កម្មវិធីពិសេសជំរុញការវិនិយោគខេត្តព្រះសីហនុ ផ្ដោតលើគម្រោងអាទិភាពធំៗចំនួន ៤
រាជរដ្ឋាភិបាលកម្ពុជាបានសម្រេចប្រកាសដាក់ឱ្យអនុវត្ត «កម្មវិធីពិសេសជំរុញការវិនិយោគក្នុងខេត្តព្រះសីហនុ» សម្រាប់គម្រោងវិនិយោគឬសកម្មភាពធុរកិច្ចមានទីតាំងស្ថិតនៅខេត្តព្រះសីហនុ។
យោងតាមឯកសារស្តីពី «វេទិកាវិនិយោគក្នុងខេត្តព្រះសីហនុ» ដែលរៀបរៀងដោយក្រសួងសេដ្ឋកិច្ចនិងហិរញ្ញវត្ថុ រួមជាមួយរដ្ឋបាលខេត្តព្រះសីហនុ បានឱ្យដឹងថា «កម្មវិធីពិសេសជំរុញការវិនិយោគក្នុងខេត្តព្រះសីហនុ» ដែលត្រូវបានប្រកាសដាក់ឱ្យប្រើប្រាស់កាលពីខែមករា ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានកំណត់វិធានការនិងយន្តការដែលមានលក្ខណៈជាកញ្ចប់ ប្រទាក់ក្រឡា មុតស្រួច និង សាមញ្ញ ដើម្បីឆ្លើយតបទៅនឹងស្ថានភាពនិងតម្រូវការជាក់ស្តែងចំពោះមុខរបស់ខេត្តព្រះសីហនុ ក្នុងគោលដៅជំរុញការវិនិយោគ ការអភិវឌ្ឍឧស្សាហកម្ម ការស្តារកំណើនសេដ្ឋកិច្ច និង ការបំពេញបន្ថែមលើយុទ្ធសាស្ត្រនិងគោលនយោបាយនានារបស់រាជរដ្ឋាភិបាល ជាពិសេសការអនុវត្តផែនការមេដើម្បីប្រែក្លាយខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង។
«កម្មវិធីពិសេសជំរុញការវិនិយោគក្នុងខេត្តព្រះសីហនុ» ត្រូវអនុវត្តចំពោះគម្រោងវិនិយោគឬសកម្មភាពធុរកិច្ចដែលមានទីតាំងនៅខេត្តព្រះសីហនុ និងផ្តោតលើគម្រោងធំៗចំនួន ៤៖ (១) គម្រោងវិនិយោគឬសកម្មភាពធុរកិច្ចពាក់ព័ន្ធនឹងអគារជាប់គាំង។ (២) គម្រោងវិនិយោគឬសកម្មភាពធុរកិច្ចមិនជាប់ពាក់ព័ន្ធនឹងអគារជាប់គាំង ចាប់ផ្តើមអនុវត្តនៅឆ្នាំ២០២៤។ (៣) ការពង្រីកគម្រោងវិនិយោគឬសកម្មភាពធុរកិច្ចមានស្រាប់។ (៤) គម្រោងវិនិយោគ / ធុរកិច្ចដែលមានស្រាប់ (ថ្មី)។
ព្រះសីហនុជាខេត្តដ៏មានសក្តានុពលមួយលើវិស័យវិនិយោគ ទេសចរណ៍ និង ដឹកជញ្ជូន កន្លងមករាជរដ្ឋាភិបាលកម្ពុជាបានដាក់ចេញនូវវិធានការជាកញ្ចប់ ដើម្បីដោះស្រាយគម្រោងវិនិយោគដែលជាប់គាំងនៅក្នុងខេត្តនេះ ដែលក្នុងនោះរួមមានគម្រោងវិនិយោគដែលបានសាងសង់ហើយបានផ្អាក ពន្យារ និងពុំមានសកម្មភាពវិនិយោគឬសកម្មភាពធុរកិច្ចនៅក្នុងខេត្តព្រះសីហនុចាប់ពីឆ្នាំ២០១៦។
រាជរដ្ឋាភិបាលបានចាត់ទុកថា «កម្មវិធីពិសេសជំរុញការវិនិយោគក្នុងខេត្តព្រះសីហនុ» បានផ្តល់សញ្ញាវិជ្ជមាននិងបង្កើនជំនឿទុកចិត្តដល់វិនិយោគិន ទាំងក្នុងស្រុកនិងក្រៅស្រុក៕
评论被关闭。