ការប្រកួតកីឡាជាតិលើកទី៤ និងកីឡាជាតិជនពិការលើកទី២ បានបញ្ចប់ទៅដោយជោគជ័យ ក្រុមក្រសួងមហាផ្ទៃឈរលើកំពូលតារាងជាមួយមេដាយសរុប ២៤៧ គ្រឿង
ការប្រកួតកីឡាជាតិលើកទី៤ និងកីឡាជាតិជនពិការលើកទី២ បានបញ្ចប់ទៅដោយជោគជ័យ និងធ្វើពិធីបិទជាផ្លូវការនៅពហុកីឡដ្ឋានជាតិអូឡាំពិក កាលពីល្ងាចថ្ងៃទី៨ ខែវិច្ឆិកា ឆ្នាំ២០២៤ ក្រោមអធិបតីភាពរបស់លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និង កីឡា តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
ព្រឹត្តិការណ៍កីឡាជាតិលើកទី៤ និងកីឡាជនពិការជាតិលើកទី២ ឆ្នាំ២០២៤ ធ្វើឡើងក្រោមបុព្វបទ “កីឡាជាតិដើម្បីព្រែកជីកហ្វូណនតេជោ” បានរៀបចំឡើងចាប់ពីថ្ងៃទី២៩ ខែតុលា ដល់ថ្ងៃទី៨ ខែវិច្ឆិកា ឆ្នាំ២០២៤ នៅតាមទីលានប្រកួតតាមវិញ្ញាសាក្នុងភូមិសាស្ត្ររាជធានីភ្នំពេញ ខេត្តកែប ស្វាយរៀង ព្រះសីហនុ និង ខេត្តកំពង់ឆ្នាំង។
ការប្រកួតកីឡាជាតិលើកទី៤មានកីឡាចំនួន ៣៦ ប្រភេទ ស្មើនឹង ៣២៨ វិញ្ញាសា រួមមានបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ (ប៉េងប៉ុង) ហែលទឹក តេក្វាន់ដូ ITF តេក្វាន់ដូ WTF ប៉េតង់ គុនដាវ គុនល្បុក្កតោ ប្រដាល់សកល យូដូ ចំបាប់ គុនខ្មែរ វាយកូនបាល់ កាយសម្ព័ន្ធ ទោចក្រយាន សូហ្វតិន្នីស សីដក់ វូស៊ូ ហុកគី ឃីកបុកស៊ីង កីឡារាំ ជឺជីតស៊ូ ទូកប្រពៃណី ទូកក្តោង លើកទម្ងន់ ប៊ីយ៉ានិងស្នូកឃ័រ ទ្រីយ៉ាថ្លុង វាយគុនគោល ម៉ូតូទឹក អុកចត្រង្គ និង កីឡាវ៉ូវីណាម។ រីឯការប្រកួតកីឡាជនពិការជាតិលើកទី២ មានកីឡាចំនួន ៧ ប្រភេទ ស្មើនឹង ៤៥ វិញ្ញាសា រួមមានអត្តពលកម្ម ហែលទឹក បាល់បោះ បាល់ទះអង្គុយ ប៊ូស្សា វាយកូនឃ្លីលើតុ និង អុក។ មានមេដាយសរុបចំនួន ១២៤២ គ្រឿង ក្នុងនោះមេដាយមាសចំនួន ៣៧៤ គ្រឿង មេដាយប្រាក់ចំនួន ៣៧៤ និង មេដាយសំរឹទ្ធចំនួន ៤៩៤ គ្រឿង។
ឆ្លងកាត់ការប្រកួតដ៏ស្វិតស្វាញតាំងពីដើមដល់ចប់ ក្រុមក្រសួងមហាផ្ទៃឈរលើកំពូលតារាងជាមួយមេដាយសរុបចំនួន ២៤៧ គ្រឿង ខណៈរាជធានីភ្នំពេញឈរនៅលេខរៀងទី១១ ជាមួយមេដាយសរុបចំនួន ៥០ គ្រឿង ហើយខេត្តព្រះវិហារស្ថិតនៅបាតតារាង ដោយទទួលបានតែមេដាយសំរឹទ្ធិចំនួន ៣ គ្រឿង។ ខាងក្រោមជាលទ្ធផលផ្លូវការនៃការប្រកួតកីឡាជាតិលើកទី៤ និងកីឡាជាតិជនពិការលើកទី២៖
