សម្តេចធិបតី ហ៊ុន ម៉ាណែត ផ្ញើលិខិតជូនពរឆ្នាំថ្មី ជូនលោកនាយករដ្ឋមន្ត្រីចិន លី ឈាង និងប្រជាជនចិន
ក្នុងឱកាសនៃពិធីបុណ្យចូលឆ្នាំថ្មីប្រពៃណីចិន ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ញើសារលិខិតជូនពរចំពោះលោក លី ឈាង (Li Qiang) នាយករដ្ឋមន្ត្រី និងប្រជាជននៃសាធារណរដ្ឋប្រជាមានិតចិន។
សម្តេចធិបតីបានមានប្រសាសន៍នៅក្នុងសារលិខិតថា ក្នុងនាមរាជរដ្ឋាភិបាលកម្ពុជា សម្តេចជូនពរនិងអបអរសាទរយ៉ាងស្មោះស្ម័គ្រចំពោះលោក លី ឈាង និងតាមរយៈលោក លី ឈាង ជូនចំពោះប្រជាជនជាមិត្តនៃសាធារណៈរដ្ឋប្រជាមានិតចិន និងសហគមន៍ចិនទូទាំងពិភពលោក ក្នុងឱកាសដ៏រីករាយនៃបុណ្យចូលឆ្នាំថ្មីប្រពៃណីចិនឆ្នាំ២០២៥។
សម្តេចបានគូសបញ្ជាក់ថា កម្ពុជានិងចិនទទួលបាននូវភាពជាដៃគូដ៏រឹងមាំនិងយូរអង្វែង ដែលកំណត់លក្ខណៈដោយស៊ីជម្រៅផ្នែកនយោបាយ សេដ្ឋកិច្ច វប្បធម៌ និង ទំនាក់ទំនងរវាងប្រជាជននិងប្រជាជន។
សម្តេចបានសម្តែងនូវជំនឿចិត្តថា ឆ្នាំថ្មីឆ្នាំម្សាញ់នឹងនាំមកនូវឱកាសជាច្រើនសម្រាប់ប្រជាជាតិយើងទាំងពីរ ដើម្បីពង្រឹងចំណងមិត្តភាព និងកិច្ចសហប្រតិបត្តិការត្បូងពេជ្រប្រទេសទាំងពីរ ឱ្យកាន់តែរឹងមាំបន្ថែមទៀត ទន្ទឹមនឹងការជំរុញការកសាងសហគមន៍វាសនារួមកម្ពុជា-ចិន នាយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និង ស្តង់ដាខ្ពស់។
សម្តេចធិបតី ហ៊ុន ម៉ាណែត បានគូសបញ្ជាក់និងសម្តែងនូវការដឹងគុណយ៉ាងស្មោះស្ម័គ្រ ចំពោះរដ្ឋាភិបាលចិន ដែលជានិច្ចកាលតែងតែផ្តល់នូវការគាំទ្រយ៉ាងពេញទំហឹងនិងជំនួយដែលមិនអាចខ្វះបាន ចូលរួមចំណែកក្នុងការអភិវឌ្ឍសេដ្ឋកិច្ច-សង្គមរបស់កម្ពុជា។ កម្ពុជានឹងបន្តធ្វើឱ្យកាន់តែស៊ីជម្រៅនូវភាពជាដៃគូយុទ្ធសាស្ត្រគ្រប់ជ្រុងជ្រោយ និងពង្រឹងទំនាក់ទំនងដ៏ស្អិតល្មួតរវាងកម្ពុជានិងចិន។
សម្តេចធិបតីជូនពរឱ្យប្រទេសចិននិងប្រជាជនចិន ទទួលបាននូវសមិទ្ធផលកាន់តែច្រើននិងវិបុលភាពនាឱកាសឆ្នាំថ្មីនេះ៕
评论被关闭。