ក្រុមហ៊ុនជប៉ុនមានសុទិដ្ឋិនិយមលើការវិនិយោគវិស័យកសិកម្ម ការកែច្នៃម្ហូបអាហារ និង វិស័យវារីវប្បកម្មនៅកម្ពុជា
ក្រុមហ៊ុនជប៉ុនចំនួន ២៦ បានបង្ហាញអំពីសុទិដ្ឋិនិយមក្នុងការស្វែងរកឱកាសវិនិយោគនៅកម្ពុជា លើវិស័យកសិកម្ម ការកែច្នៃម្ហូបអាហារ និង វិស័យវារីវប្បកម្ម។
នាព្រឹកថ្ងៃទី១៩ ខែវិច្ឆិកា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានទទួលជួបពិភាក្សាការងារជាមួយលោក តាកាហាស៊ី ហ្វូមីអាគី (TAKAHASHI Fumiaki) ប្រធានសមាគមជប៉ុន-កម្ពុជា និងគណៈប្រតិភូក្រុមហ៊ុនជប៉ុន នៅវិមានសន្តិភាព រាជធានីភ្នំពេញ។
ក្នុងឱកាសនៃជំនួប លោក តាកាហាស៊ី ហ្វូមីអាគី បានរាយការណ៍ជូនសម្ដេចធិបតីអំពីប្រវត្តិ និងវឌ្ឍនភាពនៃការងាររបស់សមាគមក្នុងរយៈពេលកន្លងមក ដែលបានចូលរួមចំណែកក្នុងការជំរុញទំនាក់ទំនង និងកិច្ចសហប្រតិបត្តិការរវាងជប៉ុន និងកម្ពុជា។ សមាគមនេះបានបើកដំណើរការិយាល័យរបស់ខ្លួនប្រចាំកម្ពុជាកាលពីខែមេសា ឆ្នាំ២០២៤ និងបានសហការជាមួយក្រសួង-ស្ថាប័នពាក់ព័ន្ធនៃរាជរដ្ឋាភិបាលកម្ពុជា បង្កើតសាលាបណ្ដុះបណ្ដាលជំនាញវិជ្ជាជីវៈចំនួន ៣ រួមមាន៖ សាលាបណ្ដុះបណ្ដាលជំនាញជួសជុលយានយន្ត សាលាបណ្ដុះបណ្ដាលជំនាញតុបតែងនិងកែសម្ផស្ស និង សាលាបណ្ដុះបណ្ដាលជំនាញវិស្វកម្មព័ត៌មានវិទ្យា។
ទន្ទឹមនឹងនេះ លោក តាកាហាស៊ី ហ្វូមីអាគី បានបន្ថែមថា ដំណើរបេសកកម្មធុរកិច្ចនៅកម្ពុជានាឱកាសនេះ មានក្រុមហ៊ុនជប៉ុនចំនួន ២៦ ក្រុមហ៊ុនបានចូលរួម និងបានបង្ហាញចំណាប់អារម្មណ៍ក្នុងការស្វែងរកឱកាសវិនិយោគនៅកម្ពុជាលើវិស័យមួយចំនួន ដូចជាវិស័យកសិកម្ម ការកែច្នៃម្ហូបអាហារ និង វិស័យវារីវប្បកម្ម។ នេះគឺដោយសារជប៉ុនបានមើលឃើញ និងបាននិងកំពុងតែធ្វើការផ្សព្វផ្សាយអំពីសក្កានុពលវិនិយោគរបស់ប្រទេសកម្ពុជា ដើម្បីទាក់ទាញក្រុមហ៊ុនវិនិយោគជប៉ុន ជាពិសេសប្រភេទសហគ្រាសធុនតូច និងមធ្យម (SME) ជប៉ុនមកវិនិយោគនៅកម្ពុជាថែមទៀត ព្រមទាំងបានបង្ហាញពីការប្តេជ្ញាចិត្ត ក្នុងការបន្តចូលរួមពង្រឹង និងពង្រីកកិច្ចសហប្រតិបត្តិការជាមួយរាជរដ្ឋាភិបាលកម្ពុជាលើវិស័យឧស្សាហកម្មនិងការអភិវឌ្ឍធនធានមនុស្ស។
សម្ដេចធិបតី ហ៊ុន ម៉ាណែត បានវាយតម្លៃខ្ពស់ចំពោះសមាគមជប៉ុន-កម្ពុជា ដែលតែងតែបានចូលរួមចំណែកក្នុងការពង្រឹងទំនាក់ទំនងជប៉ុន-កម្ពុជា ជាពិសេសការពង្រឹងការភ្ជាប់ទំនាក់ទំនងរវាងវិស័យឯកជននៃប្រទេសទាំងពីរ។
សម្ដេចធិបតីបានលើកឡើងថា វិស័យឯកជនរបស់ជប៉ុនបានចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចរបស់កម្ពុជាក្នុងរយៈពេលប៉ុន្មានទសវត្សរ៍កន្លងមកនេះ។
សម្តេចក៏បានអបអរសាទរសមាគមជប៉ុន-កម្ពុជា ដែលបានបង្កើតការិយាល័យនៅកម្ពុជានិងសាលាបណ្ដុះបណ្ដាលជំនាញវិជ្ជាជីវៈទាំង ៣ ខាងលើ។
ពាក់ព័ន្ធនឹងក្រុមហ៊ុនវិនិយោគរបស់ប្រទេសជប៉ុន សម្ដេចធិបតី ហ៊ុន ម៉ាណែត បានសម្ដែងនូវការស្វាគមន៍ចំពោះបណ្ដាក្រុមហ៊ុនវិនិយោគជប៉ុន ដែលចាប់អារម្មណ៍ក្នុងការស្វែងរកឱកាសវិនិយោគនៅកម្ពុជានាពេលនេះ។ បន្ថែមលើនេះ សម្ដេចធិបតីបានបញ្ជាក់ថា ការណ៍ដែលសមាគមជប៉ុន-កម្ពុជាខិតខំជំរុញប្រភេទក្រុមហ៊ុន SME ជប៉ុនមកវិនិយោគនៅកម្ពុជានេះ គឺស្របទៅនឹងគោលដៅយុទ្ធសាស្ត្ររបស់រាជរដ្ឋាភិបាលកម្ពុជាក្នុងការជំរុញនិងលើកកម្ពស់ SME នៅកម្ពុជា ក្នុងការបង្កើតទៅជាខ្សែច្រវាក់ផលិតកម្មមួយសម្រាប់ផ្គត់ផ្គង់ទីផ្សារក្នុងស្រុកនិងនាំចេញទៅក្រៅប្រទេស។
សម្ដេចធិបតី ហ៊ុន ម៉ាណែត ក៏បានគូសបញ្ជាក់អំពីការដាក់ចេញនូវគោលនយោបាយនិងវិធានការនានារបស់រាជរដ្ឋាភិបាលកម្ពុជា ដើម្បីលើកទឹកចិត្តនិងធានាបរិស្ថានធុរកិច្ចនិងការវិនិយោគ និងភាពប្រកួតប្រជែងរបស់កម្ពុជា។ ពាក់ព័ន្ធទៅនឹងកិច្ចសហប្រតិបត្តិការលើវិស័យឧស្សាហកម្មនិងការអភិវឌ្ឍធនធានមនុស្សរបស់សមាគម សម្ដេចធិបតីបានលើកទឹកចិត្តឱ្យសមាគមពិភាក្សាជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាលកម្ពុជា ដើម្បីរៀបចំផែនការឱ្យបានច្បាស់លាស់ស្របទៅនឹងតម្រូវការជាក់ស្តែង៕
评论被关闭。