សម្ដេចតេជោ ហ៊ុន សែន ជួបពិភាក្សាការងារជាមួយអគ្គនាយកក្រុមហ៊ុន JTI លោក Eddy Pirard
នៅព្រឹកថ្ងៃទី៣ ខែកុម្ភៈ ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានជួបពិភាក្សាការងារជាមួយលោក Eddy Pirard អគ្គនាយក និងជានាយកប្រតិបត្តិក្រុមហ៊ុន Japan Tobacco International (JTI) នៅវិមានព្រឹទ្ធសភា រាជធានីភ្នំពេញ។
ក្នុងឱកាសនៃជំនួប លោក Eddy Pirard បានរាយការណ៍ជូនសម្តេចតេជោពីកិច្ចខិតខំប្រឹងប្រែងរបស់ក្រុមហ៊ុន JTI ក្នុងការចូលរួមចំណែកអភិវឌ្ឍសេដ្ឋកិច្ចនិងសង្គមកម្ពុជា តាមរយៈការទទួលបានចំណាត់ថ្នាក់ល្អ ក្នុងនាមជានិយោជក ក្រុមហ៊ុនប្រតិបត្តិអនុលោមតាមលក្ខន្តិកៈកម្ពុជា ជាពិសេសបានរួមចំណែកលើកស្ទួយបរិស្ថាននៅកម្ពុជា តាមរយៈសកម្មភាពបណ្តុះកូនឈើនិងការធ្វើការជាមួយ សហគមន៍មូលដ្ឋាន ការបណ្តុះបណ្តាលធនធានមនុស្ស ការជ្រើសរើសបុគ្គលិកក្នុងស្រុក និង បានក្លាយជាដៃគូដ៏ល្អជាមួយកម្ពុជាសម្រាប់វឌ្ឍនភាពរួមគ្នា ដោយចាត់ទុកការរីកចម្រើនរបស់កម្ពុជា គឺជាការរីកចម្រើនរបស់ក្រុមហ៊ុន។
ជាការឆ្លើយតប សម្តេចតេជោ ហ៊ុន សែន បានសាទរនិងវាយតម្លៃខ្ពស់ចំពោះភាពជោគជ័យរបស់ក្រុមហ៊ុន JTI នាពេលកន្លងមក ដែលក្រុមហ៊ុនបានធ្វើជាគំរូល្អក្នុងការអនុលោមសារពើពន្ធ និងជាសមាជិកក្រុមធុរជនល្អបំផុត ព្រមទាំងបានចូលរួមក្នុងការអភិវឌ្ឍបៃតងប្រកបដោយចីរភាព និងការទប់ស្កាត់ការប្រែប្រួលអាកាសធាតុ និង ការផ្តល់ប្រព័ន្ធអគ្គិសនីប្រើថាមពលពន្លឺព្រះអាទិត្យនៅបណ្តោយផ្លូវជាតិនានា។
សម្តេចតេជោបានលើកទឹកចិត្តឱ្យក្រុមហ៊ុនបន្តកិច្ចសហប្រតិបត្តិការល្អ និងឱ្យបានជិតស្និទ្ធជាមួយក្រសួងកសិកម្ម រុក្ខាប្រមាញ់ និង នេសាទ ដើម្បីជំរុញកិច្ចសហការសិក្សាស្រាវជ្រាវ ដោយប្រើប្រាស់បច្ចេកវិទ្យានិងបទពិសោធល្អៗ ជាពិសេសបទពិសោធជប៉ុនលើការជ្រើសរើសពូជ ការប្រើប្រាស់ដី និង បច្ចេកទេសកេ្សតសាស្រ្តដាំដុះ ជាពិសេសដីដែលគ្មានឬមានល្បាប់តិចតួច សំដៅជួយកសិករបង្កើនគុណភាពនិងទិន្នផលដាំដុះសន្លឹកថ្នាំជក់នៅកម្ពុជា។ ម្យ៉ាងវិញទៀត ក្រុមហ៊ុនគួរសហការជាមួយសហគមន៍ដាំដុះសន្លឹកថ្នាំជក់ ដែលជាសមាជិកម៉ាកសមូហភាពរបស់ក្រសួងពាណិជ្ជកម្ម សិក្សា បង្កើនការផលិតនិងពង្រីកទីផ្សារនាំចេញ ដើម្បីធានាបាននិរន្តរភាពនៃការដាំដុះក្នុងទម្រង់ភាពជាដៃគូឈ្នះ-ឈ្នះ ផងដែរ។
ទន្ទឹមនឹងនេះ សម្តេចតេជោក៏បានផ្តល់អនុសាសន៍ដល់ក្រុមហ៊ុន JTI ពិនិត្យលទ្ធភាពនិងទាក់ទាញការវិនិយោគបន្ថែមទៀត ជាពិសេសការធ្វើពិពិធកម្មផលិតកម្មលើវិស័យផ្សេងទៀត តួយ៉ាងដូចជាឧស្សាហកម្មឱសថនិងកែច្នៃចំណីអាហារ៕
评论被关闭。