកម្ពុជាប្រចាំសហរដ្ឋអាម៉េរិកនិងប្រទេសម៉ិចស៊ិចកូ។ (២) លោក ប្រាក់ ងួនហុង បច្ចុប្បន្នជារដ្ឋលេខាធិការក្រសួងការបរទេសនិងទំនាក់ទំនងអន្តរជាតិ នឹងទៅកាន់ជាឯកអគ្គរាជទូតកម្ពុជាប្រចាំប្រទេសប្រេស៊ីល។ (៣) លោកស្រី រត្ន ម៉ានី អនុរដ្ឋលេខាធិការក្រសួងការបរទេស នឹងទៅកាន់ជាឯកអគ្គរាជទូតកម្ពុជាប្រចាំប្រទេសឥណ្ឌា បង់ក្លាដេស ស្រីលង្កា អ៊ីរ៉ង់ នេប៉ាល់ និង ប្រទេសម៉ាលឌីវ។ (៤) លោក ចេង ម៉ានិត អគ្គនាយកនៃអគ្គនាយកដ្ឋានសហប្រតិបត្តិការអន្តរជាតិ នឹងទៅបំពេញតួនាទីជាឯកអគ្គរាជទូតកម្ពុជាប្រចាំប្រទេសមីយ៉ាន់ម៉ា។
មុនចេញបំពេញបេសកកម្មការទូតនៅលើឆាកអន្តរជាតិ ឯកអគ្គរាជទូតកម្ពុជាទាំង ៤ រូបបានចូលជួបសម្តែងការគួរសមជម្រាបលានិងទទួលអនុសាសន៍ពីសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា កាលពីព្រឹកថ្ងៃទី៨ ខែវិច្ឆិកា ឆ្នាំ២០២៤។
សម្តេច ឃួន សុដារី បានលើកឡើងថា ឯកអគ្គរាជទូតជាមន្រ្តីការទូតតំណាងឱ្យជាតិទំាងមូលនៅលើឆាកអន្តរជាតិ និងជាអ្នកដែលឈរនៅសមរភូមិជួរមុខក្នុងកិច្ចការពារគុណតម្លៃរបស់ជាតិនិងគោលបំណងជាយុទ្ធសាស្រ្តរបស់ជាតិ។ បេសកកម្មការទូតពិតជាមានសារៈសំខាន់ខ្លាំងណាស់បន្ថែមទៅលើកិច្ចខិតខំប្រឹងប្រែងខាងក្នុងប្រទេស ដើម្បីការពារនិងលើកកម្ពស់អត្តសញ្ញាណជាតិ កំណើនសេដ្ឋកិច្ចនិងស្ថិរភាពជាតិ។
សម្តេចប្រធានរដ្ឋសភារំពឹងថា ឯកអគ្គរាជទូតទាំង ៤ រូបនឹងបំពេញបេសកកម្មជូនប្រជាពលរដ្ឋនិងជាតិមាតុភូមិ សម្រេចបានលទ្ធផលធំធេង ហើយត្រូវគិតគូរនិងតម្កល់ប្រយោជន៍ជាតិជាធំនិងចំពោះមុខ ពោលគឺត្រូវរក្សា ការពារឯករាជ្យភាព អធិបតេយ្យភាព បូរណភាពទឹកដី និងលើកគុណតម្លៃជាតិនិងកិត្យានុភាពជាតិជានិច្ច ហើយត្រូវទប់ស្កាត់ព័ត៌មានក្លែងក្លាយទាំងឡាយណាដែលមានចេតនាអាក្រក់ចង់បំផ្លាញកេរ្តិ៍ឈ្មោះរបស់កម្ពុជា។
សម្តេច ឃួន សុដារី បានបញ្ជាក់បន្ថែមថា ត្រូវធ្វើយ៉ាងណាខិតខំពង្រឹងនិងពង្រីកទំនាក់ទំនងមិត្តភាព សាមគ្គីភាព និង សហប្រតិបត្តិការ ទាំងក្របខណ្ឌទ្វេភាគីនិងពហុភាគីឱ្យកាន់តែប្រសើរថែមទៀត និងត្រូវជំរុញការផ្សព្វផ្សាយអំពីភាពវិជ្ជមានរបស់ប្រទេសកម្ពុជាឱ្យបានទូលំទូលាយ សំដៅទាក់ទាញអ្នកវិនិយោគនិងអ្នកទេសចរមកកម្ពុជាឱ្យបានកាន់តែច្រើន។ មួយវិញទៀត ត្រូវយកចិត្តទុកដាក់និងជួយសម្របសម្រួលគាំទ្រដល់ប្រជាពលរដ្ឋ សិស្ស និង និស្សិតខ្មែរ ដែលកំពុងស្នាក់នៅ ធ្វើការ ឬ រៀនសូត្រនៅតាមបណ្តាប្រទេសដែលខ្លួនបានទៅបំពេញបេសកកម្ម ធ្វើយ៉ាងណាឱ្យពួកគាត់មានភាពកក់ក្តៅ៕
评论被关闭。