កោះខ្យងជារមណីយដ្ឋានដ៏មានសក្តានុពលទេសចរណ៍ ក្នុងខេត្តកោះកុង
កោះខ្យងជាតំបន់ទេសចរណ៍ធម្មជាតិស្រស់ស្អាតដ៏មានសក្តានុពលទេសចរណ៍មួយ ដែលមានទីតាំងស្ថិតនៅភូមិខ្សាច់ក្រហម ឃុំជីខក្រោម ស្រុកស្រែអំបិល ខេត្តកោះកុង មានចម្ងាយជាង ១០ គីឡូម៉ែត្រពីទីរួមស្រុកស្រែអំបិល។
កោះខ្យងគឺជាប្រជុំកោះតូចៗចំនួន ៣ ជាប់ៗគ្នា ដែលរំលេចខ្លួននៅលើផ្ទៃសមុទ្រយ៉ាងស្រស់ស្អាត។ ដើមដូងខ្ពស់ទាបជាច្រើនបានដុះដេរដាសនៅលើកូនកោះទាំងនេះ ទឹកសមុទ្រថ្លាឈ្វេង អមដោយខ្យល់អាកាសបរិសុទ្ធ គឺជាបរិយាកាសដែលស័ក្តិសមសម្រាប់ការបោះតង់សម្រាកលម្ហែ។ ក្រៅពីការសម្រាកលម្ហែនិងគយគន់ទេសភាពធម្មជាតិនៅកោះខ្យង ភ្ញៀវទេសចរក៏អាចទស្សនាចម្ការផ្លែឈើធម្មជាតិ រួមមានចម្ការទុរេននិងសាវម៉ាវរាប់សិបហិកតា ដែលដាំដុះនៅក្នុងសហគមន៍ផងដែរ។ មិនត្រឹមតែប៉ុណ្ណោះ កោះខ្យងក៏ជាទីកន្លែងមួយដែលសម្បូរទៅដោយគ្រឿងសមុទ្រ មានដូចជាបង្គារ ក្តាម មឹក បង្កង និង ត្រីសមុទ្រជាច្រើនទៀត។
ដើម្បីទៅដល់កោះខ្យង អ្នកទេសចរអាចធ្វើដំណើរថ្មើរជើងឆ្លងកាត់ផ្លូវភក់ប្រមាណ ១ គីឡូម៉ែត្រ ដែលមានទេសភាពដើមកោងកាងយ៉ាងស្រស់ត្រកាលដុះអមសងខាងផ្លូវ និងជម្រើសមួយទៀតគឺការធ្វើដំណើរតាមទូកចេញពីផ្ទះប្រជាសហគមន៍៕