កម្មវិធីប្រកួតចម្រៀងចិន «ពានរង្វាន់ឯកអគ្គរដ្ឋទូត» ប្រចាំកម្ពុជា ឆ្នាំ២០២៤ បានបញ្ចប់ដោយជោគជ័យ
កម្មវិធីប្រកួតចម្រៀងចិន «ពានរង្វាន់ឯកអគ្គរដ្ឋទូត» ប្រចាំកម្ពុជា ឆ្នាំ២០២៤ បានបញ្ចប់ដោយជោគជ័យ ដោយវគ្គផ្តាច់ព្រ័ត្របានធ្វើឡើងនារសៀលថ្ងៃទី១៣ ខែវិច្ឆិកា ឆ្នាំ២០២៤ នៅរាជបណ្ឌិតសភាកម្ពុជា ក្រោមអធិបតីភាពលោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា និងលោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា។
បេក្ខជនឆ្នើមចំនួន ១៦ នាក់ក្នុងចំណោមបេក្ខជន ១១៨ នាក់ មកពីរាជធានី-ខេត្ត ក្រុងនានា បានចូលរួមក្នុងការប្រកួតនេះ។ បេក្ខជនទាំងអស់បានបកស្រាយបទចម្រៀងចិន ពីរោះនិងមានប្រជាប្រិយភាពខ្ពស់ ដែលជាការបង្ហាញនូវទេពកោសល្យ និងជាសមិទ្ធផលនៃការសិក្សាភាសាចិនផងដែរ។
ឆ្លងកាត់ការប្រកួតយ៉ាងស្វិតស្វាញ ជាលទ្ធផល បេក្ខជន ម៉ា លីនណា មកពីសាលារៀន ទួនហ្វា បានទទួលជ័យលាភីលេខ១ ក្នុងការប្រកួតចម្រៀងចិន «ពានរង្វាន់ឯកអគ្គរដ្ឋទូត» ប្រចាំកម្ពុជា ឆ្នាំ២០២៤ នេះ។
លោក វ៉ាង វិនពីន បានបញ្ចាក់ថា បទចម្រៀងចិនមានបង្កប់នូវមនោសញ្ចេតនា និងផ្នត់គំនិតរបស់ប្រជាជនចិន។ ការប្រកួតនេះក៏បានបង្ហាញអំពីកម្រិតខ្ពស់នៃការផ្លាស់ប្តូររវាងប្រជាជននិងប្រជាជន កម្ពុជា-ចិន ក្នុងវិស័យវប្បធម៌និងភាសា។ លោកសង្ឃឹមថា សិស្សានុសិស្ស និងនិស្សិតដែលជាបេក្ខជនប្រកួត និងទស្សនិកជន នឹងបន្តធ្វើជាបេសកជននៃចំណងមិត្តភាពរវាងកម្ពុជានិងចិនបន្ថែមទៀត។
លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា
លោកបណ្ឌិតសភាចារ្យ ហង់ជួន ណារ៉ុន បានលើកឡើងថា ការប្រកួតបែបនេះ គឺជាកម្លាំងចលករដ៏សំខាន់ក្នុងការលើកកម្ពស់ការអប់រំភាសាចិននៅប្រទេសកម្ពុជា និងការផ្លាស់ប្តូររវាងប្រជាជនប្រទេសទាំងពីរ សំដៅឆ្ពោះទៅការកសាងកម្លាំងយុវជនដ៏មានសក្តានុពល សម្រាប់បន្តវេនពូនជ្រំមិត្តភាពដ៏យូរលង់របស់ប្រទេសទាំងពីរ ឱ្យកាន់តែជិតស្និទ្ធពីមួយជំនាន់ទៅមួយជំនាន់ទៀត។
លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និង កីឡា
ឆ្លៀតក្នុងឱកាសនោះផងដែរ តាងនាមក្រសួងអប់រំ យុវជន និង កីឡា លោកបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់អគ្គរដ្ឋទូតចិនប្រចាំកម្ពុជា រាជបណ្ឌិតសភាកម្ពុជា និង អ្នកពាក់ព័ន្ធទាំងអស់ ដែលបានផ្តួចផ្តើម សម្របសម្រួល និង គាំទ្របង្កើតការប្រកួតនេះឡើង ដើម្បីផ្តល់ឱកាសឱ្យបេក្ខជនបានបញ្ចេញសមត្ថភាពរបស់ខ្លួន និងជំរុញការអនុវត្តស្មារតីឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន ២០២៤ និងកិច្ចសហប្រតិបត្តិការអប់រំភាសាចិន៕
评论被关闭。