លោក ស៊ុន ចាន់ថុល ជួបពិភាក្សាការងារជាមួយគណៈអភិបាលក្រុងចឹងចូវ ខេត្តហ៊ឺណាន និងក្រុមវិនិយោគិនចិនប្រមាណ ៥០ ក្រុមហ៊ុន
កាលពីរសៀលថ្ងៃទី៥ ខែមីនា ឆ្នាំ២០២៥ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានទទួលស្វាគមន៍ដំណើរទស្សនកិច្ចស្វែងយល់ពីបរិយាកាសវិនិយោគនៅកម្ពុជារបស់គណៈប្រតិភូនៃគណៈអភិបាលរដ្ឋបាលប្រជាជនក្រុងចឹងចូវ (Zhengzhou) ខេត្តហ៊ឺណាន (Henan) នៃសាធារណរដ្ឋប្រជាមានិតចិន ព្រមជាមួយគណៈប្រតិភូវិនិយោគិននៃខេត្តហ៊ឺណាន សរុបប្រមាណ ៥០ ក្រុមហ៊ុន ដែលដឹកនាំដោយលោកស្រី លី ហ្វឹងជឺ (Li Fengzhi) អភិបាលរងក្រុងចឹងចូវ និងមានវត្តមានចូលរួមផងដែរពីសំណាក់លោក វ៉ាង វិនពីន (Wang Wenbin) ឯកអគ្គរដ្ឋទូតចិន ប្រចាំកម្ពុជា។
លោក ស៊ុន ចាន់ថុល បានសម្តែងនូវការស្វាគមន៍យ៉ាងកក់ក្តៅចំពោះគណៈប្រតិភូ ដែលបានចំណាយពេលវេលាមកបំពេញទស្សកិច្ចស្វែងយល់ដោយផ្ទាល់អំពីបរិយាកាសវិនិយោគនៅកម្ពុជានាពេលបច្ចុប្បន្ន ដែលបង្ហាញឱ្យឃើញពីចំណងមិត្តភាពកម្ពុជា-ចិនដ៏រឹងមាំស្អិតល្មួត ក្នុងនាមជាមិត្តដែកថែប។
លោក វ៉ាង វិនពីន បានវាយតម្លៃខ្ពស់ចំពោះការអភិវឌ្ឍយ៉ាងធំធេងនៃទំនាក់ទំនងចិន-កម្ពុជា ដែលត្រូវបានពូនជ្រំដោយយកចិត្តទុកដាក់ពីសំណាក់ថ្នាក់ដឹកនាំនៃប្រទេសទាំងពីរ និងកំពុងបន្តរីកចំរើនកាន់តែរឹងមាំឥតឈប់ឈរថែមទៀត និងបានរំលេចដែរថា កម្ពុជាគឺពិតជាគោលដៅវិនិយោគមួយដ៏ប្រពៃ បើធៀបនឹងគោលដៅដទៃនៅក្នុងតំបន់។
ដើម្បីជាការបំភ្លឺបន្ថែមឱ្យកាន់តែច្បាស់ជូនគណៈប្រតិភូ លោក ស៊ុន ចាន់ថុល បានលើកឡើងអំពីសក្តានុពលវិជ្ជមាននានារបស់កម្ពុជា ដែលជាមូលដ្ឋានសម្រាប់ពិចារណាក្នុងការសម្រេចចិត្តវិនិយោគ និងបានលើកឡើងអំពីមុខសញ្ញាវិនិយោគជាអាទិភាពរបស់កម្ពុជា ដែលគណៈប្រតិភូវិនិយោគិនគួរតែសិក្សាពិនិត្យលទ្ធភាព ក្នុងនោះរួមមានរោងចក្រឧស្សាហកម្ម ឧស្សាហកម្មយានយន្ត ឧស្សាហកម្មអេឡិចត្រូនិក ហេដ្ឋារចនាសម្ព័ន្ធរូបវន្ត កសិកម្មនិងកសិ-ឧស្សាហកម្ម ការកែច្នៃចំណីអាហារ ថាមពលបៃតង ការអភិវឌ្ឍតំបន់សេដ្ឋកិច្ចពិសេស វិស័យអប់រំបណ្តុះបណ្តាល វិស័យសុខាភិបាល បច្ចេកវិទ្យាឌីជីថល សហគ្រាស / អាជីវកម្មខ្នាតតូចនិងមធ្យម (SMEs) និង សេវាកម្មផ្សេងៗទៀត។
លោកស្រី លី ហ្វឹងជឺ បានរំលេចជាពិសេសអំពីគម្រោងស្នើសុំវិនិយោគសួនកសិ-ឧស្សាហកម្ម សម្រាប់កិច្ចសហប្រតិបត្តិការស៊ីជម្រៅ លើការកែច្នៃផលិតផលកសិកម្មនៅកម្ពុជារបស់រដ្ឋបាលខេត្តហ៊ឺណាន ដែលត្រូវបានរំពឹងថានឹងវិនិយោគឱ្យក្លាយជាតំបន់ពាណិជ្ជកម្មពិសេស លើផលិតផលកសិកម្ម ការកែច្នៃផលិតផលកសិកម្ម ការផ្ដល់សេវាកម្មលើបច្ចេកវិទ្យាកសិកម្ម និង ជាទីតាំងស្តុកផលិតផលកសិកម្ម តាមរយៈការទាក់ទាញបណ្ដាក្រុមហ៊ុនផ្សេងៗ ដែលមានមុខសញ្ញាអាជីវកម្មពាក់ព័ន្ធនឹងវិស័យកសិកម្មបែបទំនើប។
ក្នុងឱកាសនៃជំនួបនេះ ក្រុមហ៊ុនមួយចំនួនក៏បានធ្វើបទបង្ហាញអំពីខ្សែច្រវាក់ផលិតកម្ម បច្ចេកទេស បច្ចេកវិទ្យា និង ផលិតផលរបស់ខ្លួន ដើម្បីជាមូលដ្ឋានក្នុងការឈានទៅរកការចាប់ដៃសហការ ផ្គូផ្គងធុរកិច្ចជាមួយគ្នានាពេលអនាគត។
ភាគីទាំងពីរក៏បានបញ្ជាក់សាជាថ្មីនូវការប្តេជ្ញាចិត្ត ធ្វើឱ្យកាន់តែស៊ីជម្រៅនិងកាន់តែជិតស្និទ្ធថែមទៀតនៃភាពជាដៃគូយុទ្ធសាស្ត្រគ្រប់ជ្រុងជ្រោយ និងចូលរួមសហការអនុវត្តផែនការកសាងកម្ពុជាក្នុងយុគសម័យថ្មីរវាងរាជរដ្ឋាភិបាលកម្ពុជានិងរដ្ឋាភិបាលចិន (២០២៤ – ២០២៨) ក៏ដូចជាកិច្ចសហប្រតិបត្តិការមួយចំនួនទៀត ដូចជា “ច្រករបៀងឧស្សាហកម្មនិងបច្ចេកវិទ្យា” “ច្រករបៀងមច្ឆានិងអង្ករ” និង “ហេដ្ឋារចនាសម្ព័ន្ធសេដ្ឋកិច្ចឌីជីថល” ជាដើម៕