សម្ដេចធិបតី ហ៊ុន ម៉ាណែត៖ រាជរដ្ឋាភិបាលកម្ពុជាមិនបាននៅពីក្រោយឃាតកម្មលើលោក លិម គិមយ៉ា ទេ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា បានថ្លែងជាសាធារណៈថា រាជរដ្ឋាភិបាល​កម្ពុជា​មិនបាន​នៅពីក្រោម​ឃាតកម្ម​លើលោក លិម គិមយ៉ា អតីត​តំណាងរាស្ត្រ​គណបក្ស​សង្គ្រោះជាតិ​នោះទេ។

សម្តេចធិបតី ហ៊ុន ម៉ាណែត បានអះអាង​បែបនេះ​នៅក្នុង​ពិធី​សម្ពោធ​ដាក់ឱ្យ​ប្រើប្រាស់​ជាផ្លូវការ​សមិទ្ធផល​សំខាន់ៗ ក្នុងភូមិ​ប៊ុនរ៉ានី​សែនជ័យ ដំណាក់​ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នាព្រឹក​ថ្ងៃទី២០ ខែមករា ឆ្នាំ២០២៥។

សម្ដេចធិបតីអះអាងថា បើរាជរដ្ឋាភិបាល​កម្ពុជា​នៅពីក្រោយ​ករណីឃាតកម្ម​លើលោក លិម គិមយ៉ា នោះកម្ពុជា​មិនបញ្ចូន​ជនដៃដល់​ជនជាតិ​ថៃ​ឈ្មោះ អេកាឡាក់ ភាណយ ទៅឱ្យ​ភាគី​ថៃវិញឡើយ។ កម្ពុជា​បញ្ជូន​ខ្លួនជនដៃដល់​បាញ់សម្លាប់​លោក លិម គិមយ៉ា ទៅឱ្យ​ភាគីថៃ ព្រោះ​​ចង់បង្ហាញ​ថា រាជរដ្ឋាភិបាល​កម្ពុជា​មិននៅ​ពីក្រោយ​ករណី​នេះដូចការ​ចោទប្រកាន់​ឡើយ ហើយរាជរដ្ឋាភិបាល​កម្ពុជា​ក៏ចង់ដឹង​ពីមូលហេតុ​នៃការបាញ់​ប្រហារ​នេះផងដែរ។

អតីត​តំណាងរាស្ត្រ​គណបក្ស​សង្គ្រោះជាតិ លោក លិម គិមយ៉ា ត្រូវបាន​ឃាតករ (អេកាឡាក់ ភាណយ) បាញ់សម្លាប់​នៅកណ្តាល​ទីក្រុង​បាងកក ប្រទេសថៃ កាលពីល្ងាច​ថ្ងៃទី៧ ខែមករា ឆ្នាំ២០២៥។ លោកត្រូវបាន​ឃាតករ​បាញ់ត្រូវ​ចំនួន ៣ គ្រាប់ បណ្តាលឱ្យ​ស្លាប់បាត់បង់​អាយុជីវិត​នៅនឹងកន្លែង​កើតហេតុតែម្តង។ រីឯជនដៃដល់ អេកាឡាក់ ភាណយ ត្រូវបាន​សមត្ថកិច្ច​ចាប់ខ្លួន​នៅស្រុកមោងឫស្សី​ខេត្តបាត់ដំបង និងបន្ទាប់មក​ត្រូវបាន​បញ្ជូន​ទៅឱ្យ​ភាគីថៃ​ចាត់ការ​តាមផ្លូវច្បាប់៕