កម្ពុជារកចំណូលបានជាង ៨៧០ លានដុល្លារពីការនាំចេញសម្បកកង់រថយន្តក្នុងឆ្នាំ២០២៤

អគ្គនាយកដ្ឋាន​​គយ​និង​​រដ្ឋាករ​​កម្ពុជា​​បានឱ្យ​ដឹងថា កម្ពុជា​បាននាំចេញ​ផលិតផល​សម្បកកង់​រថយន្ត​ក្នុងទំហំ​ទឹកប្រាក់​ប្រមាណ ៨៧៤,៦ លាន​ដុល្លារអាម៉េរិក​ក្នុងឆ្នាំ២០២៤ កើនឡើង​ជិត ១៣០% ធៀបនឹងឆ្នាំ២០២៣ ដែលមាន​ទឹកប្រាក់​តែជាង ៣៨០,៦ លានដុល្លារ។

លោក ប៉ែន សុវិជាតិ រដ្ឋលេខាធិការ និងជា​អ្នកនាំពាក្យ​ក្រសួង​ពាណិជ្ជកម្ម​បានឱ្យដឹង​កាលពីពេល​ថ្មីៗ​នេះថា ​ការនាំចេញ​សម្បកកង់​រថយន្ត​គឺជាសមិទ្ធផល​ថ្មីមួយ​របស់​កម្ពុជា ដែលការណ៍​នេះ​ឆ្លុះបញ្ចាំង​អំពី​កិច្ចខិតខំ​ប្រឹងប្រែង​របស់​រាជរដ្ឋាភិបាល​ក្នុងការ​ជំរុញ​និងពង្រីក​ការនាំចេញ​ទៅកាន់​ទីផ្សារ​តំបន់​និងពិភពលោក។ ​ការបើក​ទីផ្សារ​ថ្មីសម្រាប់​ផលិតផល​សម្បកកង់​រថយន្ត​​​ គឺជា​ការបោះជំហាន​មួយរបស់​យើងក្នុងការ​ពង្រីក​ការនាំចេញ ខណៈដែល​ឧស្សាហកម្ម​ផលិត​សម្បកកង់​រថយន្ត គឺជា​ឧស្សាហកម្ម​ថ្មីមួយ​របស់កម្ពុជា។

បច្ចុប្បន្ន​នេះ ​កម្ពុជា​មាន​រោង​ចក្រ​ផលិត​សម្បក​កង់​រថយន្ដ​ចំនួន ៣៖ (១) ​​ក្រុមហ៊ុន General Tires Technology (Cambodia) ​​នៅក្នុង​តំបន់​សេដ្ឋកិច្ច​ពិសេស​ក្រុង​ព្រះសីហនុ​។​ (២) ក្រុមហ៊ុន Sailun Group ប្រតិបត្តិការ​តាមរយៈ​ក្រុមហ៊ុន​បុត្រ​សម្ព័ន្ធ​របស់ខ្លួន​គឺ​ក្រុមហ៊ុន Cart Tire នៅក្នុង​តំបន់​សេដ្ឋកិច្ច​ពិសេស Qi Lu (Cambodia) ក្រុង​បាវិត ខេត្តស្វាយរៀង​។ (៣) ក្រុមហ៊ុន Qingdao Doublestar Group ​នៅ​ខេត្តក្រចេះ ដោយ​សហការ​ជាមួយ​ក្រុមហ៊ុន UBE Development Co Ltd។

ក្រសួង​កសិកម្ម រុក្ខាប្រមាញ់ និង នេសាទ​បានឱ្យដឹងថា រោងចក្រ​ផលិតសម្បកកង់​រថយន្ត​ទាំង ៣ ខាងលើ បានស្រូប​យកជ័រកៅស៊ូ​ក្នុងស្រុក​ប្រមាណ ១៥ ម៉ឺនតោនដល់ ២០ ម៉ឺនតោន​ក្នុងមួយឆ្នាំ៕