សម្ដេចតេជោ ហ៊ុន សែន អញ្ជើញជួបពិភាក្សាការងារជាមួយ ឯកឧត្តមបណ្ឌិត សាយសំផន ភុមវិហាន ប្រធានរដ្ឋសភាឡាវ
នាព្រឹកថ្ងៃទី៦ ខែកុម្ភៈ ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានជួបពិភាក្សាការងារជាមួយលោកបណ្ឌិត សាយសំផន ភុមវិហាន (Xaysomphone Phomvihane) ប្រធានរដ្ឋសភាឡាវ នៅវិមានរដ្ឋសភាឡាវ រដ្ឋធានីវៀងចន្ទន៍។
លោកបណ្ឌិត សាយសំផន ភុមវិហាន បានមានប្រសាសន៍ថា ទស្សនកិច្ចរបស់សម្តេចតេជោ ហ៊ុន សែន នាពេលនេះ មានសារៈសំខាន់បំផុត ដែលនាំមកនូវមេត្រីភាព មិត្តភាព ក្នុងនាមប្រទេសជាប់ភូមិផងរបងជាមួយ និងជាអ្នកជិតខាងល្អ ព្រមទាំងពូនជ្រំទំនាក់ទំនងមិត្តភាពជាប្រពៃណី និងជាដៃគូយុទ្ធសាស្ត្រគ្រប់ជ្រុងជ្រោយនិងយូរអង្វែង។
សម្តេចតេជោ ហ៊ុន សែន បានសម្តែងនូវការអបអរសាទរចំពោះឡាវ ដែលសម្រេចបានដោយជោគជ័យនូវតួនាទីជាប្រធានមហាសន្និបាតអន្តរសភាអាស៊ាន (AIPA) លើកទី៤៥ ជាប្រធានអាស៊ាន និងជាម្ចាស់ផ្ទះរៀបចំកិច្ចប្រជុំកំពូល ACMECS លើកទី១០។
សម្តេចតេជោបានវាយតម្លៃខ្ពស់ចំពោះការរីកចម្រើននៃទំនាក់ទំនងជាបងប្អូន រវាងកម្ពុជានិងឡាវ តាមស្មារតី “ភាពជាដៃគូយុទ្ធសាស្រ្តគ្រប់ជ្រុងជ្រោយនិងយូរអង្វែង”។ សម្តេចបានថ្លែងថា គណបក្សប្រជាជនកម្ពុជាបានគ្របដណ្តប់ប្រមាណ ៤៦ ឆ្នាំនៃទំនាក់ទំនងល្អរវាងប្រទេសទាំងពីរ ទំនាក់ទំនងនេះមានស្ថិរភាពបំផុតនៅក្នុងប្រវត្តិសាស្រ្តរបស់ខ្លួន ចាប់តាំងពីពេលសម្តេចជារដ្ឋមន្រ្តីការបរទេស នាយករដ្ឋមន្រ្តី និង បច្ចុប្បន្នជាប្រធានព្រឹទ្ធសភា។
សម្តេចតេជោបានជំរុញកិច្ចសហប្រតិបត្តិការទ្វេភាគីលើគ្រប់វិស័យ រួមមាន កិច្ចការសន្តិសុខ សេដ្ឋកិច្ច ពាណិជ្ជកម្ម វិនិយោគ និង ថាមពល។ល។ ដោយស្ថាប័ននីតិប្បញ្ញត្តិត្រូវចូលរួមគាំទ្រដល់រដ្ឋាភិបាល។
លោកបណ្ឌិត សាយសំផន ភុមវិហាន បានវាយតម្លៃខ្ពស់ចំពោះភាពជោគជ័យដ៏ធំធេងរបស់កម្ពុជាក្នុងការអភិវឌ្ឍប្រទេស និងបានសម្តែងនូវក្តីរីករាយចំពោះស្នាដៃនៃការដឹកនាំរបស់គណបក្សប្រជាជនកម្ពុជា ដែលសម្រេចបានសមិទ្ធផលលេចធ្លោនិងរួមចំណែកលើកកម្ពស់កិត្យានុភាព និងតួនាទីដ៏សំខាន់របស់កម្ពុជានៅក្នុងតំបន់និងអន្តរជាតិ។
លោកបានលើកឡើងថា រដ្ឋាភិបាលឡាវមានគម្រោងប្រែក្លាយប្រទេសពីប្រទេសមិនជាប់សមុទ្រ (Land lock) ទៅជាប្រទេសតភ្ជាប់ (Land Link) តាមរយៈការតភ្ជាប់ផ្លូវដែកជាមួយប្រទេសជិតខាង ដើម្បីផ្តល់ភាពងាយស្រួលក្នុងការដឹកជញ្ជូនទំនិញចេញចូល និងទាក់ទាញទេសចរមកទស្សនាប្រទេសឡាវ។
លោកក៏បានវាយតម្លៃខ្ពស់ចំពោះទំនាក់ទំនងឡាវ-កម្ពុជា ដោយលោកបានគូសបញ្ជាក់ថា ឡាវនិងកម្ពុជាមានភាពស្និទ្ធស្នាលជាទីបំផុត ដែលបានប្រកៀកស្មាគ្នាជាមិត្តភាពបងប្អូន និងបន្តរក្សាកិច្ចសហប្រតិបត្តិការជាប្រពៃណីនេះ។ ក្នុងនោះ ស្ថាប័ននីតិប្បញ្ញត្តិនៃប្រទេសទាំងពីរ បានបន្តសហការផ្លាស់ប្តូរទស្សនកិច្ចកម្រិតប្រតិភូជាន់ខ្ពស់និងជំនាញ និងបន្តពូនជ្រំ គាំទ្រគ្នាទៅវិញទៅមកនៅវេទិកាតំបន់និងអន្តរជាតិផងដែរ។
លោកសង្ឃឹមថា កិច្ចខិតខំព្យាយាមក្នុងការបន្តអនុវត្តអនុស្សរណៈនៃការយោគយល់គ្នា (MOU) និងកិច្ចព្រមព្រៀងនានា ជាពិសេសលើវិស័យថាមពលនិងសាងសង់ផ្លូវដែកតភ្ជាប់ប្រទេសទាំងពីរ នឹងផ្តល់កាលានុវត្តភាពដល់ទំនាក់ទំនងនិងការជំរុញពាណិជ្ជកម្មឡាវ-កម្ពុជាបន្ថែមទៀត។
សម្តេចតេជោ ហ៊ុន សែន និងលោកបណ្ឌិត សាយសំផន ភុមវិហាន ក៏បានពិភាក្សានិងផ្លាស់ប្តូរយោបល់អំពីបញ្ហាតំបន់និងអន្តរជាតិ ដែលជាអត្ថប្រយោជន៍រួម និងតម្រូវឱ្យបង្កើនការតាមដាននិងយកចិត្តទុកដាក់ផងដែរ។
នៅក្នុងជំនួបនេះផងដែរ ក្នុងនាមសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា សម្តេចតេជា ហ៊ុន សែន បានអញ្ជើញលោកបណ្ឌិត សាយសំផន ភុមវិហាន បំពេញទស្សនកិច្ចនៅកម្ពុជានាពេលវេលាសមស្របណាមួយខាងមុខ៕
评论被关闭。