ក្រសួងអប់រំនឹងប្រើប្រាស់ AI ក្នុងការបង្រៀន ដើម្បីដោះស្រាយបញ្ហាខ្វះគ្រូនិងបន្ទប់រៀន
លោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា បានប្រកាសថាក្រសួងអប់រំនឹងដាក់ឱ្យប្រើប្រាស់សាលាឌីជីថលកម្ពុជា ដែលនឹងប្រើប្រាស់បញ្ញាសិប្បនិម្មិត (AI) ដើម្បីដោះស្រាយបញ្ហាខ្វះគ្រូនិងបន្ទប់រៀន និងជួយឱ្យសិស្សទទួលបានចំណេះដឹងថ្មីៗទាន់ពេលវេលា ឈានទៅរកគុណភាពអប់រំទាន់និន្នាការសកល។
លោក ហង់ជូន ណារ៉ុន បានថ្លែងក្នុងសន្និបាតបូកសរុបការងារអប់រំ យុវជន និង កីឡាឆ្នាំសិក្សា ២០២៣-២០២៤ និងទិសដៅឆ្នាំបន្ទាប់ នៅថ្ងៃទី២៤ ខែកុម្ភៈ ឆ្នាំ២០២៥ នេះថា ក្រសួងអប់រំនឹងដាក់ឱ្យប្រើប្រាស់សាលាឌីជីថលនៅថ្ងៃនេះ ដើម្បីឆ្លើយតបនឹងការប្រែប្រួលយ៉ាងឆាប់រហ័សនៃបច្ចេកវិទ្យា AI មកលើប្រព័ន្ធអប់រំនៅក្នុងរយៈពេល ២ ទៅ ៣ ឆ្នាំខាងមុខ។
លោកបានលើកឡើងថា ការប្រើប្រាស់ AI ក្នុងប្រព័ន្ធអប់រំ នឹងជួយកែលម្អនូវគុណភាពអប់រំនៅកម្ពុជា ដើម្បីឱ្យយុវជននៅកម្ពុជាអាចទទួលបាននូវបំណិនឌីជីថលនិងបំណិន AI ដោយគ្រាន់តែប្រើប្រាស់ទូរសព្ធដៃដើម្បីធ្វើការសិក្សា ហើយកាត់បន្ថយនូវការវិនិយោគលើហេដ្ឋារចនាសម្ព័ន្ធរឹងដែលមានតម្លៃខ្ពស់។
លោក ហង់ជូន ណារ៉ុន បានបន្ថែមថា កន្លងទៅក្រសួងបានបញ្ជ្រាបការបណ្ដុះបណ្ដាលពីការប្រើប្រាស់ AI នៅតាមគ្រឹះស្ថានបណ្ដុះបណ្ដាលគ្រូនិងសាលារៀនជំនាន់ថ្មីរួចហើយ ខណៈកំពុងរៀបចំកម្មវិធីបណ្ដុះបណ្ដាលបរិញ្ញាបត្រ AI, Cyber Security និង វិទ្យាសាស្ត្រទិន្នន័យនៅវិទ្យាស្ថានបច្ចេកវិទ្យាកម្ពុជា។ បន្ថែមលើនេះ ថ្នាលបច្ចេកវិទ្យា AI មួយដែលអាចឱ្យយុវជនកម្ពុជាចូលប្រើប្រាស់ ក៏បានរៀបចំហើយផងដែរ។
កន្លងទៅក្រសួងអប់រំបានដាក់ឱ្យអនុវត្តនូវយុទ្ធសាស្ត្រអប់រំឌីជីថលសម្រាប់សាលារៀន ក្នុងគោលដៅលើកកម្ពស់អក្ខរកម្មឌីជីថល ការអនុវត្តប្រព័ន្ធគ្រប់គ្រងការសិក្សា ការផ្សព្វផ្សាយកម្មវិធីតម្រង់ទិសសិក្សា ដោយបានវិនិយោគលើហេដ្ឋារចនាសម្ព័ន្ធសម្រាប់ការបណ្ដុះបណ្ដាលនេះជាច្រើន ដែលជាជោគជ័យមួយក្នុងការផ្លាស់មកចាប់ប្រព័ន្ធឌីជីថលក្នុងពេលមានឆ្លងជំងឺរាតត្បាតកូវីដ-១៩។
ជាលទ្ធផល ថ្នាលអភិវឌ្ឍសមត្ថភាពវិជ្ជាជីវៈជាប្រចាំបង្កើតបានវគ្គសិក្សាចំនួន ១០ វគ្គ និងមានអ្នកប្រើប្រាស់ ២៤ ៥៦៩ នាក់ ក្នុងនោះស្រី ១២ ០០៣ នាក់។ អ្នកប្រើប្រាស់ថ្នាលសាលាឌីជីថលមានចំនួន ៩៦ ២៦០ នាក់ សាលារៀនចំនួន ៤៨៥ សាលា។ អ្នកប្រើប្រាស់កម្មវិធី «ត្រីវិស័យ» មានចំនួន ១២៤ ៥៣៩ គណនី និងមានអ្នកចូលទស្សនាចំនួន ៤៤៣ ៨០៧ ដង។ កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (BEEP) មានអ្នកបានបញ្ចប់ការសិក្សាចំនួន ៤៨២ នាក់ ក្នុងនោះស្រី ៤០%៕
评论被关闭。