ក្រុមប្រឹក្សាអភិវឌ្ឍន៍កម្ពុជាចែករំលែកព័ត៌មាន នៃវឌ្ឍនភាពការវិនិយោគផ្ទាល់ពីបរទេសជូនមន្ត្រីការទូតកម្ពុជា
មន្ត្រីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា (CDC) បានចែករំលែកនូវព័ត៌មានស្តីពីវឌ្ឍនភាព នៃការវិនិយោគផ្ទាល់ពីបរទេសមកកម្ពុជា និងខ្លឹមសារគន្លឹះពាក់ព័ន្ធនឹង “គោលនយោបាយនិងលិខិតុបករណ៍គតិយុត្តសំខាន់ៗ សម្រាប់ការទាក់ទាញការវិនិយោគផ្ទាល់ពីបរទេស”។
ការចែករំលែកនេះធ្វើឡើងតាមរយៈសិក្ខាសាលា ស្តីពីបច្ចុប្បន្នភាពគោលនយោបាយសេដ្ឋកិច្ច សម្រាប់ថ្នាក់ដឹកនាំនៃក្រសួងការបរទេស និងសហប្រតិបត្តិការអន្តរជាតិ និងមន្រ្តីការទូតកម្ពុជាដែលកំពុងបំពេញបេសកកម្មការទូតនៅទូទាំងពិភពលោក។ សិក្ខាសាលានេះធ្វើឡើងនៅសណ្ឋាគារ Hyatt Regency ភ្នំពេញ។
លោកបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានធ្វើជាវាគ្មិនចែករំលែកនូវព័ត៌មានស្តីពីវឌ្ឍនភាពនៃការវិនិយោគផ្ទាល់ពីបរទេសមកកម្ពុជា និងខ្លឹមសារគន្លឹះពាក់ព័ន្ធនឹង “គោលនយោបាយនិងលិខិតុបករណ៍គតិយុត្តសំខាន់ៗសម្រាប់ការទាក់ទាញការវិនិយោគផ្ទាល់ពីបរទេស”។
លោកបានលើកឡើងអំពីសារៈសំខាន់នៃការបញ្ជ្រាបព័ត៌មានជូនដល់វិនិយោគិន អំពីស្ថានភាពម៉ាក្រូសេដ្ឋកិច្ចរបស់កម្ពុជា ភាពបើកចំហនៃរបបវិនិយោគ ការធានានិងការការពារវិនិយោគ ព្រមទាំងរបបលើកទឹកចិត្តដ៏ទូលំទូលាយចំពោះវិស័យ និងសកម្មភាពវិនិយោគជាច្រើន ដោយមានកំណត់ច្បាស់នៅក្នុងច្បាប់ស្តីពីវិនិយោគ និងអនុក្រឹត្យស្តីពីការអនុវត្តច្បាប់ស្តីពីវិនិយោគ ដែលជាឯកសារគោល សម្រាប់ផ្តល់នូវភាពអាចប៉ាន់ប្រមាណបាន សម្រាប់ការសម្រេចចិត្តវិនិយោគនៅកម្ពុជា។
លោក សរ សិនិរ៉ា ក៏បានរំលេចផងដែរអំពីសក្តានុពលទីផ្សារប្រទេសក្នុងតំបន់អាស៊ាន ទីផ្សារនៃកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ទីផ្សារប្រទេសកូរ៉េខាងត្បូង ទីផ្សារប្រទេសចិន និង ទីផ្សារអេមីរ៉ាតអារ៉ាប់រួម ដែលវិនិយោគិនអាចនាំចេញនូវផលិតផលដែលផលិតនៅកម្ពុជាទៅកាន់ទីផ្សារទាំងនេះ ដោយអត្រាពន្ធសូន្យ ឬអត្រាពន្ធទាប ក្រោមក្របខណ្ឌកិច្ចព្រមព្រៀងពាណិជ្ជកម្មសេរី។
ទន្ទឹមនឹងនេះ លោកក៏បានរំលេចអំពីស្ថានភាពចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ ដោយការធ្វើបទបង្ហាញការប្រៀបធៀបតួលេខជាក់ស្តែងនៃកំណើនការអនុម័តគម្រោងវិនិយោគ និងទុនវិនិយោគក្នុងអំឡុង ១០ ខែនៃឆ្នាំ២០២៣ និងឆ្នាំ២០២៤ ដែលមានការកើនឡើងគួរឱ្យកត់សម្គាល់។
ជាក់ស្តែង រយៈពេល ១០ ខែ (មករា-តុលា) នៃឆ្នាំ២០២៣ CDC បានចុះបញ្ជីគម្រោងវិនិយោគសរុបចំនួន ២២៧ គម្រោង ក្នុងទុនវិនិយោគសរុបប្រមាណជាង ៤ ប៊ីលានដុល្លារអាម៉េរិក ដែលបង្កើតបានឱកាសការងារចំនួន ២៦០ ៤៧០ កន្លែង ខណៈរយៈពេល ១០ ខែ (មករា-តុលា) នៃឆ្នាំ២០២៤កំណើនគម្រោងវិនិយោគមានសន្ទុះរហូតដល់ ៣៤៦ គម្រោង និងមានទុនវិនិយោគប្រមាណជាង ៥ ប៊ីលានដុល្លារអាម៉េរិក ដែលបង្កើតបានឱកាសការងាររហូតដល់ ២៦៨ ២៤២ កន្លែង៕
评论被关闭。