សម្តេចធិបតី ហ៊ុន ម៉ាណែត ឱ្យបញ្ឈប់នូវទង្វើមិនគប្បីដែលប៉ះពាល់ដល់តម្លៃ និងសេចក្តីថ្លៃថ្នូររបស់ស្ត្រី
នាព្រឹកថ្ងៃទី៤ ខែមីនា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវឱ្យបញ្ឈប់ជាបន្ទាន់នូវទង្វើឬការប្រើប្រាស់ពាក្យសម្ដីអសីលធម៌ ដោយខ្វះការគោរពចំពោះតម្លៃនិងសេចក្តីថ្លៃថ្នូររបស់ស្ត្រី។
ការអំពាវនាវរបស់សម្ដេចធិបតី គឺធ្វើឡើងបន្ទាប់ពីសង្កេតឃើញក្នុងមួយរយៈចុងក្រោយនេះ មានសកម្មភាពឬការបញ្ចេញមតិរបស់បុគ្គលមួយចំនួន ដែលធ្វើឱ្យប៉ះពាល់ដល់អារម្មណ៍និងសេចក្តីថ្លៃថ្នូររបស់អ្នកដទៃ ជាពិសេសស្ត្រីភេទ ពោលគឺបាននិយាយពាក្យសម្តីលេបខាយ មើលងាយ មិនផ្តល់តម្លៃឱ្យស្ត្រី។
សម្តេចធិបតីបានលើកឡើងថា សកម្មភាពឬការនិយាយរបស់បុគ្គលមួយចំនួនបែបនេះ ប្រហែលជាមិនមានចេតនាអាក្រក់ ហើយគ្រាន់តែចង់បានការចាប់អារម្មណ៍ពីអ្នកមើលឬអ្នកស្ដាប់ ចំពោះសកម្មភាពឬពាក្យសម្តីរបស់ខ្លួន និងអាចចាត់ទុកថាជារឿងលេងសើចធម្មតា មិនមានអ្វីធ្ងន់ធ្ងរ ប៉ុន្តែសកម្មភាពឬពាក្យសម្ដីទាំងនោះអាចប៉ះពាល់យ៉ាងខ្លាំងទៅដល់អារម្មណ៍ ក៏ដូចជាសេចក្តីថ្លៃថ្នូររបស់អ្នកដែលត្រូវទទួលរងនូវសកម្មភាពឬពាក្យសម្ដីទាំងនោះ។
សម្ដេចធិបតី ហ៊ុន ម៉ាណែត បានអំពាវនាវដល់ប្រជាពលរដ្ឋខ្មែរទាំងអស់ ជាពិសេសយុវជន ត្រូវធ្វើសកម្មភាពឬប្រើប្រាស់ពាក្យសម្ដីជាមួយអ្នកដទៃដោយការគោរពគ្នាទៅវិញទៅមក និងប្រកាន់ខ្ជាប់នូវសីលធម៌ គុណធម៌ និង សេចក្តីថ្លៃថ្នូររបស់ខ្មែរយើង ឱ្យស័ក្តិសមជាប្រជាពលរដ្ឋដែលរស់នៅក្នុងសង្គមស៊ីវិល័យ។
សម្ដេចធិបតីថែមទាំងបានសង្កត់ធ្ងន់ថា បើទោះបីជាសកម្មភាពស្របច្បាប់ឬការបញ្ចេញមតិជាសិទ្ធិរបស់បុគ្គល ក៏ប៉ុន្តែការគោរពសិទ្ធិនិងសេចក្តីថ្លៃថ្នូររបស់អ្នកដទៃ ជាកាតព្វកិច្ចសីលធម៌របស់យើងទាំងអស់គ្នា និងដែលត្រូវប្រកាន់ខ្ជាប់គ្រប់ពេលវេលា ដើម្បីចូលរួមថែរក្សាសុខដុមនីយកម្មសង្គម៕