ពិព័រណ៍ផលិតផលខ្មែរ និងបន្លែផ្លែឈើលើកទី ១៨ បើកសម្ពោធជាផ្លូវការនៅខេត្តសៀមរាប
ព្រឹត្តិការណ៍ «ពិព័រណ៍ផលិតផលខ្មែរនិងបន្លែផ្លែឈើ» លើកទី ១៨ ឆ្នាំ២០២៥ ដែលរៀបចំឡើងដោយក្រសួងពាណិជ្ជកម្ម នៅបរិវេណសួនហាត់ប្រាណ មាត់ស្ទឹងសៀមរាប ខេត្តសៀមរាប បានបើកសម្ពោធជាផ្លូវការនារសៀលថ្ងៃទី២៧ ខែកុម្ភៈ ឆ្នាំ២០២៥ ក្រោមអធិបតីភាពលោក សំហេង បូរ៉ា រដ្ឋលេខាធិការក្រសួងពាណិជ្ជកម្ម តំណាងលោកស្រីរដ្ឋមន្ត្រី ចម និម្មល។
ពិព័រណ៍ផលិតផលខ្មែរនិងបន្លែផ្លែឈើលើកទី ១៨ នេះ ធ្វើឡើងក្រោមមូលបទ “បង្កើនតម្លៃបន្ថែមនៃអាជីវកម្មបន្លែផ្លែឈើ”។
លោក សំហេង បូរ៉ា បានគូសបញ្ជាក់ថា ការរៀបចំព្រឹត្តិការណ៍ពិព័រណ៍នេះ គឺមានសារៈសំខាន់និងបានជះផលវិជ្ជមានដល់ការបង្កើនសកម្មភាពពាណិជ្ជកម្ម និងការទាក់ទាញភ្ញៀវទេសចរជាតិនិងអន្តរជាតិ ដែលនឹងចូលរួមជំរុញសេដ្ឋកិច្ចមូលដ្ឋាន ពោលគឺក្នុងមូលដ្ឋានខេត្តសៀមរាបតែម្តង។ ពិព័រណ៍នេះក៏បានផ្តល់ជាវេទិកាសម្រាប់អាជីវករ ពាណិជ្ជករ ប្រតិបត្តិករ សេវាករ អ្នកនាំចេញនាំចូល អ្នកដាំដុះបន្លែផ្លែឈើ ម្ចាស់កសិដ្ឋានក្នុងមូលដ្ឋានខេត្តសៀមរាបនិងបណ្តាខេត្តក្រុងនានា អាចដាក់តាំងបង្ហាញ ផ្សព្វផ្សាយ និង លក់នូវផលិតផលខ្មែរធម្មជាតិដែលប្រកបដោយគុណភាពជូនសាធារណជនទូទៅ រួមទាំងភ្ញៀវទេសចរជាតិនិងអន្តរជាតិផងដែរ។ ទន្ទឹមនឹងនេះ ព្រឹត្តិការណ៍នេះក៏នឹងផ្តល់នូវឱកាសក្នុងការធ្វើអន្តរកម្មរវាងអាជីវករនិងអាជីវករ ម្ចាស់កសិដ្ឋាន ម្ចាស់ផ្សារទំនើប ម្ចាស់អាជីវកម្មបោះដុំ និង អ្នកលក់រាយនានា ក្នុងការពិភាក្សានិងស្វែងរកកិច្ចសហប្រតិបត្តិការផងដែរ។
លោកបន្ថែមថា ព្រឹត្តិការណ៍ពិព័រណ៍នេះក៏ជាផ្នែកមួយដ៏សំខាន់នៃការអនុវត្តគោលនយោបាយអភិវឌ្ឍន៍វិស័យពាណិជ្ជកម្មរបស់ក្រសួងពាណិជ្ជកម្ម ដើម្បីទាញយកការគាំទ្ររបស់ប្រជាជនកម្ពុជាចំពោះផលិតផលក្នុងស្រុក ជំនួសទំនិញនាំចូលពីបរទេស ព្រមទាំងជួយពង្រឹងខ្សែច្រវាក់ផលិតកម្មក្នុងស្រុកផងដែរ។
លោកបានគូសបញ្ជាក់បន្ថែមថា ដើម្បីធ្វើឱ្យប្រសើរឡើងនូវបរិយាកាសធុរកិច្ចដល់ធុរជននិងវិនិយោគិន ក្រសួងពាណិជ្ជកម្មបានដាក់ចេញនូវយន្តការសំខាន់ៗចំនួន ៣ រួមមានកិច្ចសម្រួលពាណិជ្ជកម្ម ការធ្វើពិពិធកម្មទីផ្សារ និង ការកសាងច្បាប់និងបទប្បញ្ញត្តិ។ ទន្ទឹមនឹងនេះ លោកបានជំរុញដល់ផលិតករ ពាណិជ្ជករ និង អាជីវករកម្ពុជាទាំងអស់ ត្រូវខិតខំបង្កើតគំនិតច្នៃប្រឌិតថ្មីៗបន្ថែមទៀត និងរៀបចំទំនិញសម្រាប់តម្រូវការទីផ្សារ ដោយត្រូវពង្រឹងគុណភាព សោភ័ណភាព និង សុវត្ថិភាពផលិតផលសម្រាប់អ្នកប្រើប្រាស់ អនុលោមតាមស្តង់ដាអនាម័យ ជាមួយតម្លៃសមរម្យ ដើម្បីលើកកម្ពស់សមត្ថភាពប្រកួតប្រជែងក្នុងទីផ្សារសេរី។
ពិព័រណ៍ផលិតផលខ្មែរនិងបន្លែផ្លែឈើលើកទី ១៨ នៅខេត្តសៀមរាបនេះ មានក្រុមហ៊ុន សហគ្រាស អាជីវករ ផលិតករ សហគមន៍ អ្នកដាំដុះចូលរួមចំនួន ៨៨ និងមានស្តង់ចំនួន ១១១ ស្តង់។ ក្រៅពីដាក់តាំងបង្ហាញបន្លែផ្លែឈើស្រស់និងផលិតផលកែច្នៃដែលមានគុណភាពខ្ពស់ ក៏មានរៀបចំកម្មវិធីអមនានា រួមមានសិក្ខាសាលាស្តីពីកាលានុវត្តភាពថ្មីនៃអាជីវកម្មបន្លែផ្លែឈើ សិក្ខាសាលាផ្សព្វផ្សាយស្ដីពីការពង្រឹងសក្តានុពលស្វាយចន្ទីកម្ពុជា ពិធីចុះអនុស្សរណៈនៃការយោគយល់គ្នារវាងសហព័ន្ធស្វាយចន្ទីកម្ពុជានិងក្រុមហ៊ុន Control Union (Cambodia) Co., Ltd កម្មវិធីបង្ហាញអំពីការចម្អិនម្ហូបអាហាររបស់សមាគមចុងភៅខេត្តសៀមរាប ព្រមទាំងការសម្តែងសិល្បៈនិងតន្រ្តីខ្មែររយៈពេល ៣ យប់ផងដែរ៕