សម្តេចធិបតី ហ៊ុន ម៉ាណែត ជួបពិភាក្សាការងារជាមួយស្ថាបនិកសន្និសីទអង្ករពិភពលោក Jeremy Zwinger

នារសៀល​ថ្ងៃទី៨ ខែមករា ឆ្នាំ២០២៥ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជួប​ពិភាក្សា​ការងារ​ជាមួយ​លោក Jeremy Zwinger ប្រធាន​ក្រុមហ៊ុន​និងជា​នាយក​ប្រតិបត្តិអង្គការស្រាវជ្រាវអង្ករអន្តរជាតិ (TRT) និងជា​ស្ថាបនិកសន្និសីទអង្ករពិភពលោក (WRC) នៅវិមាន​សន្ដិភាព រាជធានី​ភ្នំពេញ។

ក្នុងឱកាសនៃជំនួប លោក Jeremy Zwinger បានសម្ដែងនូវ​ក្តីសោមនស្ស​រីករាយ​និងកោតសរសើរ ពោះ​ការអភិវឌ្ឍ​យ៉ាងឆាប់​រហ័ស​លើគ្រប់​វិស័យ​របស់​កម្ពុជា ដែលក្នុងនោះ​វិស័យ​ស្រូវអង្ករ ឡូជីស្ទីក និង ហេដ្ឋារចនាសម្ព័ន្ធ​ផ្សេងៗ មានការ​រីកចម្រើន​គួរឱ្យ​កត់សម្គាល់ ព្រមទាំង​បានបង្ហាញនូវ​ជំនឿ​ជឿជាក់​ប្រកបដោយ​សុទិដ្ឋិនិយម​អំពី​សក្ដានុពល​របស់​កម្ពុជា។

លោកក៏បាន​សម្ដែងនូវ​ការ​អបអរសាទរ​ចំពោះ​កម្ពុជា ដែលបាន​ឈ្នះពានរង្វាន់​អង្ករ​ល្អបំផុត​របស់​ពិភពលោក កាលពី​ខែវិច្ឆិកា ឆ្នាំ២០២៤ នាទីក្រុង​ម៉ានិល ប្រទេស​ហ្វីលីពីន។ ទន្ទឹមនឹងនេះ លោកក៏បាន​បង្ហាញ​អំពី​ការគាំទ្រ​ដល់កម្ពុជា​ក្នុងការ​ធ្វើជា​ម្ចាស់ផ្ទះ​រៀបចំ​សន្និសីទ​ស្រូវអង្ករ​ពិភពលោក​ ឆ្នាំ២០២៥ ផងដែរ។

ជាការឆ្លើយតប សម្ដេចធិបតី ហ៊ុន ម៉ាណែត បានថ្លែង​អំណរគុណ​ចំពោះ​លោក Jeremy Zwinger ដែលបាន​គាំទ្រ​កម្ពុជា​ធ្វើជា​ម្ចាស់ផ្ទះ​សន្និសីទ​ស្រូវអង្ករ​ពិភពលោក ឆ្នាំ២០២៥។ សម្ដេច​បានគូស​បញ្ជាក់ថា ស្រូវ​គឺជា​ដំណាំ​យុទ្ធសាស្ត្រ​យូរអង្វែង​របស់​កម្ពុជា ហើយរាជរដ្ឋាភិបាល​បានដាក់ចេញ​គោលនយោបាយ​ចាំបាច់​នានា ក្នុងការ​គាំទ្រ​ដល់ផលិតកម្ម​ស្រូវអង្ករ​របស់​កម្ពុជា ដើម្បី​ធានា​ឱ្យបាន​នូវភាព​ប្រកួត​ប្រជែង ក៏ដូចជា​ការអភិវឌ្ឍ​ហេដ្ឋារចនាសម្ព័ន្ធ​និងឡូជីស្ទីក សំដៅ​សម្រួល​ដល់ការ​ដឹកជញ្ជូន​និងកាត់បន្ថយ​ថ្លៃដើម​ផងដែរ៕