ក្រុមប្រឹក្សាអភិវឌ្ឍន៍កម្ពុជា បើកកិច្ចប្រជុំពង្រឹងការគ្រប់គ្រង និងត្រួតពិនិត្យតាមដានគម្រោងវិនិយោគ
នាព្រឹកថ្ងៃទី៦ ខែកុម្ភៈ ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានបើកកិច្ចប្រជុំពិគ្រោះយោបល់ លើការរៀបចំយន្តការប្រទាក់ក្រឡា និងមានសង្គតិភាពនៃលំហូរការងារ ពីថ្នាក់ជាតិដល់ថ្នាក់ក្រោមជាតិ ជុំវិញការគ្រប់គ្រងការចុះបញ្ជីគម្រោងវិនិយោគ និងការត្រួតពិនិត្យតាមដានការអនុវត្តគម្រោងវិនិយោគ ក្រោមអធិបតីភាពលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។
កិច្ចប្រជុំនេះធ្វើឡើងក្នុងគោលបំណងដើម្បីប្រមូលធាតុចូល ជំរុញការរៀបចំយន្តការប្រទាក់ក្រឡា និងមានសង្គតិភាពនៃលំហូរការងារពីថ្នាក់ជាតិដល់ថ្នាក់ក្រោមជាតិ ជុំវិញការគ្រប់គ្រងការចុះបញ្ជី បង្កើតជាទិន្នន័យប្រមូលផ្ដុំ និង បង្កលក្ខណៈងាយស្រួលក្នុងការត្រួតពិនិត្យ តាមដាន វាយតម្លៃ ការអនុវត្តគម្រោងវិនិយោគ ដោយស្មារតីសហការគ្នាដ៏រស់រវើក ប្រកបដោយសហថាមពល ក្នុងអភិក្រម “ជវភាពនៃប្រព័ន្ធតួអង្គតែមួយ” គាំទ្រការសម្រេចឱ្យបាននូវទិសដៅប្រែក្លាយកម្ពុជាជាប្រទេសដែលមានចំណូលខ្ពស់នៅឆ្នាំ២០៥០។
នៅក្នុងកិច្ចប្រជុំ លោក ស៊ុន ចាន់ថុល បានលើកឡើងអំពីបេសកកម្មនិងចក្ខុវិស័យរបស់ក្រុមប្រឹក្សាអភិវឌ្ឍន៍កម្ពុជា ក្នុងនាមជាសេនាធិការនិងជាច្រកចេញចូលតែមួយរបស់រាជរដ្ឋាភិបាល លើការងារគ្រប់គ្រងការវិនិយោគឯកជននិងតំបន់សេដ្ឋកិច្ចពិសេស។ ក្រុមប្រឹក្សាអភិវឌ្ឍន៍កម្ពុជាបាននិងកំពុងបន្តខិតខំជំរុញការកែលម្អ ក៏ដូចជាធ្វើឱ្យប្រសើរឡើងនូវបរិយាកាសធុរកិច្ចនិងការវិនិយោគ តាមរយៈការជំរុញផ្សព្វផ្សាយនូវច្បាប់ស្ដីពីវិនិយោគ ការគោះទ្វារវិនិយោគនៅក្រៅប្រទេស ព្រមទាំងការសម្រួលនិងធ្វើសាមញ្ញកម្មលើនីតិវិធីពាក់ព័ន្ធនានា ជាពិសេសការធ្វើឌីជីថលភាវូបនីយកម្ម សម្រាប់ការផ្ដល់សេវាសាធារណៈនៅក្នុងស្ថាប័នរដ្ឋ និងការចូលរួមជំរុញការអនុវត្តយុទ្ធសាស្រ្តបញ្ចកោណ-ដំណាក់កាលទី១ ដែលបានកំណត់យកបច្ចេកវិទ្យាជាអាទិភាពគន្លឹះទី៥ ដើម្បីកំណើន ការងារ សមធម៌ ប្រសិទ្ធភាព និង ចីរភាព កសាងមូលដ្ឋានគ្រឹះទៅសម្រេចចក្ខុវិស័យកម្ពុជាឆ្នាំ២០៥០។
អង្គប្រជុំបានធ្វើការពិភាក្សាអំពីវឌ្ឍនភាពការងារ និងបញ្ហាប្រឈមនៃការគ្រប់គ្រងការចុះបញ្ជីវិនិយោគ និងការតាមដានបច្ចុប្បន្នភាពក្នុងក្របខណ្ឌការងារសម្រួលកិច្ចវិនិយោគនៅកម្ពុជា។ អង្គប្រជុំក៏បានធ្វើបទបង្ហាញអំពីប្រព័ន្ធ cdcIPM សម្រាប់ចុះបញ្ជីគម្រោងវិនិយោគ សម្រាប់ថ្នាក់ក្រោមជាតិ និងផែនការធ្វើសន្ធានកម្មជាមួយអន្តរក្រសួង-ស្ថាប័ន តាមគោលការណ៍របស់រាជរដ្ឋាភិបាលកន្លងទៅ។
អង្គប្រជុំក៏បានឯកភាពលើការកំណត់របៀបវារៈការងារបន្ទាប់ ដើម្បីកំណត់នូវយន្តការគតិយុត្តនិងយន្តការបច្ចេកវិទ្យា ដែលមានសង្គតិភាពថ្នាក់ជាតិដល់ថ្នាក់ក្រោមជាតិ ក្នុងអភិក្រម “ជវភាពនៃប្រព័ន្ធតួអង្គតែមួយ” តាមការចង្អុលបង្ហាញរបស់នាយករដ្ឋមន្ត្រីកម្ពុជា។
កិច្ចប្រជុំនេះមានសមាសភាពចូលរួមពីអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា គណៈកម្មាធិការវិនិយោគកម្ពុជា ក្រសួងមហាផ្ទៃ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ រាជធានី-ខេត្តទាំង២៥ ព្រមទាំងមន្ត្រីពាក់ព័ន្ធជាច្រើនរូបផ្សេងទៀត៕
评论被关闭。