ក្រសួងសុខាភិបាល៖ ការប្រើប្រាស់សេវាជំងឺទឹកនោមផ្អែមកើនឡើង ៥៩% ក្នុងឆ្នាំ២០២៤
លោក ឈាង រ៉ា រដ្ឋមន្ត្រីក្រសួងសុខាភិបាលបានឱ្យដឹងថា ក្នុងឆ្នាំ២០២៤ ជំងឺទឹកនោមផ្អែមមានចំនួន ២៣០ ២៧៩ ករណី កើនឡើង ៥៩% និងអ្នកជំងឺសម្រាកព្យាបាលនៅមន្ទីរពេទ្យមានចំនួន ១៧ ៥៣៤ នាក់ កើនឡើង ៤៣,២៥% បើធៀបនឹងឆ្នាំ២០២៣។
នៅក្នុងពិធីបិទសន្និបាតលើកទី៤៤ កាលពីថ្ងៃទី៤ ខែមីនា ឆ្នាំ២០២៥ លោក ឈាង រ៉ា បានបញ្ជាក់ថា ការប្រើប្រាស់សេវាជំងឺមិនឆ្លងចម្បងៗនៅក្នុងឆ្នាំ២០២៤ បានកើនឡើងគួរឱ្យកត់សម្គាល់ ជាពិសេសការប្រើប្រាស់សេវាជំងឺទឹកនោមផ្អែម ដែលមាន ២៣០ ២៧៩ ករណី កើនឡើង៥៩% បើធៀបនឹងឆ្នាំ២០២៣។
លោកបានបញ្ជាក់បន្ថែមថា ក្រៅពីជំងឺទឹកនោមផ្អែម ជំងឺឡើងសម្ពាធឈាមកើនឡើង២១% ជំងឺសុខភាពផ្លូវចិត្តដែលបញ្ជាក់ពីសមត្ថភាពនៃការផ្តល់សេវាមានការកើនឡើង និងពីបន្ទុកជំងឺមិនឆ្លងនេះផងដែរ។ ជំងឺមិនឆ្លងចម្បងៗដូចជា ជំងឺទឹកនោមផ្អែម ជំងឺឡើងសម្ពាធឈាម ជំងឺបេះដូងសរសៃឈាម ជំងឺមហារីក និង ជំងឺផ្លូវដង្ហើមរ៉ាំរ៉ៃ ជាមូលហេតុចម្បងនៃការស្លាប់និងពិការភាពរបស់ប្រជាជនកម្ពុជា ខណៈដែលកម្ពុជាកំពុងឈានទៅកាន់សង្គមដែលមានមនុស្សវ័យចាស់កាន់តែច្រើន។
ដើម្បីឆ្ពោះទៅកាន់គោលដៅនៃការគ្រប់គ្រងការគ្របដណ្តប់សុខភាពជាសកលនៅកម្ពុជាឆ្នាំ២០៣៥ ប្រព័ន្ធសុខាភិបាលបានបន្តពង្រីកនិងអភិវឌ្ឍសេវាថែទាំសុខភាព ព្រមទាំងលើកកម្ពស់គុណភាពសេវាជាប្រចាំ។ បន្តពង្រឹងសមត្ថភាពស្នូលនៃនិយ័តកម្មសុខភាពអន្តរជាតិនៃប្រព័ន្ធសុខាភិបាលនៅថ្នាក់ជាតិនិងថ្នាក់ក្រោមជាតិ។ ការរៀបចំនិងការពង្រឹងសមត្ថភាពស្ថាប័នកំពុងប្រព្រឹត្តទៅយ៉ាងសកម្ម ដើម្បីលើកកម្ពស់និងអនុវត្តតួនាទីនិងមុខងារស្ថាប័ន ប្រកបដោយស្មារតីទទួលខុសត្រូវនិងប្រសិទ្ធិភាពខ្ពស់។ ធ្វើអន្តរាគមន៍អាទិភាពមួយចំនួន រួមមានការបង្ការនិងការគ្រប់គ្រងជំងឺមហារីក ការថែទាំសុខភាពមាតានិងទារក អន្តរាគមន៍លុបបំបាត់ជំងឺគ្រុនចាញ់ឆ្នាំ២០២៥ ការពង្រឹកសេវាមណ្ឌលសុខភាពនិងសេវាថែទាំសុខភាពបឋម និង ការពង្រឹងនិយ័តកម្មសេវាសុខាភិបាលសាធារណៈនិងឯកជន៕