ក្រុមហ៊ុន Excellent Associates Group បង្ហាញពីបំណងវិនិយោគឧស្សាហកម្មនៅកម្ពុជា

ក្រុមហ៊ុន Excellent Associates Group Limited បានបង្ហាញ​ពីចំណាប់​អារម្មណ៍​ក្នុងការ​ស្វែងរកឱកាស​វិនិយោគ​នៅកម្ពុជា ដោតផ្តោតលើ​ការវិនិយោគ​សួនឧស្សាហកម្ម​និងកសិ-ឧស្សាហ​កម្ម។

ការលើកឡើង​នេះធ្វើឡើង​ក្នុងជំនួប​រវាង​សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា ជាមួយ​លោក Dai Jianlaing ប្រធាន​ក្រុមហ៊ុន Excellent Associates Group កាលពីថ្ងៃទី១០ ខែកុម្ភៈ ឆ្នាំ២០២៥ នៅទីក្រុង​ម៉ានីល ប្រទេស​ហ្វីលីពីន។

ក្នុងឱកាស​នៃជំនួប លោក Dai Jianlaing បានជម្រាបជូន​សម្តេចធិបតី​អំពី​ប្រតិបត្តិការ​និងវឌ្ឍនភាព​របស់​ក្រុមហ៊ុន និងបាន​បង្ហាញ​ពីចំណាប់​អារម្មណ៍​ស្វែងរក​ឱកាស​វិនិយោគ​នៅកម្ពុជា​ ដែលរួមមា​ន​ការវិនិយោគ​សួនឧស្សាហកម្ម​និងកសិ-ឧស្សាហ​កម្ម ព្រមទាំង​ការកែច្នៃ​និងនាំចេញ​អង្ករទៅកាន់​ទីផ្សារ​សំខាន់ៗ​មួយចំនួន ដូចជា​ទីក្រុង​ហុងកុង ប្រទេសចិន និងទីផ្សារ​ដទៃទៀត​នាពេល​អនាគត​ ព្រោះ​អង្ករ​កម្ពុជា​មានគុណភាព​ខ្ពស់ និងទទួលបាន​ចំណាត់ថ្នាក់​ល្អច្រើនឆ្នាំ​ជាប់ៗគ្នា។

Excellent Associates Group ជាក្រុមហ៊ុន​ដែលធ្វើ​ប្រតិបត្តិការ​ពាណិជ្ជកម្ម​លើវិស័យ​សំណង់ ឧស្សាហកម្ម​រ៉ែ ការផលិត​ដែក សំណ និង ស័ង្កសី។ល។

ជាការ​ឆ្លើយតប សម្តេចធិបតី ហ៊ុន ម៉ាណែត បានបង្ហាញ​ក្តីសោមនស្ស​ចំពោះ​ចំណាប់​អារម្មណ៍​របស់​ក្រុមហ៊ុន ដែលមាន​បំណង​ស្វែងរក​ឱកាស​វិនិយោគ​នៅកម្ពុជា ខណៈរាជរដ្ឋាភិបាល​កម្ពុជា​បានដាក់ចេញ​នូវគោលនយោបាយ​​និង​វិធានការ ក្នុងការ​គាំទ្រ​ដល់ការរៀបចំ​បង្កើត​តំបន់​សេដ្ឋកិច្ច​ពិសេស។​

ពាក់ព័ន្ធ​នឹង​វិស័យ​កសិ-ឧស្សាហកម្ម​ សម្តេចធិបតី​បានលើក​ទឹកចិត្ត​ឱ្យក្រុមហ៊ុន​ពិចារណា​ការវិនិយោគ​លើទំនិញ​កសិ-ឧស្សាហកម្ម​មួយចំនួន​បន្ថែមទៀត ដែលអាច​ចូលរួម​បំពេញ​តម្រូវការ​ក្នុងច្រវាក់​ផលិតកម្ម​នៃវិស័យ​កសិកម្ម ក៏ដូចជា​ការផលិត​ជីបែប​ធម្មជាតិ​និងជីគីមី​ជាដើម៕