អង់គ្លេសសន្យាបន្តជួយកម្ពុជាដល់ឆ្នាំ២០៣២ ទោះកម្ពុជាចេញពីឋានៈប្រទេសអភិវឌ្ឍន៍តិចតួចនៅឆ្នាំ២០៣០
ចក្រភពអង់គ្លេសនឹងបន្តផ្ដល់ការអនុគ្រោះផ្នែកពាណិជ្ជកម្មដល់កម្ពុជារហូតដល់ឆ្នាំ២០៣២ បើទោះបីកម្ពុជាចាកចេញពីឋានៈប្រទេសអភិវឌ្ឍន៍តិចតួចនៅឆ្នាំ២០៣០ ក៏ដោយ។
នេះជាការលើកឡើងរបស់ លោក Dominic Williams ឯកអគ្គរាជទូតអង់គ្លេសប្រចាំកម្ពុជា នៅក្នុងជំនួបជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា កាលពីថ្ងៃទី៣០ ខែមករា ឆ្នាំ២០២៥ នៅទីស្តីការក្រសួងការបរទេស រាជធានីភ្នំពេញ។
ក្នុងឱកាសនៃជំនួប លោក ប្រាក់ សុខុន និងលោក Dominic Williams បានផ្លាស់ប្តូរទស្សនៈគ្នាលើមធ្យោបាយក្នុងការពង្រឹងកិច្ចសហប្រតិបត្តិការទ្វេភាគី កម្ពុជា-អង់គ្លេស លើវិស័យជាច្រើន ពិសេសវិស័យពាណិជ្ជកម្ម វិនិយោគ និង វិស័យការពារជាតិ រួមទាំងកិច្ចសហប្រតិបត្តិការអភិវឌ្ឍន៍នៃប្រទេសទាំងពីរ។
ភាគីទាំងពីរបានសម្ដែងក្ដីរីករាយចំពោះទំនាក់ទំនងកាន់តែរីកចម្រើនរវាងកម្ពុជានិងអង់គ្លេស និងជោគជ័យនៃកិច្ចពិគ្រោះយោបល់នយោបាយទ្វេភាគីលើកទី២ នៅទីក្រុងឡុងដ៍ ប្រទេសអង់គ្លេស កាលពីខែវិច្ឆិកា ឆ្នាំ២០២៤ ដែលបានជំរុញឱ្យមានការផ្លាស់ប្តូរកម្រិតខ្ពស់។
ភាគីទាំងពីរក៏បានពិភាក្សាលើការជំរុញទំនាក់ទំនងពាណិជ្ជកម្ម តាមរយៈការវិនិយោគរបស់អង់គ្លេស រួមទាំងការអភិវឌ្ឍតំបន់សេដ្ឋកិច្ចពិសេសបៃតងដំបូងរបស់កម្ពុជានិងគម្រោងនានា ដូចជាអាកាសយានដ្ឋានអន្តរជាតិតេជោ ដែលរចនាដោយក្រុមហ៊ុនអង់គ្លេស Foster និង Partners។ ភាគីទាំងពីរក៏បានសាទរចំពោះកំណើនភ្ញៀវទេសចរអង់គ្លេសមកកាន់កម្ពុជា និងឯកភាពក្នុងការរិះរកមធ្យោបាយពង្រីកកិច្ចសហប្រតិបត្តិការទេសចរណ៍របស់ប្រទេសទាំងពីរ។
ពាក់ព័ន្ធនឹងវិស័យពាណិជ្ជកម្មនិងការវិនិយោគ លោក ប្រាក់ សុខុន បានស្វាគមន៍ចំពោះការរៀបចំប្រកបដោយជោគជ័យនៃវេទិកាពាណិជ្ជកម្ម និងការវិនិយោគរួមគ្នា (JTIF) នាខែវិច្ឆិកា ឆ្នាំ២០២៤ នៅរាជធានីភ្នំពេញ ហើយបានទទួលស្គាល់ពីសារៈសំខាន់នៃការរួមបញ្ចូលកម្ពុជាក្នុងគម្រោងពាណិជ្ជកម្មប្រទេសកំពុងអភិវឌ្ឍន៍ (DCTS) សម្រាប់កំណើនសេដ្ឋកិច្ច។ លោកបានកោតសរសើរចំពោះការបន្តគាំទ្ររបស់អង់គ្លេស រួមទាំងការសម្រេចបន្តផ្តល់អត្ថប្រយោជន៍ដល់កម្ពុជា ក្រោមគម្រោងពាណិជ្ជកម្មប្រទេសកំពុងអភិវឌ្ឍន៍រហូតដល់ឆ្នាំ២០៣២ បន្ទាប់ពីកម្ពុជាចាកចេញពីឋានៈប្រទេសអភិវឌ្ឍន៍តិចតួច ដើម្បីជួយធានាឱ្យមានការផ្លាស់ប្ដូរសេដ្ឋកិច្ចកម្ពុជាដោយរលូន។
សម្រាប់កិច្ចសហប្រតិបត្តិការអភិវឌ្ឍន៍ លោក ប្រាក់ សុខុន បានអរគុណចំពោះការគាំទ្ររបស់អង់គ្លេសដល់ការអភិវឌ្ឍសេដ្ឋកិច្ច-សង្គមរបស់កម្ពុជា រួមទាំងវិស័យអប់រំ ការថែទាំសុខភាព និង ការដោះមីន ខណៈលោកបានបង្ហាញការស្វាគមន៍ ចំពោះការបើកសាកលវិទ្យាល័យអង់គ្លេសដំបូងគេនៅកម្ពុជា គឺសាកលវិទ្យាល័យ ដឹ ម៉ុងហ្វត។
លោក ប្រាក់ សុខុន បានអំពាវនាវឱ្យមានការផ្លាស់ប្តូរការអប់រំ និងកម្មវិធីបណ្តុះបណ្តាលបច្ចេកទេសឱ្យកាន់តែប្រសើរឡើងថែមទៀត។ លោកក៏បានលើកទឹកចិត្តឱ្យមានការវិនិយោគរបស់អង់គ្លេសបន្ថែមទៀតនៅកម្ពុជា៕
评论被关闭。