សាជីវកម្មហិរញ្ញវត្ថុអន្តរជាតិប្តេជ្ញាចិត្តបន្តចូលរួមចំណែកក្នុងដំណើរអភិវឌ្ឍរបស់កម្ពុជា
សាជីវកម្មហិរញ្ញវត្ថុអន្តរជាតិ (IFC) បានប្តេជ្ញាចិត្តបន្តចូលរួមចំណែកក្នុងនាមជាដៃគូដ៏ល្អមួយនៅក្នុងដំណើរអភិវឌ្ឍរបស់ប្រទេសកម្ពុជា តាមចក្ខុវិស័យរបស់រាជរដ្ឋាភិបាលកម្ពុជា។
ការលើកឡើងនេះ ធ្វើឡើងនាឱកាសដែលសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា ទទួលជួបពិភាក្សាការងារជាមួយលោកស្រី ថូហ្វីកា ហ៊ុក (Towfiqua Hoque) តំណាង IFC នាថ្ងៃទី១៩ ខែវិច្ឆិកា ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ។
នាឱកាសនៃជំនួបនេះ លោកស្រី ថូហ្វីកា ហ៊ុក បានចាប់ផ្តើមតួនាទីជាតំណាង IFC នេះ ទើបតែបានរយៈពេលជាង ២ ខែ និងកំពុងស្ថិតនៅក្នុងដំណាក់កាលសិក្សាស្វែងយល់ពីប្រទេសកម្ពុជា ដោយលោកស្រីបានជួបពិភាក្សាជាមួយ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ លោកស្រី ជា សិរី អគ្គទេសាភិបាលធនាគារជាតិនៃកម្ពុជា និង ស្ថាប័នរាជរដ្ឋាភិបាលមួយចំនួនទៀត ដើម្បីស្វែងយល់កាន់តែច្បាស់ពីដំណើរការប្រព្រឹត្តទៅនៃសេដ្ឋកិច្ចសង្គមកម្ពុជា។
លោកស្រី ថូហ្វីកា ហ៊ុក បានបញ្ជាក់ថា IFC មានវត្តមាននៅកម្ពុជាជាង ២០ ឆ្នាំមកហើយ ក្នុងនោះត្រឹមតែ ១ ទសវត្សរ៍ចុងក្រោយនេះ IFC បានបោះទុនវិនិយោគនៅកម្ពុជាដែលគិតជាទឹកប្រាក់សរុបចំនួន ១,៥ ប៊ីលានដុល្លារអាម៉េរិក។ IFC មានការប្តេជ្ញាចិត្តចូលរួមចំណែកក្នុងនាមជាដៃគូដ៏ល្អមួយនៅក្នុងដំណើរអភិវឌ្ឍរបស់ប្រទេសកម្ពុជា ស្របទៅតាមចក្ខុវិស័យរបស់រាជរដ្ឋាភិបាលកម្ពុជា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
លោកស្រីបានអះអាងថា ក្នុងអាណត្តិរបស់លោកស្រី IFC នឹងធ្វើការជាមួយនឹងរាជរដ្ឋាភិបាលកម្ពុជានិងផ្នែកពាក់ព័ន្ធដទៃទៀតយ៉ាងជិតស្និទ្ធ គាំទ្រការអភិវឌ្ឍមនុស្ស ការអភិវឌ្ឍជំនាញ បង្កើនផលិតភាពនិងភាពប្រកួតប្រជែងឱ្យមានការរីកចម្រើនដូចមុនវិបត្តិកូវីដ-១៩ និងបន្តប្រកបដោយប្រសិទ្ធភាពក្នុងវិស័យកាត់ដេរជាមួយធនាគារជាតិនៃកម្ពុជា ជាមួយវិស័យកសិកម្ម កម្មន្តសាល និង វិស័យផ្សេងៗជាច្រើនទៀត ធ្វើយ៉ាងណាឱ្យដំណើរការគម្រោងរបស់វិស័យឯកជននិងវិស័យសាធារណៈអនុវត្តទៅដោយជោគជ័យ និងចូលរួមជំរុញគោលដៅរបស់កម្ពុជាក្នុងការប្រែក្លាយទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០។
ជាការឆ្លើយតប សម្ដេចតេជោ ហ៊ុន សែន បានសម្តែងការស្វាគមន៍និងអបអរសាទរយ៉ាងកក់ក្តៅចំពោះលោកស្រី ថូហ្វីកា ហ៊ុក ដែលត្រូវបានជ្រើសរើសជាតំណាង IFC ប្រចាំកម្ពុជា និងថ្លែងអំណរគុណពីការយកចិត្តទុកដាក់និងការប្តេជ្ញាចិត្តរបស់លោកស្រីក្នុងការរួមចំណែកអភិវឌ្ឍប្រទេសកម្ពុជា។។ សម្តេចសង្ឃឹមនិងជឿជាក់ថា លោកស្រីនឹងជំរុញបន្ថែមទៀតនូវទំនាក់ទំនងរវាង IFC និងកម្ពុជា ក៏ដូចជាចូលរួមកាន់តែខ្លាំងក្នុងការអភិវឌ្ឍនៅកម្ពុជា។
សម្តេចតេជោបានលើកឡើងថា IFC មានវត្តមាននៅកម្ពុជាតាំងពីសម្ដេចដាក់ចេញនូវយុទ្ធសាស្ត្រត្រីកោណក្នុងរាជរដ្ឋាភិបាល នីតិកាលទី២ បន្តមកដល់យុទ្ធសាស្ត្រចតុកោណនិងរហូតមកដល់យុទ្ធសាស្ត្របញ្ចកោណ ដំណាក់កាលទី១នាពេលបច្ចុប្បន្ននេះ។ សម្តេចតេជោក៏បានជម្រាបលោកស្រី ថូហ្វីកា ហ៊ុក ឱ្យតាមដានមើលការអនុវត្តយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលអាណត្តិថ្មី ដែលមានភាពជឿនលឿននិងមានល្បឿនជាងអាណត្តិមុនៗ៕
评论被关闭。