លោក ស៊ុន ចាន់ថុល ៖ កម្ពុជាគឺជាទីតាំងដែលវិនិយោគិនគួរពិចារណា ក្នុងការបណ្តាក់ទុនវិនិយោគ
លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងថា កម្ពុជាគឺជាទីតាំងដែលវិនិយោគិនគ្រប់មជ្ឈដ្ឋាន ជាពិសេសវិនិយោគិនបរទេស គួរពិចារណាក្នុងការមកបណ្តាក់ទុនវិនិយោគ ព្រោះរាជរដ្ឋាភិបាលកម្ពុជាបានផ្តល់នូវលក្ខខណ្ឌយ៉ាងល្អសម្រាប់វិនិយោគិន។
លោក ស៊ុន ចាន់ថុល បានលើកឡើងបែបនេះ ក្នុងឱកាសដែលលោកថ្លែងសុន្ទរកថាគន្លឹះបើកវេទិកាពិភាក្សា និងធ្វើជាវាគ្មិនកិត្តិយសពិភាក្សាជុំវិញប្រធានបទ «ការលើកកម្ពស់វិបុលភាពតាមរយៈពាណិជ្ជកម្មនិងការវិនិយោគ» ដែលជារបៀបវារៈមួយនៅក្នុងកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៥ ក្រោមមូលបទ «ជំរុញការតភ្ជាប់អាស៊ាន៖ មនុស្ស ហេដ្ឋារចនាសម្ព័ន្ធ និង ពាណិជ្ជកម្ម»កាលពីរសៀលថ្ងៃទី៦ ខែមីនា ឆ្នាំ២០២៥ នៅសណ្ឋាគារសូហ្វីតែលភ្នំពេញ។
លោកបានលើកឡើងអំពីបច្ច័យវិជ្ជមាននានា ដែលជាហេតុនាំឱ្យកម្ពុជាក្លាយជាទីតាំងដែលគួរពិចារណាក្នុងការមកដាក់ទុនវិនិយោគ និងមុខសញ្ញាវិនិយោគជាអាទិភាពរបស់កម្ពុជា ដែលមានរបត់ផ្លាស់ប្តូរស្របតាមនិន្នាការជាសកល។ លោកថែមទាំងបានរំលេចអំពីកំណើននៃគម្រោងវិនិយោគដែលគួរឱ្យកត់សម្គាល់ ក្នុងកំណត់ត្រាគម្រោងវិនិយោគដែលបានអនុម័ត គឹជាសក្ខីភាពជាក់ស្តែងបង្ហាញឱ្យឃើញពីប្រសិទ្ធភាពនៃច្បាប់ស្តីពីការវិនិយោគ ក៏ដូចជាគោលនយោបាយនានារបស់រាជរដ្ឋាភិបាល ក្នុងការថែទាំនិងគាំទ្រកិច្ចការវិនិយោគនៅកម្ពុជា និងបានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលចំពោះវិស័យឯកជន ដោយបានចាត់ទុកវិស័យនេះជាម៉ាស៊ីនដ៏សំខាន់ក្នុងការជំរុញកំណើនសេដ្ឋកិច្ចជាតិ។
តាមរយៈវេទិកានៃការពិភាក្សានេះ លោក ស៊ុន ចាន់ថុល បានរំពឹងថា ធុរជន វិនិយោគិន និង អ្នកចូលរួមចម្រុះជាតិសាសន៍ ពិសេសនៅក្នុងសមាគមប្រជាជាតិអាស៊ីអាគ្នេយ៍ នឹងបានឈ្វេងយល់បន្ថែមមួយកម្រិតទៀតអំពីបច្ចុប្បនភាពនៃបរិយាកាសវិនិយោគនិងការធ្វើធុរកិច្ចនៅកម្ពុជា ជាមួយនឹងការប្តេជ្ញាចិត្តរបស់កម្ពុជាផ្ទាល់ ក្នុងការជំរុញកំណើនប្រកបដោយចីរភាពនិងបរិយាប័ន្ន ដូចដែលបានបង្ហាញនៅក្នុងគោលនយោបាយរបស់រាជរដ្ឋាភិបាល ព្រមទាំងស្របទៅនឹងគោលបំណងសេដ្ឋកិច្ចរួមរបស់អាស៊ានផងដែរ។
វេទិកានេះត្រូវបានរៀបចំឡើង ក្នុងគោលបំណងដើម្បីពិនិត្យពិភាក្សាពាក់ព័ន្ធនឹងបែបផែន ដែលសមាគមអាស៊ានទាំងមូលកំពុងចាប់យកវិស័យពាណិជ្ជកម្មនិងការវិនិយោគ ដើម្បីជំរុញកំណើនសេដ្ឋកិច្ចនិងការអភិវឌ្ឍនៅទូទាំងតំបន់។ ផ្តល់ឱកាសឱ្យអ្នកចូលរួមស្តាប់បានស្វែងយល់បន្ថែមអំពីយុទ្ធសាស្ត្រគន្លឹះ គំនិតផ្តួចផ្តើម និង ភាពជាដៃគូ ដែលកំពុងពូនជ្រំបរិយាកាសសេដ្ឋកិច្ច និងរួមចំណែកជំរុញឱ្យសមាគមអាស៊ានកាន់តែមានភាពលេចធ្លោនៅលើឆាកនៃវិស័យសេដ្ឋកិច្ចរបស់សកលលោក៕