សម្ដេចធិបតី ហ៊ុន ម៉ាណែត៖ រាជរដ្ឋាភិបាលកម្ពុជាឈរនៅខាងអ្នកធុរកិច្ចជានិច្ច តាមរយៈការជួយគាំទ្រគ្រប់ជំហាន
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានប្រកាសថា រាជរដ្ឋាភិបាលឈរនៅខាងអ្នកធុរកិច្ចជានិច្ច តាមរយៈការជួយគាំទ្រដល់គ្រប់ជំហាននិងគ្រប់មធ្យោបាយដល់រាល់អាជីវកម្មនិងការវិនិយោគនៅក្នុងប្រទេសកម្ពុជា។
សម្តេចធិបតី ហ៊ុន ម៉ាណែត បានប្រកាសបែបនេះនៅក្នុងពិធីបើកកិច្ចប្រជុំកំពូលស្តីពីសេដ្ឋកិច្ចនិងបច្ចេកវិទ្យាចិនជាសកល នាថ្ងៃទី២៦ ខែវិច្ឆិកា ឆ្នាំ២០២៤ នៅសណ្ឋាគារសូហ្វីតែល រាជធានីភ្នំពេញ។
សម្ដេចធិបតីបានថ្លែងបញ្ជាក់យ៉ាងច្បាស់ថា រាជរដ្ឋាភិបាលកម្ពុជាគឺឈរនៅខាងអ្នកធុរកិច្ចជានិច្ច ហើយយើងតែងតែនៅជួយគាំទ្រដល់អ្នកធុរកិច្ចគ្រប់ជំហាន។ នៅក្នុងអាណត្តិរាជរដ្ឋាភិបាល នីតិកាលទី៧ នេះ បានបន្ថែមវិស័យបច្ចេកវិទ្យាដែលជាធាតុផ្សំថ្មីបន្ថែមនៅក្នុងយុទ្ធសាស្ត្របញ្ចកោណ ដំណាក់កាលទី១ សំដៅធ្វើពិពិធកម្ម និងទំនើបកម្មឧស្សាហកម្មរបស់កម្ពុជា ដែលពឹងផ្អែកលើជំនាញ និងចំណេះដឹង។
ក្នុងនាមជានាយករដ្ឋមន្ត្រី សម្ដេចធិបតីបានបង្ហាញការប្ដេជ្ញាចិត្ត និងបានសន្យាថា រាជរដ្ឋាភិបាលកម្ពុជានឹងបន្តគាំទ្រដល់ជោគជ័យរបស់អ្នកធុរកិច្ច និងវិនិយោគិនទាំងអស់ តាមគ្រប់មធ្យោបាយដែលអាចធ្វើទៅបាន ហើយទ្វាររបស់កម្ពុជាតែងតែបើកចំហជានិច្ច។ ដោយសម្តេចបានសង្កត់ធ្ងន់ថា វត្តមានរបស់ធុរកិច្ចនិងវិនិយោគិននឹងក្លាយជាផ្នែកមួយនៃដំណើរការក្នុងការផ្លាស់ប្តូររបស់កម្ពុជានៅក្នុងផ្នែកបច្ចេកវិទ្យា ថាមពលបៃតង នវានុវត្តន៍ឌីជីថល ឬការបណ្តាក់ទុនផ្សេងទៀត គឺកម្ពុជាត្រៀមខ្លួនរួចជាស្រេច ដើម្បីធ្វើជាដៃគូក្នុងភាពជោគជ័យរបស់អ្នកធុរកិច្ចនិងវិនិយោគិន។
សម្ដេចធិបតីបានបញ្ជាក់ទៅកាន់អង្គប្រជុំពីការប្រកាន់ជំហររបស់រាជរដ្ឋាភិបាលកម្ពុជា ដែលចាត់ទុកធុរកិច្ចនិងវិនិយោគិនជាតួអង្គដ៏សំខាន់ក្នុងការជំរុញកំណើនសេដ្ឋកិច្ច ខណៈតួនាទីរបស់រដ្ឋាភិបាល គឺអ្នកបង្កើតបរិយាកាសអំណោយផល ដែលធុរកិច្ចអាចរីកចម្រើន ភាពជឿនលឿន ហើយកំណើនសេដ្ឋកិច្ចទទួលបានការថែទាំ។
បន្ថែមពីនេះ សម្ដេចធិបតី ហ៊ុន ម៉ាណែត បានឱ្យដឹងថា រាជរដ្ឋាភិបាលកម្ពុជាក៏បានបង្កើតយន្តការកម្រិតខ្ពស់ចំនួនពីរ ដែលជាយន្តការផ្ទាល់របស់សម្តេចក្នុងការគាំទ្រដល់អាជីវកម្ម ទី១ គឺគណៈកម្មាធិការផ្តល់យោបល់លើគោលនយោបាយពាណិជ្ជកម្ម ដែលធ្វើការជាអ្នកគិតគូរផ្នែកយុទ្ធសាស្ត្ររបស់រាជរដ្ឋាភិបាល តាមដាននិន្នាការសកលនិងធានាឱ្យគោលនយោបាយនៅតែមានភាពប្រកួតប្រជែង។ ទី២ គឺគណៈកម្មាធិការជំរុញការដោះស្រាយវិវាទវិស័យឯកជន ដែលធ្វើការដោះស្រាយបញ្ហាយ៉ាងឆាប់រហ័សនិងមានប្រសិទ្ធភាព។
សម្តេចក៏បានលើកឡើងអំពីភាពចាំបាច់ក្នុងការថែរក្សាសុខសន្តិភាពនិងស្ថិរភាពនយោបាយនៅក្នុងប្រទេសកម្ពុជា ព្រោះវាជាមូលដ្ឋានគ្រឹះក្នុងការធានាសុវត្ថិភាពដល់ធុរកិច្ចនិងការវិនិយោគទាំងក្នុងស្រុកនិងក្រៅស្រុក និងជំរុញការអភិវឌ្ឍនិងរីកចម្រើនប្រកបដោយចីរភាពនិងវិបុលភាព៕
评论被关闭。