សម្តេចធិបតី ហ៊ុន ម៉ាណែត ជួបពិភាក្សាការងារជាមួយឧបការីរដ្ឋមន្ត្រី ក្រសួងសន្តិសុខសាធារណៈចិន លីវ ចុងអ៊ី
នាព្រឹកថ្ងៃទី២៦ ខែកុម្ភៈ ឆ្នាំ២០២៥ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជួបពិភាក្សាការងារជាមួយលោក លីវ ចុងអ៊ី (Liu Zhongyi) ឧបការីរដ្ឋមន្ត្រីក្រសួងសន្តិសុខសាធារណៈនៃសាធារណរដ្ឋប្រជាមានិតចិន នៅវិមានសន្តិភាព រាជធានីភ្នំពេញ។
ក្នុងឱកាសនៃជំនួប លោក លីវ ចុងអ៊ី បានវាយតម្លៃខ្ពស់ចំពោះកិច្ចសហប្រតិបត្តិការប្រកបដោយផ្លែផ្ការវាងប្រទេសទាំងពីរ ជាពិសេសក្នុងវិស័យសន្ដិសុខ។ លោកបានកោតសរសើរសម្ដេចធិបតីដែលបានដាក់ចេញនូវយុទ្ធសាស្ត្រ គោលនយោបាយ និង គំនិតផ្ដួចផ្ដើមថ្មីៗជាច្រើនប្រកបដោយចក្ខុវិស័យវែងឆ្ងាយ សម្រាប់ការងារអភិបាលកិច្ចប្រទេស និងបានបង្ហាញនូវជំនឿជឿជាក់ចំពោះសម្តេចធិបតី ក្នុងការដឹកនាំប្រទេសកម្ពុជាឱ្យបន្តសម្រេចបាននូវការអភិវឌ្ឍនិងរីកចម្រើនលើគ្រប់វិស័យនៅពេលអនាគត។
លោក លីវ ចុងអ៊ី ក៏បានគូសបញ្ជាក់ផងដែរថា ភាគីចិនរីករាយក្នុងការបន្តពង្រឹងកិច្ចសហប្រតិបត្តិការទ្វេភាគី ចិន-កម្ពុជា ឱ្យកាន់តែខ្លាំងក្លាថែមទៀត។
ជាការឆ្លើយតប សម្ដេចធិបតី ហ៊ុន ម៉ាណែត បានសម្ដែងនូវការពេញចិត្តចំពោះទំនាក់ទំនងរវាងប្រទេសទាំងពីរ ព្រមទាំងបានគូសបញ្ជាក់ពីលទ្ធផលជាច្រើននៅក្នុងកិច្ចសហប្រតិបត្តិការកម្ពុជា-ចិន ជាពិសេសលើវិស័យសន្ដិសុខ។ រាជរដ្ឋាភិបាលកម្ពុជានីតិកាលទី ៧ នៃរដ្ឋសភា ប្ដេជ្ញាបន្តរក្សាសន្តិភាព និងធានាសន្តិសុខនិងសុវត្ថិភាពជូនប្រជាពលរដ្ឋ។
សម្ដេចធិបតីបានលើកទឹកចិត្តក្រសួងនិងស្ថាប័ន្ធពាក់ព័ន្ធនៃប្រទេសទាំងពីរ បន្តកិច្ចសហប្រតិបត្តិការ ឱ្យកាន់តែជិតស្និទ្ធបន្ថែមទៀត ជាពិសេសលើការកសាងសមត្ថភាពនិងការផ្លាស់ប្ដូរព័ត៌មាន៕