អាកាសយានដ្ឋានអន្តរជាតិតេជោ ជាប់ចំណាត់ថ្នាក់លេខ ៥ នៃគម្រោងស្ថាបត្យកម្មពិភពលោកទាំង ១១ ក្នុងឆ្នាំ២០២៥

សារព័ត៌មាន​ដ៏ធំ​របស់​សហរដ្ឋអាម៉េរិក CNN បានចាត់ថ្នាក់​អាកាសយានដ្ឋាន​​អន្តរជាតិ​​តេជោ (TIA) ក្នុងលំដាប់ថ្នាក់​លេខ ៥ ក្នុងចំណោម​គម្រោង​ស្ថាបត្យ​កម្ម​កំពូលៗ​ទាំង ១១ របស់​​ពិភព​លោក​ក្នុងឆ្នាំ២០២៥។ ការ​ចាត់ថ្នាក់​នេះគឺផ្អែក​លើ​ស្នាដៃ​ស្ថាបត្យកម្ម​ ការរចនា​ដោយ​ប្រើប្រាស់​ធម្មជាតិ​បៃតង​ដែលគិតគូរ​អំពី​បរិស្ថាន​ និង ការចេះច្នៃ​ទីតាំង​តូច​ឱ្យមាន​ភាព​ទាក់ទាញ​​ជាដើម។

អាកាសយានដ្ឋាន​អន្តរជាតិ​តេជោ ជាប្រភេទ 4F ដែលអាច​ទទួល​យន្តហោះ​ខ្នាតធំ ដូចជា​យន្តហោះ Airbus A380-800 និង យន្តហោះ Boeing747-800 និងអាច​ទទួល​ភ្ញៀវទេសចរ​អន្តរជាតិ​បានកាន់តែច្រើន​ក្នុងមួយឆ្នាំៗ។ អាកាសយានដ្ឋាន​ថ្មីនេះ​ជាគម្រោង​វិនិយោគ​របស់​ក្រុមហ៊ុន​សាជីវកម្ម​វិនិយោគទុន​នៅក្រៅប្រទេស (OCIC) ក្រោមទុនវិនិយោគ​ចំនួន ១,៥ ប៊ីលាន​ដុល្លារអាម៉េរិក និងគ្រោង​ដាក់ឱ្យ​ប្រើប្រាស់​នៅខែកក្កដា ឆ្នាំ២០២៥នេះ។

គម្រោង​ស្ថាបត្យ​កម្ម​កំពូលៗ​ទាំង ១១ លើពិភពលោក ដែល  CNN បានចាត់​ចំណាត់ថ្នាក់​និងចុះផ្សាយ​នៅថ្ងៃទី១ ខែមករា ឆ្នាំ២០២៥នេះ រួមមាន៖ (១) ផ្សារត្រីស៊ីដនីថ្មី (New Sydney Fish Market) ប្រទេសអូស្រ្តាលី​ (២) សាលពិព័រណ៍ Grand Ring អូសាកា ប្រទេសជប៉ុន (៣) អគារ Life & Mind របស់​សកលវិទ្យាល័យ Oxford ប្រទេស​អង់គ្លេស (៤) ​សាលារៀន Canadian School ប្រទេសម៉ិកស៊ិក (៥) អាកាសយានដ្ឋាន​អន្តរជាតិ​តេជោ​ភ្នំពេញ (៦) ស្ថានីយ៍ដឹកជញ្ជូន South Station Redevelopment  នៅក្រុង​បូស្តុន សហរដ្ឋអាម៉េរិក (៧) មជ្ឈមណ្ឌល Goethe-Institute  ប្រទេស​សេណេហ្កាល់ (៨) អគារ Urban Glen នៅទីក្រុង​ហានចូវ ប្រទេសចិន (៩) ស្ថានីយ៍មេត្រូ (Metro) ក្រុងរីយ៉ាត ប្រទេស​អារ៉ាប៊ីសាអូឌីត (១០) មជ្ឈ​មណ្ឌល​ពាណិជ្ជកម្ម​ Skypark ​ប្រទេស​លុចសំបួ (១១) ស្ពានតាន់ជាំង (Danjiang) នៅកោះតៃវ៉ាន់ ប្រទេសចិន៕