សម្តេចធិបតី ហ៊ុន ម៉ាណែត ជួបពិភាក្សាការងារជាមួយប្រធានព្រឹទ្ធសភាហ្វីលីពីន Francis G. Escudero
នារសៀលថ្ងៃទី១១ ខែកុម្ភៈ ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានជួបពិភាក្សាការងារជាមួយលោក Francis G. Escudero ប្រធានព្រឹទ្ធសភាហ្វីលីពីន នៅក្នុងឱកាសនៃដំណើរទស្សនកិច្ចផ្លូវការនៅទីក្រុងម៉ានីល ប្រទេសហ្វីលីពីន។
ក្នុងឱកាសនៃជំនួប លោក Francis G. Escudero បានវាយតម្លៃខ្ពស់អំពីលទ្ធផលប្រកបដោយផ្លែផ្កានៃកិច្ចសហប្រតិបត្តិការ និងទំនាក់ទំនងដ៏ល្អប្រសើររវាងហ្វីលីពីន-កម្ពុជា។ លោកសង្ឃឹមយ៉ាងមុតមាំថា បន្ទាប់ពីដំណើរទស្សនកិច្ចនេះ ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ នឹងកាន់តែមានភាពសកម្ម និងរីកចម្រើនបន្ថែមទៀត។ លើសពីនេះ ការអនុវត្តអនុស្សរណៈនៃការយោគយល់គ្នា និងកិច្ចព្រមព្រៀងទាំង ៨ ដែលត្រូវបានចុះហត្ថលេខាដោយទ្វេភាគី ហ្វីលីពីន-កម្ពុជា នឹងសម្រេចបាននូវលទ្ធផលល្អប្រសើរ សម្រាប់ជាឧត្តមប្រយោជន៍ដល់ប្រជាជាតិនៃប្រទេសទាំងពីរ។
ជាការឆ្លើយតប សម្ដេចធិបតី ហ៊ុន ម៉ាណែត បានបង្ហាញនូវសេចក្ដីសោមនស្សរីករាយ ចំពោះផ្លែផ្កានៃកិច្ចប្រជុំទ្វេភាគី រវាងសម្ដេចនិងលោកប្រធានាធិបតីហ្វីលីពីន Ferdinand R. Marcos Jr.។ សម្ដេចបានវាយតម្លៃខ្ពស់ចំពោះទំនាក់ទំនងដ៏ល្អ និងយូរលង់រវាងកម្ពុជា និងហ្វីលីពីន និងមានជំនឿយ៉ាងមុតមាំថា កិច្ចសហប្រតិបត្តិការទ្វេភាគី នឹងបន្តទទួលបានលទ្ធផលកាន់តែល្អប្រសើរ។
សម្តេចធិបតីបានគូសបញ្ជាក់ថា បន្ថែមលើផ្នែកនយោបាយនិងការទូត ទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរ នៅមានលំហច្រើនដែលជាកាលានុវត្តភាពប្រកបដោយសក្កានុពល ដើម្បីជំរុញល្បឿននៃកិច្ចសហប្រតិបត្តិការកម្ពុជា-ហ្វីលីពីន។ ក្នុងន័យនេះ កម្ពុជាអាចក្លាយជាដៃគូប្រកបដោយសក្កានុពលក្នុងការចូលរួមធានាសន្តិសុខស្បៀងនៃប្រទេសហ្វីលីពីន ជាពិសេសតាមរយៈអតិរេកស្រូវអង្ករដែលកម្ពុជាមាន ជាមួយនឹងគុណភាពខ្ពស់និងតម្លៃប្រកួតប្រជែង។
សម្ដេចធិបតី ហ៊ុន ម៉ាណែត និងលោក Francis G. Escudero ក៏បានពិភាក្សាផងដែរអំពីការជំរុញទំនាក់ទំនងរវាងប្រជាជន និងប្រជាជន និងការតភ្ជាប់ជើងហោះហើរត្រង់រវាងកម្ពុជា និងហ្វីលីពីន បន្ថែមលើជើងហោះហើរដែលមានស្រាប់ ជាពិសេសម៉ានីល-សៀមរាប-ម៉ានីល និងសេប៊ូ-សៀមរាប-សេប៊ូ ដើម្បីបង្កើតជាសហថាមពលក្នុងការលើកកម្ពស់វិស័យទេសចរណ៍ តាមរយៈការទាក់ទាញភ្ញៀវទេសចរនានាពីក្រៅតំបន់ ឱ្យមកធ្វើទេសចរណ៍នៅក្នុងប្រទេសទាំងពីរនិងតំបន់អាស៊ាន។
មុននឹងបញ្ចប់ សម្ដេចធិបតី ហ៊ុន ម៉ាណែត ក៏បានអញ្ជើញលោក Francis G. Escudero និងសមាជិកព្រឹទ្ធសភាហ្វីលីពីន បំពេញទស្សនកិច្ចនៅប្រទេសកម្ពុជាក្នុងពេលវេលាសមស្របណាមួយ កម្ពុជានឹងរង់ចាំទទួលស្វាគមន៍គណៈប្រតិភូព្រឹទ្ធសភាហ្វីលីពីនយ៉ាងកក់ក្តៅជានិច្ច៕
评论被关闭。