វត្តមានក្រុមហ៊ុនវិនិយោគបរទេសជាសក្ខីភាពបញ្ជាក់ពីសក្តានុពល និងបរិយាកាសធុរកិច្ចអំណោយផលរបស់កម្ពុជា
លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជាបានថ្លែងថា ការបណ្តាក់ទុនវិនិយោគរបស់ក្រុមហ៊ុនវិនិយោគបរទេសនៅកម្ពុជា គឺជាសក្ខីភាពមួយដែលសបញ្ជាក់យ៉ាងច្បាស់អំពីសក្តានុពល និងបរិយាកាសធុរកិច្ចប្រកបដោយអំណោយផលរបស់កម្ពុជា។
លោក ជា វុទ្ធី បានលើកឡើងបែបនេះ ក្នុងឱកាសបានចូលរួមជាអធិបតីក្នុងពិធីសម្ពោធដាក់ឱ្យដំណើរការរោងចក្រ របស់ក្រុមហ៊ុន Metal Jewelry Cambodia នៅតំបន់សេដ្ឋកិច្ចពិសេសរ៉ូយ៉ាល់គ្រុប ភ្នំពេញ នារសៀលថ្ងៃទី៩ ខែវិច្ឆិកា ឆ្នាំ២០២៤។
ទន្ទឹមនឹងការអបអរសាទរ និងថ្លែងអំណរគុណចំពោះក្រុមហ៊ុន Metal Jewelry Cambodia ដែលបានធ្វើការសម្រេចចិត្តជាយុទ្ធសាស្ត្រក្នុងការរួមបញ្ចូលកម្ពុជាក្នុងខ្សែច្រវាក់ផ្គត់ផ្គង់របស់ខ្លួន លោក ជា វុទ្ធី បានគូសបញ្ជាក់ថា ការបណ្តាក់ទុនវិនិយោគរបស់ក្រុមហ៊ុន Metal Jewelry Cambodia ក៏ដូចជាបណ្តាក្រុមហ៊ុនបរទេសដទៃទៀតនៅកម្ពុជា គឺជាសក្ខីភាពមួយសបញ្ជាក់យ៉ាងច្បាស់ថា កម្ពុជាមានកម្លាំងពលកម្មដ៏មានសក្តានុពល និងមានបរិយាកាសធុរកិច្ចប្រកដោយភាពអំណោយផល។ វត្តមានរបស់ក្រុមហ៊ុនមិនត្រឹមតែអាចជួយជំរុញសេដ្ឋកិច្ច និងចូលរួមបង្កើតការងារដែលមានបន្ថែមតម្លៃខ្ពស់ប៉ុណ្ណោះទេ ថែមទាំងរួមចំណែកដល់ការអភិវឌ្ឍឧស្សាហកម្មគ្រឿងអលង្ការរបស់របស់កម្ពុជា តាមរយៈការនាំមកនូវបច្ចេកវិទ្យាខ្ពស់និងសិល្បៈហត្ថកម្មកម្រិតស្តង់ដាពិភពលោកមកកាន់កម្ពុជាផងដែរ។
លោក ជា វុទ្ធី បន្ថែមថា ការជ្រើសរើសបោះទីតាំងវិនិយោគក្នុងតំបន់សេដ្ឋកិច្ចពិសេសនៅកម្ពុជារបស់ក្រុមហ៊ុន Metal Jewelry Cambodia ជាការសម្រេចចិត្តប្រកបដោយភាពវៃឆ្លាតនិងមានលក្ខណៈជាយុទ្ធសាស្ត្រ ព្រោះក្រុមហ៊ុនមិនត្រឹមតែអាចទទួលបាននូវអត្ថប្រយោជន៍ពីកញ្ចប់លើកទឹកចិត្តដែលមានភាពទាក់ទាញប៉ុណ្ណោះទេ ប៉ុន្តែក៏នឹងទទួលបាននូវកិច្ចសម្រួលនីតិវិធីរដ្ឋបាលដែលមានភាពរហ័សងាយស្រួល ប្រព័ន្ធបណ្តាញអគ្គិសនីដែលអាចជឿទុកចិត្តបាន បណ្តាញដឹកជញ្ជូនដ៏មានប្រសិទ្ធភាព និង បរិក្ខារភស្តុភារកម្មទំនើបៗ ដែលអាចជួយឱ្យប្រតិបត្តិការអាជីវកម្មរបស់ក្រុមហ៊ុនសម្រេចបាននូវប្រសិទ្ធផលនិងប្រាក់ចំណេញខ្ពស់ផងដែរ។
ក្រុមហ៊ុន Metal Jewelry Cambodia បានទទួលគោលការណ៍អនុញ្ញាឱ្យវិនិយោគបង្កើតរោងចក្រផលិតនិងបង្គុំគ្រឿងអលង្ការនិងគ្រឿងលម្អផ្សេងៗធ្វើពីលោហៈនិងប្លាស្ទិក កាលពីខែមិថុនា ឆ្នាំ២០២៣។ ម្ចាស់ភាគហ៊ុនរបស់ក្រុមហ៊ុន Metal Jewelry Cambodia គឺក្រុមហ៊ុន International Metal and Jewelry Co., Ltd ដែលជាក្រុមហ៊ុនមួយក្នុងចំណោមក្រុមហ៊ុនផលិតគ្រឿងអលង្ការនិងគ្រឿងលម្អម៉ាកល្បីនិងប្រណិតរបស់បារាំង (French Luxury Group)៕
评论被关闭。