សម្តេចធិបតី ហ៊ុន ម៉ាណែត អរគុណរដ្ឋាភិបាលចិន ដែលតែងតែជួយគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា
នាព្រឹកថ្ងៃទី២៤ ខែកុម្ភៈ ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជួបពិភាក្សាការងារជាមួយលោក អ៊ីន លី (Yin Li) សមាជិកការិយាល័យនយោបាយមជ្ឈិមបក្សកុម្មុយនីស្តចិន និងជាលេខាធិការបក្សនៃគណៈកម្មកាធិការមជ្ឈិមបក្សកុម្មុយនីស្តប្រចាំរដ្ឋធានីប៉េកាំង នៅវិមានសន្តិភាព រាជធានីភ្នំពេញ។
ក្នុងឱកាសនៃជំនួប លោក អ៊ីន លី បានកោតសរសើរនិងបង្ហាញនូវចំណាប់អារម្មណ៍ជាខ្លាំង ចំពោះការរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា ជាពិសេសការបន្តរក្សាបាននូវសន្ដិភាព ស្ថិរភាពនយោបាយ ការអភិវឌ្ឍសង្គម-សេដ្ឋកិច្ច និង ការធ្វើឱ្យប្រសើរឡើងនូវកម្រិតជីវភាពរស់នៅរបស់ប្រជាជន។ លោកជឿជាក់ថា ក្រោមការដឹកនាំប្រកបដោយភាពឈ្លាសវៃរបស់សម្ដេចធិបតី ហ៊ុន ម៉ាណែត សេដ្ឋកិច្ចកម្ពុជានឹងបន្តរីកចម្រើននិងកាន់តែខ្លាំងក្លាថែមទៀត។
លោកបានវាយតម្លៃខ្ពស់ចំពោះចំណងមិត្តភាពជាប្រពៃណីរវាងប្រទេសទាំងពីរ ក៏ដូចជាភាពរីកចម្រើននៃទំនាក់ទំនងគ្រប់កម្រិត និងកិច្ចសហប្រតិបត្តិការលើគ្រប់វិស័យចិន-កម្ពុជា ក្នុងក្របខណ្ឌរដ្ឋ បក្ស និង ប្រជាជន។
លោក អ៊ីន លី ក៏បានឱ្យដឹងផងដែរអំពីគោលបំណងនៃដំណើរទស្សនកិច្ចរបស់លោក និងគណៈប្រតិភូនាពេលនេះ គឺដើម្បីចូលរួមអនុវត្តឱ្យកាន់តែស៊ីជម្រៅ និងខ្លាំងក្លាថែមទៀតនូវរាល់ការឯកភាពរបស់ថ្នាក់ដឹកនាំកំពូលនៃប្រទេសទាំងពីរ និងការបន្តជំរុញកិច្ចសហប្រតិបត្តិការជាក់ស្ដែង។ លោកក៏បានគូសបញ្ជាក់ថា រដ្ឋធានីប៉េកាំងមានបំណងពង្រីកកិច្ចសហប្រតិបត្តិការជាមួយរដ្ឋបាលរាជធានីភ្នំពេញ រដ្ឋបាលខេត្តសៀមរាប និង បណ្ដារដ្ឋបាលខេត្តផ្សេងៗទៀតផងដែរ។
ជាការឆ្លើយតប សម្ដេចធិបតី ហ៊ុន ម៉ាណែត បានសម្ដែងនូវការពេញចិត្ត និងវាយតម្លៃខ្ពស់ចំពោះភាពរីកចម្រើននៃទំនាក់ទំនងគ្រប់កម្រិត និងកិច្ចហប្រតិបត្តិការលើគ្រប់វិស័យរវាងកម្ពុជានិងចិន។ សម្តេចក៏បានអរគុណរដ្ឋាភិបាលចិន ដែលតែងតែជួយគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា និងអរគុណចំពោះវិនិយោគិនចិនដែលកន្លងមកបានបណ្ដាក់ទុនវិនិយោគជាច្រើននៅកម្ពុជា រួមមាន ការកសាងហេដ្ឋារចនាសម្ព័ន្ធរូបវន្ត ដូចជាការកសាងផ្លូវល្បឿនលឿន អាកាសយានដ្ឋានអន្តរជាតិសៀមរាប-អង្គរ និង ការអភិវឌ្ឍតំបន់សេដ្ឋកិច្ចពិសេសជាដើម។
ក្នុងឱកាសនៃជំនួបនេះផងដែរ សម្ដេចធិបតី ហ៊ុន ម៉ាណែត និងលោក អ៊ីន លី ក៏បានពិភាក្សាអំពីការបន្តពង្រឹងនិងពង្រីកទំនាក់ទំនង និងកិច្ចសហប្រតិបត្តិការកម្ពុជា-ចិនលើវិស័យសក្ដានុពលជាច្រើន រួមមានវិស័យនយោបាយ សេដ្ឋកិច្ច ពាណិជ្ជកម្ម វិនិយោគ បច្ចេកវិទ្យាឌីជីថល វប្បធម៌-សិល្បៈ ទេសចរណ៍ និង ការផ្លាស់ប្ដូររវាងប្រជាជននិងប្រជាជន។
លោក អ៊ីន លី ដឹកនាំគណៈប្រតិភូបក្សកុម្មុយនីស្តចិនមកបំពេញទស្សនកិច្ចផ្លូវការនៅកម្ពុជា គឺតបតាមការអញ្ជើញរបស់គណបក្សប្រជាជនកម្ពុជា៕
评论被关闭。