ព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក ចាប់ផ្តើមប្រារព្ធនៅភ្នំពេញ
ថ្ងៃនេះគឺជាថ្ងៃទីមួយនៃព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក ដែលប្រារព្ធឡើងរយៈពេល ៣ ថ្ងៃ (១៤-១៦ វិច្ឆិកា ២០២៤) នៅរាជធានីភ្នំពេញ។
សម្រាប់ទិដ្ឋភាពទូទៅនៅក្នុងថ្ងៃទីមួយនេះ ឃើញមានលោកតា លោកយាយ អ៊ំពូមីង បងប្អូន មកពីបណ្ដាខេត្តផ្សេងៗ រួមទាំងភ្ញៀវទេសចរបរទេស បានប្រមូលផ្តុំគ្នានៅតាមមាត់ទន្លេចតុមុខ រាជធានីភ្នំពេញ ដើម្បីដើរកម្សាន្ត និងទស្សនាការប្រណាំងទូក-ង និងស្តង់ពិព័រណ៍ផ្សេងៗជាច្រើន បង្កើតបានជាទិដ្ឋភាព និងបរិយាកាសយ៉ាងអធិកអធម និងសប្បាយរីករាយ។
យោងតាមគណៈកម្មការរៀបចំកម្មវិធីបានឱ្យដឹងថា ក្នុងឱកាសនៃព្រះរាជពិធីបុណ្យអុំទូក បណ្ដែតប្រទីប និង សំពះព្រះខែ អកអំបុក ឆ្នាំ២០២៤ នេះ មានទូក-ងចូលរួមប្រកួតសរុបចំនួន ៣៤៦ ទូក ក្នុងនោះមានជាប្រភេទទូកអុំ ទូកចែវ និង ទូកខ្នាតអន្តរជាតិ។
នាពេលល្ងាច បន្ទាប់ពីការប្រណាំងទូក-ងបានបញ្ចប់ ក៏មានការបណ្តែតប្រទីបរបស់បណ្តាក្រសួង-ស្ថាប័នរដ្ឋសរុបចំនួន ៣៦ ប្រទីប ជាមួយការអុជកាំជ្រួចយ៉ាងស្រស់ស្អាតផងដែរ។ ដោយឡែក នៅតាមសួនច្បារម្តុំមាត់ទន្លេនិងកោះពេជ្រក៏មានការប្រគំតន្ត្រីដែលមានតារាចម្រៀងនិងសិល្បករ សិល្បការិនីល្បីៗជាច្រើនផងដែរ៕
评论被关闭。