ជំនួបរវាងលោក ស សុខា ជាមួយសមភាគីវៀតណាម ផ្ដោតលើសន្តិសុខព្រំដែនដោយសន្តិភាពនិងការអភិវឌ្ឍ
លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានបញ្ចប់ដំណើរទស្សនកិច្ចផ្លូវការនៅប្រទេសវៀតណាម ដោយដំណើរទស្សនកិច្ចនេះផ្តោតលើការពង្រឹងកិច្ចការពារ និងថែរក្សាសន្តិសុខនិងការអភិវឌ្ឍនៅតាមព្រំដែននៃប្រទេសទាំងពីរ។ នេះបើយោងតាមលោក រ៉េន រតនៈ ជំនួយការនិងជាអ្នកនាំពាក្យផ្ទាល់របស់លោក ស សុខា។
លោក រ៉េន រតនៈ បានលើកឡើងថា ទស្សនៈកិច្ចរយៈពេល ២ ថ្ងៃ (១៨-១៩ កុម្ភៈ ២០២៥) បានធ្វើឱ្យកិច្ចសហប្រតិបត្តិការកម្ពុជា-វៀតណាមក្នុងវិស័យមហាផ្ទៃ បានបន្តបោះជំហានប្រកបដោយវឌ្ឍនភាពជូនរដ្ឋាភិបាលនិងប្រជាជននៃប្រទេសទាំងពីរ។
លោកបានឱ្យដឹងថា ក្នុងជំនួបចង្អៀតនិងកិច្ចប្រជុំទ្វេភាគី លោក ស សុខា និងលោក លឿង តាមក្វាង សមាជិកការិយាល័យនយោបាយ និងជារដ្ឋមន្រ្តីក្រសួងនគរបាលវៀតណាម បានពិភាក្សានិងផ្លាស់ប្ដូរយោបល់គ្នាត្រង់ទៅត្រង់មកអំពីបទពិសោធន៍ និងលទ្ធផលនៃកិច្ចសហប្រតិបត្តិការក្នុងឆ្នាំ២០២៤ កន្លងទៅ ព្រមទាំងទិសដៅបន្តសម្រាប់ឆ្នាំ២០២៥។ ភាគីទាំងពីរបានពិភាក្សាគ្នាដោយផ្ដោតលើការថែរក្សាសន្តិសុខតាមខ្សែបន្ទាត់ព្រំដែន ការអនុវត្តច្បាប់ ការផ្លាស់ប្ដូរព័ត៌មាន ការបណ្ដុះបណ្ដាលធនធានមនុស្ស ព្រមទាំងសភាពការណ៍តំបន់និងពិភពលោក ដោយភាគីទាំងពីរបានបង្ហាញការពេញចិត្តចំពោះលទ្ធផលសម្រេចបានក្នុងស្ថានភាពពិភពលោកមានការប្រឈមនឹងបញ្ហាស្មុគស្មាញ ទាំងបទល្មើសមិនប្រពៃណី ដូចជាអំពើឆបោកតាមអនឡាញ និងអំពើជួញដូរមនុស្ស រួមទាំងបញ្ហាសង្គ្រាមប្រដាប់អាវុធនិងការប្រកួតប្រជែងភូមិសាស្រ្តនយោបាយ។
ភាគីទាំងពីរបានចុះហត្ថលេខាលើផែនការសហប្រតិបត្តិការសម្រាប់ឆ្នាំ២០២៥ ចំនួន ៥៖ ១. កិច្ចសហប្រតិបត្តិការការពារសន្តិសុខជាតិ កសាងខ្សែបន្ទាត់ព្រំដែនសន្តិភាព មិត្តភាព ស្ថិរភាព និង អភិវឌ្ឍន៍។ ២. កិច្ចសហប្រតិបត្តិការបង្ការ បង្ក្រាបឧក្រិដ្ឋកម្ម រក្សាសណ្ដាប់ធ្នាប់និងសុវត្ថិភាពសង្គម។ ៣. កិច្ចសហប្រតិបត្តិការផ្លាស់ប្ដូរគណៈប្រតិភូបំពេញទស្សនកិច្ចការងារនិងព្យាបាលជំងឺ។ ៤. កិច្ចសហប្រតិបត្តិការបណ្ដុះបណ្ដាលនិងបំពាក់បំប៉នមន្រ្តី។ ៥. កិច្ចសហប្រតិបត្តិការវិស័យភស្តុភារនិងសម្ភារៈបច្ចេកទេស។
ក្នុងអំឡុងពេលបំពេញទស្សនកិច្ចនេះ លោក ស សុខា ក៏បានជួបពិភាក្សាការងារជាមួយលោក ផាម មិញជិញ នាយករដ្ឋមន្រ្តីវៀតណាម ដើម្បីជំរុញទំនាក់ទំនង មិត្តភាព និង កិច្ចសហប្រតិបត្តិការទ្វេភាគី កម្ពុជា-វៀតណាមឱ្យកាន់តែល្អប្រសើរថែមទៀត៕
评论被关闭。