សម្តេចធិបតី ហ៊ុន ម៉ាណែត វាយតម្លៃខ្ពស់ចំពោះមហាសន្និបាតសភាពាណិជ្ជកម្មត្រកូល លីន ពិភពលោក
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចាត់ទុកព្រឹតិ្តការណ៍មហាសន្និបាតត្រកូល លីន ពិភពលោកជាស្ពានធុរកិច្ចដ៏សំខាន់មួយសម្រាប់កម្ពុជា នឹងមានការប្រាស្រ័យទាក់ទងគ្នាដែលបង្កើតបាននូវការរួមបញ្ចូលគ្នានិងការតភ្ជាប់គ្នារវាងធុរកិច្ចនិងធុរកិច្ច ជាពិសេសរវាងប្រទេសកម្ពុជានិងប្រទេសចិន។
សម្តេចធិបតី ហ៊ុន ម៉ាណែត បានលើកឡើងបែបនេះ ក្នុងឱកាសដែលសម្តេចបានអញ្ជើញជាអធិបតីក្នុងពិធីសំណេះសំណាលនិងពិសាភោជនាហារសាមគ្គីជាមួយសហគ្រិនត្រកូល លីន ពិភពលោក ដែលមកពី ១៥ ប្រទេសនិង ៣៨ តំបន់ ដែលបានមកកម្ពុជាចូលរួមមហាសន្និបាតសភាពាណិជ្ជកម្មត្រកូល លីន ពិភពលោក កាលពីល្ងាចថ្ងៃទី១២ ខែវិច្ឆិកា ឆ្នាំ២០២៤ នៅមជ្ឈមណ្ឌលពិព័រណ៍កោះពេជ្រ រាជធានីភ្នំពេញ។
មានប្រសាសន៍ក្នុងឱកាសពិធីដ៏អធិកអធមនោះ សម្តេចធិបតី ហ៊ុន ម៉ាណែត បានលើកទ្បើងពីកត្តាទាក់ទាញដែលកម្ពុជាផ្តល់ជូនដល់ធុរកិច្ចនិងវិនិយោគបរទេស មានជាអាទិ៍៖
ទី១. ប្រទេសកម្ពុជាបានផ្តល់នូវបរិយាកាសសន្តិភាពនិងស្ថិរភាពជាកត្តាមូលដ្ឋាន ដែលអនុញ្ញាតឱ្យអ្នកវិនិយោគធ្វើការសម្រេចចិត្តអំពីទីតាំងដែលត្រូវវិនិយោគ។
ទី២. កម្ពុជាផ្តល់ជូននូវស្ថិរភាពម៉ាក្រូសេដ្ឋកិច្ច ដោយជាប់ចំណាត់ថ្នាក់ជាទីផ្សារដែលកំពុងរីកចម្រើនបំផុតសម្រាប់ការវិនិយោគបរទេសនៅឆ្នាំ២០២៤ ដែលនេះបានផ្តល់កំណើនផលិតផលក្នុងស្រុកសរុប (GDP) យ៉ាងរឹងមាំ អតិផរណាទាបជាង៣% និងការពង្រីកផ្នែកវិនិយោគដោយផ្ទាល់ពីបរទេស (FDI)។
ទី៣. កម្ពុជាមានបរិយាកាសធុរកិច្ចប្រកបដោយភាពស្និទ្ធស្នាលនិងឆ្លើយតបទៅនឹងវិនិយោគ។ ច្បាប់វិនិយោគរបស់កម្ពុជាមានលក្ខណៈសេរីជាមួយនឹងការលើកទឹកចិត្តចម្រុះ មានភាពបត់បែន និង មានការលើកទឹកចិត្តដល់អ្នកវិនិយោគ។
ទី៤. កម្ពុជាជាទីតាំងយុទ្ធសាស្ត្រនិងទទួលបានឱកាសអំពីកិច្ចព្រមព្រៀងពាណិជ្ជកម្មនានា។ ការវិនិយោគនៅកម្ពុជា គឺមិនត្រឹមតែវិនិយោគសម្រាប់ទីផ្សារប្រជាជន ១៧ លាននាក់ប៉ុណ្ណោះទេ ប៉ុន្តែជាការបើកឱកាសទៅកាន់តំបន់ផ្សេងទៀតលើពិភពលោក ដោយសារកម្ពុជាមានកិច្ចព្រមព្រៀងជាច្រើន រួមទាំងកិច្ចព្រមព្រៀងពាណិជ្ជកម្មសេរីជាមួយអាស៊ាន កម្ពុជា-ចិន កម្ពុជា-កូរ៉េ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ក៏ដូចជាការផ្តល់ជូនជាច្រើនទៀត និងការផ្តល់ជូនលើទីផ្សារនៅអឺរ៉ុបនិងប្រទេសដទៃទៀត ដូច្នេះការវិនិយោគនៅកម្ពុជាគឺជាការវិនិយោគទៅកាន់តំបន់ផ្សេងទៀតនៅលើពិភពលោក។
ទី៥. កម្ពុជាមានយុវជនថាមវន្តនិងប្រជាជននិយាយភាសាអង់គ្លេស។ ៦០%នៃចំនួនប្រជាជនកម្ពុជាមានអាយុក្រោម ៣៥ ឆ្នាំ។ ប្រទេសកម្ពុជាបានអនុវត្តកម្មវិធីបណ្តុះបណ្តាលបច្ចេកទេស វិជ្ជាជីវៈទូលំទូលាយសម្រាប់មនុស្សវ័យក្មេងចំនួន ១,៥ លាននាក់ នេះធានាថាកម្ពុជាមានសមត្ថភាពក្នុងការផ្តល់ជូនអាជីវកម្មនូវកម្លាំងពលកម្មដែលត្រៀមរួចជាស្រេចដើម្បីបំពេញតម្រូវការ។
ទី៦. កម្ពុជាមានហេដ្ឋារចនាសម្ព័ន្ធតភ្ជាប់ ដោយកម្ពុជាបាននិងកំពុងពង្រីកការតភ្ជាប់ហេដ្ឋារចនាសម្ព័ន្ធរបស់ខ្លួន ដើម្បីធ្វើសមាហរណកម្មនិងតភ្ជាប់បណ្តាញដឹកជញ្ជូនរបស់កម្ពុជាទៅនឹងច្រករបៀងសេដ្ឋកិច្ចសំខាន់ៗ ក៏ដូចជាការភ្ជាប់ទំនាក់ទំនងជាមួយប្រទេសជិតខាងនិងមជ្ឈមណ្ឌលនាំចេញសំខាន់ៗនៅក្នុងតំបន់។ ចំណែកឯសេដ្ឋកិច្ចបៃតងនិងឌីជីថល ជាតំបន់ថ្មីនិងជាអាទិភាពថ្មីរបស់រាជរដ្ឋាភិបាល ដោយរាជរដ្ឋាភិបាលបានប្តេជ្ញាចិត្តចំពោះថាមពលប្រកបដោយនិរន្តរភាព ជាមួយនឹងសក្តានុពលថាមពលពន្លឺព្រះអាទិត្យនិងវារីអគ្គិសនី។
ជាចុងក្រោយ សម្តេចធិបតី ហ៊ុន ម៉ាណែត ក៏បានសម្តែងនូវក្តីសង្ឃឹមនិងជឿជាក់ថា ព្រឹត្តិការណ៍មហាសន្និបាតត្រកូល លីន ពិភពលោកដ៏មានសារៈសំខាន់នេះ នឹងវិលត្រឡប់មកកម្ពុជាជាថ្មីម្តងទៀតនាពេលអនាគត៕
评论被关闭。