ក្រសួងមហាផ្ទៃកម្ពុជាចាត់វិធានការម៉ឺងម៉ាត់ ចំពោះកម្ចីអនឡាញខុសច្បាប់! “អ្នកខ្ចីកុំបាច់សង” “បើគេរករឿង ប្តឹងសមត្ថកិច្ច”
លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានដាក់ចេញវិធានការយ៉ាងម៉ឺងម៉ាត់ ចំពោះកម្ចីអនឡាញខុសច្បាប់ ថែមទាំងផ្តល់នូវការការពារដល់ជនរងគ្រោះពីកម្ចីអនឡាញខុសច្បាប់ទៀតផង។
ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំរបស់ក្រសួងមហាផ្ទៃ នារសៀលថ្ងៃទី១៣ ខែកុម្ភៈ ឆ្នាំ២០២៥ លោក ស សុខា បានចាត់ទុកកម្ចីអនឡាញកំពុងក្លាយជាអន្ទាក់បំណុលក្នុងសម័យឌីជីថល និងបានបញ្ជាឱ្យអាជ្ញាធរមានសមត្ថកិច្ចគ្រប់ជាន់ថ្នាក់ ទប់ស្កាត់កុំឱ្យមានកម្ចីប្រាក់ខុសច្បាប់ ពិសេសកម្ចីអនឡាញពីជនបរទេស។ លោកក៏បានបញ្ជាក់ប្រាប់ពលរដ្ឋដែលខ្ចីប្រាក់តាមអនឡាញខុសច្បាប់នេះ កុំបាច់សង បើគេរករឿង អាចប្ដឹងមកសមត្ថកិច្ច។
លោកថែមទាំងបានផ្តល់ការណែនាំដល់រដ្ឋបាលរាជធានី-ខេត្ត ក្រុង ស្រុក ខណ្ឌ នៅទូទាំងប្រទេស បន្តផ្សព្វផ្សាយអប់រំឱ្យបានទូលំទូលាយដល់ប្រជាពលរដ្ឋ និងចូលរួមអនុវត្តឱ្យបានក្នុងការទប់ស្កាត់កុំឱ្យមានការខ្ចីប្រាក់ខុសច្បាប់ ការខ្ចីប្រាក់ពីក្រុមជនបរទេស និង ការខ្ចីប្រាក់ដែលមានកម្រិតនៃការដាក់គំនាបទៅលើអ្នកខ្ចីខុសពីច្បាប់បានកំណត់។ល។
ប៉ុន្តែ លោក ស សុខា ក៏បានណែនាំបែងចែកឱ្យដាច់រវាងកម្ចីជាមួយស្ថាប័នមីក្រូហិរញ្ញវត្ថុ ឬអង្គភាពផ្តល់ប្រាក់កម្ចី ដែលធ្វើប្រតិបត្តិការស្របតាមច្បាប់ និងកម្ចីជាលក្ខណៈឯកជនបុគ្គលនិងបុគ្គល ដែលផ្ទុយពីកម្ចីខុសច្បាប់នោះ គឺត្រូវតែមានកាតព្វកិច្ចសងទៅតាមច្បាប់និងការព្រមព្រៀង៕
评论被关闭。