ទំហំពាណិជ្ជកម្មកម្ពុជា-អន្តរជាតិកើនដល់ជាង ៤៥ ប៊ីលានដុល្លារក្នុងរយៈពេល ១០ ខែ
អគ្គនាយកដ្ឋានគយនិងរដ្ឋាករកម្ពុជា (GDCE) បានឱ្យដឹងនៅថ្ងៃទី១១ ខែវិច្ឆិកា ឆ្នាំ២០២៤នេះថា ក្នុងរយៈពេល ១០ ខែ (មករា-តុលា) ឆ្នាំ២០២៤ ទំហំពាណិជ្ជកម្មកម្ពុជា-អន្តរជាតិសម្រេចបានជាង ៤៥ ប៊ីលានដុល្លារអាម៉េរិក កើនឡើង១៦% បើធៀបនឹងរយៈពេលដូចគ្នាក្នុងឆ្នាំ២០២៣។
ទិន្នន័យរបស់ GDCE បានបង្ហាញថា ការនាំចេញទំនិញរបស់កម្ពុជាមានទំហំទឹកប្រាក់ ២១,៥៧ ប៊ីលានដុល្លារ កើនឡើង១៦% ឯការនាំទំនិញចូលមកវិញមានទំហំទឹកប្រាក់ ២៣,៤៩ ប៊ីលានដុល្លារ កើនឡើង១៧%។
បើតាមអ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជាបានឱ្យដឹងថា នៅក្នុងឆ្នាំ ២០២៤នេះ តម្រូវការបញ្ជាទិញនៅក្នុងវិស័យវាយនភណ្ឌកើនឡើងនៅទីផ្សារអន្តរជាតិ ដូចជាអាម៉េរិកនិងអឺរ៉ុប ធ្វើឱ្យការនាំចេញរបស់កម្ពុជាមានកំណើន។
កំណើននៃការនាំចេញរបស់កម្ពុជា គឺដោយសាររាជរដ្ឋាភិបាលកម្ពុជាអាចបំពេញតាមលក្ខខណ្ឌរបស់រដ្ឋាភិបាលនៃប្រទេសជាដៃគូដែលមានតម្រូវការ ហើយការបញ្ជាទិញពីកម្ពុជាផ្ដោតលើទំនិញកាត់ដេរ សម្លៀកបំពាក់ និង សម្ភារៈធ្វើដំណើរ ដែលមានស្បែកជើងជាដើម សុទ្ធតែជាទំនិញអាទិភាពដែលនាំទៅសហភាពអឺរ៉ុបនិងសហរដ្ឋអាម៉េរិក ហើយវាក៏ជាឆ្អឹងខ្នងសេដ្ឋកិច្ចកម្ពុជា។ ទន្ទឹមនឹងនេះ កំណើននៃការនាំចេញក៏អាស្រ័យលើទំនាក់ទំនងល្អរវាងកម្ពុជានិងអន្តរជាតិ ទំនាក់ទំនងល្អរវាងនិយោជកនិងអ្នកទទួលទិញនៅលើទីផ្សារអន្តរជាតិ គួបផ្សំនឹងគុណភាពទំនិញរបស់កម្ពុជាផងដែរ។
ដោយឡែក ការនាំចេញផលិតផលកសិកម្មក៏មានកំណើនផងដែរនៅឆ្នាំ២០២៤នេះ ខណៈកម្ពុជាមានកិច្ចព្រមព្រៀងទីផ្សារសេរីជាមួយបណ្ដាប្រទេសធំៗដែលជាដៃគូ ទាំងទ្វេភាគីនិងពហុភាគី ក្នុងនោះមានប្រទេសចិន ដែលបានទិញទំនិញកសិផលមួយចំនួនពីកម្ពុជា ដូចជាអង្ករ ស្វាយកែវរមៀត ចេកអំបូងលឿងជាដើម ខណៈការនាំចេញកសិផលរបស់កម្ពុជាទៅប្រទេសជិតខាងក៏មានកំណើនផងដែរ។
គួររម្លឹកថា ទំនិញដែលកម្ពុជានាំចេញទៅទីផ្សារអន្តរជាតិ រួមមានសម្លៀកបំពាក់ ស្បែកជើង ម៉ាស៊ីន និងឧបករណ៍អគ្គិសនី វត្ថុធាតុធ្វើអំពីស្បែក បរិក្ខារធ្វើពីរោមសត្វ ធុញ្ញជាតិ កៅស៊ូ និង ផលិតផលធ្វើអំពីកៅស៊ូនិងគ្រឿងសង្ហារិមជាដើម៕
评论被关闭。