កម្ពុជានឹងរៀបចំព្រះរាជពិធីបួងសួងចម្រើនសេចក្តីសុខនៅខែមេសា ឆ្នាំ២០២៥
ព្រះរាជពិធីបួងសួងចម្រើនសេចក្តីសុខជូនដល់ព្រះរាជាណាចក្រកម្ពុជា នឹងប្រារព្ធឡើងនៅថ្ងៃទី១១-១២ ខែមេសា ឆ្នាំ២០២៥ នៅមុខប្រាសាទអង្គរវត្ត ខេត្តសៀមរាប ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា។
ដើម្បីឱ្យព្រះរាជពិធីនេះប្រព្រឹត្តទៅដោយរលូននិងទទួលបានជោគជ័យ នៅថ្ងៃទី៤ ខែមីនា ឆ្នាំ២០២៥ រាជរដ្ឋាភិបាលកម្ពុជាបានចេញសេចក្តីសម្រេចបង្កើតគណៈកម្មការអន្តរក្រសួង ដើម្បីរៀបចំព្រះរាជពិធីបួងសួងចម្រើនសេចក្តីសុខជូនដល់ព្រះរាជាណាចក្រកម្ពុជា ដោយមានសមាសភាពសម្តេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាប្រធានគណៈកម្មាធិការជាតិរៀបចំបុណ្យជាតិនិងអន្តរជាតិជាប្រធាន រួមជាមួយអនុប្រធានចំនួន ៨ រូប និងសមាជិកចំនួន ២៣ រូប។
គណៈកម្មការអន្តរក្រសួងនេះ មានតួនាទីនិងភារកិច្ចដឹកនាំ រៀបចំ ចាត់ចែង សម្របសម្រួលជាមួយស្ថាប័ននិងអង្គភាពពាក់ព័ន្ធ ដើម្បីឱ្យដំណើរការនៃការរៀបចំព្រះរាជពិធីប្រព្រឹត្តទៅបានល្អ។ រៀបចំគម្រោងចំណាយផ្សេងៗនៃដំណើរការក្នុងការរៀបចំព្រះរាជពិធីនេះ។ រៀបចំការពារសន្តិសុខ របៀបរៀបរយ សណ្តាប់ធ្នាប់ ចរាចរណ៍ និង ធានាសុវត្ថិភាពឱ្យបានគ្រប់គ្រាន់ មុន-ក្រោយ ក្នុងពេលប្រារព្ធព្រះរាជពិធី និងតាមផ្លូវឆ្លងកាត់។ ទំនាក់ទំនងនិងសហការជាមួយអាជ្ញាធរមានសមត្ថកិច្ច ស្ថាប័នពាក់ព័ន្ធក្នុងការអញ្ជើញភ្ញៀវជាតិនិងអន្តរជាតិ ព្រមទាំងផ្សព្វផ្សាយព័ត៌មានពាក់ព័ន្ធនឹងការប្រារព្ធព្រះរាជពិធីនេះឱ្យបានទូលំទូលាយ៕