សម្តេចនាយករដ្ឋមន្ត្រី ហ៊ុន ម៉ាណែត៖ កម្ពុជាត្រៀមដាក់ឱ្យដំណើរការបច្ចេកវិទ្យា 5G
រាជរដ្ឋាភិបាលកម្ពុជាគ្រោងដាក់ឱ្យដំណើរការបច្ចេកវិទ្យាប្រព័ន្ធឥតខ្សែចល័តជំនាន់ទី៥ (5G) នៅកម្ពុជា។ នេះបើយោងតាមការបង្ហើបឱ្យដឹងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅក្នុងពិធីបិទសន្និបាតបូកសរុបលទ្ធផលការងាររយៈពេល ៥ ឆ្នាំរបស់ក្រសួងប្រៃសណីយនិងទូរគមនាគមន៍ កាលពីថ្ងៃទី៦ ខែកុម្ភៈ ឆ្នាំ២០២៥។
សម្តេចធិបតី ហ៊ុន ម៉ាណែត បានស្នើឱ្យក្រសួងប្រៃសណីយនិងទូរគមនាគមន៍ រៀបចំផែនការដាក់ឱ្យដំណើរការសេវាទូរសព្ទ 5G ដើម្បីឱ្យរាជរដ្ឋាភិបាលកំណត់ពេលសមរម្យមួយ ក្នុងការដាក់ឱ្យដំណើរការសេវានេះ នៅក្នុងការអភិវឌ្ឍអាទិភាពនៃវិស័យទូរគមនាគមន៍នៅកម្ពុជា។ សម្តេចចាត់ទុកសេវាទូរសព្ទនិងអ៊ីនធឺណិត គឺជាសេវាចាំបាច់ដូចសេវាផ្គត់ផ្គង់ទឹកនិងអគ្គិសនីដែរ និងបានស្នើឱ្យអាជ្ញាធរពាក់ព័ន្ធទាំងអស់ចូលរួមសហការគ្នាយ៉ាងជិតស្និទ្ធ ក្នុងការសម្រួលនិងពន្លឿននីតិវិធីកិច្ចការសាងសង់ហេដ្ឋារចនាសម្ព័ន្ទតភ្ជាប់ឌីជីថល។
កន្លងមកមានការលើកឡើងថា អង់តែនទូរសព្ទចល័តធ្វើឱ្យមានបញ្ហាសុខភាពដល់អ្នកនៅជុំវិញ ជាហេតុធ្វើឱ្យប៉ះពាល់ដល់ដំណើរការដំឡើងអង់តែន។ សម្តេចធិបតីបានបញ្ជាក់ប្រាប់ពលរដ្ឋកុំឱ្យមានការបារម្ភ ដ្បិតតាមការសិក្សារបស់អង្គការសុខភាពពិភពលោក (WHO) បង្ហាញថា មកទល់ពេលនេះ ពុំមានភស្តុតាងវិទ្យាសាស្ត្រណាមួយដែលបង្ហាញថា ស្ថានីយ៍អង់តែនទូរសព្ទចល័តមានផលប៉ះពាល់ដល់សុខភាពប្រជាពលរដ្ឋនោះទេ។ ម្យ៉ាងទៀត បើសិនជាមានការប៉ះពាល់ដល់សុខភាពពិតមែន ប្រទេសទាំងអស់ដែលជាប្រទេសអភិវឌ្ឍ នឹងមិនប្រើប្រាស់ទូរសព្ទចល័តទៀតឡើយ។
សម្តេចធិបតី ហ៊ុន ម៉ាណែត ជំរុញឱ្យក្រសួងប្រៃសណីយនិងទូរគមនាគមន៍ រៀបចំអង់តែនទូរសព្ទចល័តដោយមានផែនការមេនៅក្នុងការកំណត់ទីតាំងឱ្យបានច្បាស់លាស់ ដើម្បីជៀសវាងការរៀបចំដំឡើងខុស ដែលនាំដល់ការខាតបង់ទាំងពេលវេលានិងថវិកា៕
评论被关闭。