កម្ពុជានឹងរៀបចំការប្រណាំងឡាន OFFROAD អន្តរជាតិ អមដោយបោះតង់តាមមាត់សមុទ្រនៅខេត្តព្រះសីហនុ
សហព័ន្ធកីឡាយានយន្តកម្ពុជានឹងរៀបចំព្រឹត្តិការណ៍ប្រណាំងយានយន្ត OFFROAD អន្តរជាតិជាលើកដំបូងនៅមាត់សមុទ្រ ដើម្បីជាផ្នែកមួយជួយជំរុញវិស័យកីឡាយានយន្តនិងទេសចរណ៍។
លោក ទៀ ស្យាម អនុប្រធានសហព័ន្ធកីឡាយានយន្តកម្ពុជា និងជាប្រធានក្លិបកីឡាមហាគ្រួសារ OFFROAD កម្ពុជា បានឱ្យដឹងនៅក្នុងសន្និសីទសារព័ត៌មាននៅព្រឹកថ្ងៃទី១៨ ខែវិច្ឆិកា ឆ្នាំ២០២៤ថា ដោយសារកីឡាករកម្ពុជាមានបទពិសោធច្រើនទាំងការប្រកួតក្នុងស្រុកនិងក្រៅស្រុក ហើយទីតាំងប្រកួតមានអំណោយផលផ្នែកវិស័យទេសចរណ៍ផងនោះ ទើបសហព័ន្ធកីឡាយានយន្តកម្ពុជាទទួលរៀបចំព្រឹត្តិការណ៍ប្រណាំងយានយន្តអន្តរជាតិដ៏ធំនេះ ហើយអ្វីដែលកាន់តែពិសេសនោះ គឺការប្រកួតនេះរៀបចំជាលើកដំបូងនៅតំបន់មាត់សមុទ្រដ៏ស្រស់ស្អាតក្នុងខេត្តព្រះសីហនុ។
លោកលើកឡើងថា គោលដៅចម្បងរបស់យើងគឺជំរុញឱ្យវិស័យកីឡាប្រណាំងយានយន្ត OFFROAD នេះឱ្យរីកចម្រើន ដើម្បីធ្វើយ៉ាងណាឈានទៅរកការរៀបចំជារៀងរាល់ឆ្នាំ។ គោលដៅរៀបចំជារៀងរាល់ឆ្នាំនេះ មិនមែនតែខេត្តព្រះសីហនុទេ ប៉ុន្តែទៅតាមបណ្តាខេត្តនានាទូទាំងប្រទេសកម្ពុជា។
លោកបន្ថែមថា ប្រណាំងយានយន្ត OFFROAD លើកនេះ មិនត្រឹមតែជាការប្រណាំងយានយន្តប៉ុណ្ណោះទេ ថែមទាំងមានកម្មវិធីបោះតង់កម្សាន្តនៅមាត់សមុទ្រផងដែរ។ គណៈកម្មការបានរៀបចំកម្មវិធីបោះតង់រយៈពេល ៤ ថ្ងៃ ជាលក្ខណៈគ្រួសារនិងមិត្តភក្តិ។ ក្នុងនោះ ការរៀបចំតង់និងស្តង់ចំណីអាហារដែលមានប្រព័ន្ធទឹកស្អាតនិងអគ្គិសនីគ្រប់គ្រាន់ដើម្បីផ្តល់ភាពងាយស្រួលដល់អ្នកចូលរួមកម្សាន្ត។ ពេលល្ងាចនិងពេលយប់ ពួកគាត់អាចជួបជុំកម្សាន្តសប្បាយរីករាយនៅមាត់សមុទ្រ ហើយនៅពេលព្រឹកទៅទស្សនាព្រឹត្តិការណ៍ប្រណាំងយានយន្ត។ ទីតាំងដែលបោះតង់គឺនៅឆ្នេរថ្ម ៣ ដុំ ជាតំបន់ដើមឈើចាំស្នេហ៍ ដែលអាចបោះតង់ប្រមាណ ៣០០ ទៅ ៤០០ តង់។
លោកបានបញ្ជាក់ថា ការចូលរួមបោះតង់នេះគឺគ្មានការបង់ប្រាក់អ្វីឡើយ ដោយគ្រាន់តែឱ្យអ្នកចូលរួមធ្វើការចុះឈ្មោះជាមុន ដើម្បីក្រុមការងារយើងខ្ញុំរៀបចំជូន។
សម្រាប់ព្រឹត្តិការណ៍ប្រណាំងយានយន្ត OFFROAD អន្តរជាតិនេះ នឹងប្រព្រឹត្តទៅចាប់ពីថ្ងៃទី២៨ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៤ នៅទីលានស្តង់ដាអន្តរជាតិក្នុងទីក្រុងព្រះសីហនុ ខេត្តព្រះសីហនុ។ មានកីឡាករប្រមាណ ៦០ នាក់ចូលរួមប្រកួត ក្នុងនោះមានកីឡាករកម្ពុជាចំនួន ៤០ នាក់ និងកីឡាករបរទេសជាង ២០ នាក់មកពីប្រទេសចិន ថៃ ឡាវ និងប្រទេសវៀតណាម៕
评论被关闭。