១. ក្រសួងមហាផ្ទៃ ២៤៧ គ្រឿង (មាស១២៧ ប្រាក់៧២ សំរឹទ្ធិ៤៨)
២. ក្រសួងការពារជាតិ ១៨៩ គ្រឿង (មាស៩១ ប្រាក់៥៦ សំរឹទ្ធិ៤២)
៣. ខេត្តកណ្តាល ១១០ គ្រឿង (មាស២៧ ប្រាក់២៩ សំរឹទ្ធិ៥៤)
៤. ក្រសួងសេដ្ឋកិច្ច ៤៩ គ្រឿង (មាស១៩ ប្រាក់១៤ សំរឹទ្ធិ១៦)
៥. ខេត្តស្ទឹងត្រែង ៥៣ គ្រឿង (មាស១២ ប្រាក់១៣ សំរឹទ្ធិ២៨)
៦. ខេត្តកែប ៣៤ គ្រឿង (មាស១២ ប្រាក់១០ សំរឹទ្ធិ១២)
៧. ខេត្តតាកែវ ២៥ គ្រឿង (មាស១២ ប្រាក់៥ សំរឹទ្ធិ៨)
៨. ខេត្តសៀមរាប ៦១ គ្រឿង (មាស៩ ប្រាក់២៤ សំរឹទ្ធិ២៨)
៩. ខេត្តកំពង់ឆ្នាំង ៤១ គ្រឿង (មាស៨ ប្រាក់១១ សំរឹទ្ធិ២២)
១០. ខេត្តព្រៃវែង ២៩ គ្រឿង (មាស៨ ប្រាក់៩ សំរឹទ្ធិ១២)
១១. រាជធានីភ្នំពេញ ៥០ គ្រឿង (មាស៧ ប្រាក់១៤ សំរឹទ្ធិ២៩)
១២. ខេត្តស្វាយរៀង ២៧ គ្រឿង (មាស៦ ប្រាក់១១ សំរឹទ្ធិ១០)
១៣. ខេត្តត្បូងឃ្មុំ ៣០ គ្រឿង (មាស៥ ប្រាក់១០ សំរឹទ្ធិ១៥)
១៤. ខេត្តកំពង់ចាម ៣១ គ្រឿង (មាស៤ ប្រាក់១២ សំរឹទ្ធិ១៥)
១៥. ខេត្តបាត់ដំបង ៣៣ គ្រឿង (មាស៤ ប្រាក់១១ សំរឹទ្ធិ១៨)
១៦. ខេត្តបន្ទាយមានជ័យ ២៧ គ្រឿង (មាស៤ ប្រាក់៦ សំរឹទ្ធិ១៧)
១៧. ខេត្តប៉ៃលិន ២៤ គ្រឿង (មាស៤ ប្រាក់៥ សំរឹទ្ធិ១៥)
១៨. ខេត្តព្រះសីហនុ ២២ គ្រឿង (មាស៣ ប្រាក់៨ សំរឹទ្ធិ១១)
១៩. ខេត្តពោធិ៍សាត់ ២០ គ្រឿង (មាស៣ ប្រាក់៧ សំរឹទ្ធិ១០)
២០. ខេត្តកំពង់ស្ពឺ ៤២ គ្រឿង (មាស២ ប្រាក់១៦ សំរឹទ្ធិ២៤)
២១. ខេត្តក្រចេះ ៩ គ្រឿង (មាស២ ប្រាក់៣ សំរឹទ្ធិ៤)
២២. ខេត្តកំពត ២៦ គ្រឿង (មាស១ ប្រាក់៨ សំរឹទ្ធិ១៧)
២៣. ខេត្តមណ្ឌលគិរី ២០ គ្រឿង (មាស១ ប្រាក់៧ សំរឹទ្ធិ១២)
២៤. ខេត្តកោះកុង ១៦ គ្រឿង (មាស១ ប្រាក់៦ សំរឹទ្ធិ៩)
២៥. ខេត្តកំពង់ធំ ១៣ គ្រឿង (មាស១ ប្រាក់៥ សំរឹទ្ធិ៧)
២៦. ខេត្តឧត្តរមានជ័យ ៥ គ្រឿង (មាស១ ប្រាក់១ សំរឹទ្ធិ៣)
២៧. ខេត្តរតនៈគិរី ៦ គ្រឿង (មាស០ ប្រាក់១ សំរឹទ្ធិ៥)
២៨. ខេត្តព្រះវិហារ ៣ គ្រឿង (មាស០ ប្រាក់០ សំរឹទ្ធិ៣)៕
评论被关闭。