ចិនបន្តផ្តល់ជំនួយសម្ភារៈដល់កម្ពុជាដើម្បីដោះស្រាយបញ្ហាបម្រែបម្រួលអាកាសធាតុ
ក្រសួងអេកូឡូស៊ីនិងបរិស្ថាននៃសាធារណរដ្ឋប្រជាមានិតចិន បានប្រកាសផ្តល់សម្ភារៈដោះស្រាយបញ្ហាប្រែប្រួលអាកាសធាតុដល់កម្ពុជា។
ការប្រកាសផ្តល់ជំនួយបន្ថែមនេះ ធ្វើឡើងក្នុងឱកាសជំនួបរវាងលោក អ៊ាង សុផល្លែត រដ្ឋមន្ត្រីក្រសួងបរិស្ថានកម្ពុជានិងលោក ចាវ អ៊ីងមីន (ZHAO Yingmin) អនុរដ្ឋមន្ត្រីក្រសួងអេកូឡូស៊ីនិងបរិស្ថានចិន ក្នុងអំឡុងសន្និសីទលើកទី២៩នៃបណ្តាភាគីអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ នៅទីក្រុងបាគូ ប្រទេសអាស៊ែបៃស្សង់ កាលពីថ្ងៃទី២០ ខែវិច្ឆិកា ឆ្នាំ២០២៤។
នាឱកាសនៃជំនួបនេះ លោក អ៊ាង សុផល្លែត បានគូសបញ្ជាក់ថា កម្ពុជាបានរួមចំណែកយ៉ាងច្រើនទៅលើកិច្ចប្រឹងប្រែងដោះស្រាយបញ្ហាប្រែប្រួលអាកាសធាតុនៅក្នុងប្រទេសនិងសហគមន៍អន្តរជាតិ ក្នុងការប្រយុទ្ធប្រឆាំង នឹងការប្រែប្រួលអាកាសធាតុ។ ការដាក់ចេញនូវគោលបំណងច្បាស់លាស់ក្នុងការប្រយុទ្ធប្រឆាំងនឹងការប្រែប្រួលអាកាសធាតុ ជំរុញឱ្យប្រទេសអភិវឌ្ឍន៍ឆ្លើយតបការសន្យាក្នុងការកាត់បន្ថយការកើនឡើងកំដៅ និងផ្តល់មូលនិធិ ដើម្បីឆ្លើយតបនឹងការប្រែប្រួលអាកាសធាតុ សម្រាប់ជួយប្រទេសកំពុងអភិវឌ្ឍន៍ ដែលជាប្រទេសរងគ្រោះពីបញ្ហាបម្រែបម្រួលអាកាសធាតុនេះ។
លោក ចាវ អ៊ីងមីន បានវាយតម្លៃខ្ពស់ចំពោះសមិទ្ធផលសេដ្ឋកិច្ចសង្គមរបស់កម្ពុជា ជាពិសេសការប្តេជ្ញាចិត្តនិងការចូលរួមរបស់កម្ពុជា។ ប្រទេសចិននឹងបន្តគាំទ្រដល់កិច្ចសហប្រតិបត្តិការកាន់តែប្រសើរលើវិស័យបរិស្ថាន ជាពិសេសការប្រយុទ្ធប្រឆាំងនឹងការប្រែប្រួលអាកាសធាតុ ដែលទាមទារនូវកិច្ចខិតខំប្រឹងប្រែងរួមពីគ្រប់ប្រទេសនិងតំបន់ទាំងអស់។
តាមរយៈលោក ចាវ អ៊ីងមីន ភាគីចិនបានប្រកាសផ្តល់ជូនជាសម្ភារៈសម្រាប់ការប្រយុទ្ធប្រឆាំងការប្រែប្រួលអាកាសធាតុដល់ភាគីកម្ពុជា ក្រោមកិច្ចសហប្រតិបត្តិការខាងត្បូង-ខាងត្បូង នៅឆ្នាំ២០២៤ ដែលសម្ភារៈទាំងនោះរួមមាន អំពូលសូឡា LED បំភ្លឺផ្លូវសាធារណៈចំនួន ១ ៥០០ គ្រឿង ផ្ទាំងប្រព័ន្ធថាមពលព្រះអាទិត្យចំនួន ២ ០០០ គ្រឿង និង រថយន្តត្រួតពិនិត្យគុណភាពខ្យល់ចល័តចំនួន ២ គ្រឿង។
គួររម្លឹកថា តាំងពីឆ្នាំ២០១៩ដល់ឆ្នាំ២០២៤ ក្រសួងអេកូឡូស៊ីនិងបរិស្ថានចិន តាមរយៈកិច្ចសហប្រតិបត្តិការខាងត្បូង-ខាងត្បូង សម្រាប់ការប្រយុទ្ធប្រឆាំងការប្រែប្រួលអាកាសធាតុនៅឆ្នាំ២០២៤ បានផ្តល់ជូនក្រសួងបរិស្ថាននូវជំនួយសម្ភារៈដើម្បីដោះស្រាយបញ្ហាការប្រែប្រួលអាកាសធាតុ ការអភិវឌ្ឍបញ្ចេញកាបូនទាប រួមមានអំពូលសូឡា LED ចំនួន ៤ ៣០០ គ្រឿង ផ្ទាំងសូឡាចំនួន ២ ២០០ គ្រឿង រថយន្តត្រួតពិនិត្យគុណភាពខ្យល់ចល័តចំនួន ២ គ្រឿង និង ម៉ូតូអគ្គិសនីចំនួន ២០០ គ្រឿងរួចមកហើយ។
នៅក្នុងជំនួបនោះផងដែរ លោក លោក អ៊ាង សុផល្លែត និងលោក ចាវ អ៊ីងមីន បានឯកភាពបន្តពង្រឹងកិច្ចសហប្រតិបត្តិការទ្វេភាគីនិងពហុភាគីនៅគ្រប់កម្រិតទាំងអស់ ដើម្បីដោះស្រាយបញ្ហាបម្រែបម្រួលអាកាសធាតុនិងការអភិវឌ្ឍបញ្ចេញកាបូនទាប ដើម្បីសម្រេចបាននូវយុទ្ធសាស្ត្រចក្រាវិស័យ ដែលផ្តោតលើមុំយុទ្ធសាស្រ្ត ៣ គឺ ស្អាត បៃតង និង ចីរភាព៕
评论被关闭。