កម្ពុជាបង្កើតគណៈកម្មាធិការចំពោះកិច្ច ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដឹកនាំដោយនាយករដ្ឋមន្ត្រីផ្ទាល់
រាជរដ្ឋាភិបាលកម្ពុជាបានសម្រេចបង្កើតគណៈកម្មាធិការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE SCAMS) ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាជាប្រធានដឹកនាំផ្ទាល់។
យោងតាមសេចក្តីសម្រេចស្តីពី ការបង្កើតគណៈកម្មាធិការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) របស់រាជរដ្ឋាភិបាលកម្ពុជា ចុះថ្ងៃទី២០ ខែកុម្ភៈ ឆ្នាំ២០២៥ គ.ប.ឆ.ប. មានភារកិច្ចដាក់ចេញវិធានការក្នុងការបង្ការ ទប់ស្កាត់ និង បង្ក្រាបការឆបោកតាមប្រព័ន្ធបច្ចេកវិទ្យា។ ផ្តល់ការណែនាំ សម្របសម្រួល គាំទ្រ និង អន្តរាគមន៍ចាំបាច់នានា ដើម្បីជំរុញការអនុវត្តរបស់ក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និង សមត្ថកិច្ចដែលពាក់ព័ន្ធក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ឱ្យមានប្រសិទ្ធភាពខ្ពស់។ តាមដាន ត្រួតពិនិត្យ និង វាយតម្លៃការអនុវត្តរបស់ក្រសួង ស្ថាប័ន អង្គភាព រដ្ឋបាលថ្នាក់ក្រោមជាតិ និង សមត្ថកិច្ចដែលពាក់ព័ន្ធក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។ ធ្វើសហប្រតិបត្តិការជាមួយបណ្តាប្រទេសពាក់ព័ន្ធ ដើម្បីប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។ អនុវត្តភារកិច្ចផ្សេងៗទៀតតាមការចាំបាច់ ដើម្បីធានាប្រសិទ្ធភាពនៃការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា។
គ.ប.ឆ.ប. មានអនុប្រធានចំនួន ៨ រូប រួមមានលោកឧបនាយករដ្ឋមន្ត្រី នេត សាវឿន លោកឧបនាយករដ្ឋមន្ត្រី រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ប្រាក់ សុខុន លោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ អូន ព័ន្ធមុនីរ័ត្ន លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា លោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ សីហា លោកឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ កើត រិទ្ធ លោកទេសរដ្ឋមន្ត្រី ឱម យ៉ិនទៀង និង លោកទេសរដ្ឋមន្ត្រី ឆៃ ស៊ីណារិទ្ធ ក្នុងនោះលោក ឆៃ ស៊ីណា ជាអនុប្រធានប្រចាំការ និងមានសមាជិកចំនួន ១៦ រូបផ្សេងទៀតដែលមានសមាសភាពមកពីក្រសួង (រដ្ឋមន្ត្រី រដ្ឋលេខាធិការ) កងយោធពលខេមរភូមិន្ទ នគរបាលជាតិ កងទ័ពជើងគោក កងរាជអាវុធហត្ថលើផ្ទៃប្រទេស អគ្គនាយកដ្ឋានអន្តោប្រវេសន៍ អគ្គនាយកដ្ឋានអត្តសញ្ញាណកម្ម គណៈកម្មការគ្រប់គ្រងល្បែងពាណិជ្ជកម្មកម្ពុជា និង រដ្ឋបាលរាជធានី-ខេត្ត៕
评论被关闭。